Тырышлыгы бәяләнде

Тырышлыгы бәяләнде
Арча педагогика көллиятенең 3 курс студенты Рифат Гайнетдинов 2013–2014 уку елы нәтиҗәләре буенча Татарстан Республикасы Президенты Карары белән махсус дәүләт стипендиясенә лаек булды.
Яңасалада яшәп, Арчаның бер шәхси ширкәтендә юллар салучы булып эшләүче Илшат белән чирек гасырга якын педагогик стажлы Илфаниянең икенче уллары ул Рифат. Тырышлык сыйфаты кечкенәдән күңеленә сеңеп үскән. Мондый дәрәҗәгә ирешкән егет мәктәп елларында ук уку алдынгысы булгандыр, дип уйлап, соравымны бирәм Рифатка. Ялгышмаганмын икән.
— Яңасала мәктәбендә укыганда төрле фәннәрдән олимпиадаларда катнаша идем. 9 сыйныфка Төбәк–Чокырча мәктәбенә (хәзерге 7нче мәктәп) килгәч тә йөрүемне дәвам иттем, — дип сөйләп китте ул. — Мәктәпне тәмамлагач, Арча педагогика көллиятенә кердем. Башлангыч сыйныфлар һәм информатиканы тирәнтен өйрәнү бүлегенә. Уңышларым 2 курста укыганда башланды. Апрель аенда республика күләмендә информатика буенча олимпиадада катнашып, 3нче урын яулауга ирештем. Укырга кергәч тә көллияттә чаңгы секциясенә йөри башлаган идем, 2 курста район буенча призлы урыннарга, ДОСААФ өчен район данын яклап республика күләмендә чаңгы ярышларында катнашып, призлы урыннарга ия булдым. Укуда да яхшы билгеләренә укып бара икән Рифат. “Тырышам инде”, — ди. Укытучы әнисенең гомере буе мәшәкатьле хезмәт иясе икәнлеген күреп үссә дә, шул һөнәрне сайларга булган ул. Абыйсы да берничә еллар элек әлеге көллиятне тәмамлаган булган. Арча эчке эшләр бүлегендә участок уполномоченные булып эшләүче Ришат абыйсы Рифат өчен өлге. Аның “Тырышып укы, югалмассың”, — дигән киңәшен тота ул. “Абый Ватан алдындагы бурычын үтәп армия сафларында да хезмәт итеп кайтты. Армиягә бару — егет кешенең бурычы, вакыт җиткәч, мин дә барачакмын”, — ди.
Ә укуына килгәндә, буш вакытлары юк диярлек егетнең. Дәресләрдән соң түгәрәкләргә ашыга: кышын — чаңгыга басса, җәен роллерда җилләр белән узыша. Ялларда авылга кайтканда да йорт эшләренә булышканнан соң чаңгыда авылының кырлары буйлап туган җиренең гүзәллеген манзара кылып кайтуны гадәткә керткән. Җәйне ярата икән Рифат. “Якыннарым янында озын җәйнең узганы да сизелми. Җәй көне ел буена җитәрлек көч җыям”, — ди. Әдәбият дөньясы да ят түгел егеткә, күбрәк классик әдәбиятка өстенлек бирә.
Ә укудагы уңышларына килгәндә, төркем җитәкчесе Гөлнара Гарипованың, көллият директорының, укытучыларның һәм әти–әнисенең дә тырышлыгы нәтиҗәсе дип саный, аларга рәхмәтле булуын әйтә.
“Тирә–ягымдагы һәркем һәрвакыт ярдәм итәргә тырыша. Алар юнәлеш, көч биреп күңелемне үсендереп тормаса, уңышларга ирешүләре авыр булыр иде”, — ди. Яшьтәшләренә дә үзенә елмайган кебек уңышлар тели. “Сәләте булганнарга тырышырга кирәк. Ялкаулыгыңны җиңеп, буш вакытыңны юкка уздырмыйча, бар җирдә дә өлгерергә тырышсаң, бер шөгыль икенчесенә, уңышлар да бер–берсенә ияреп бара”, — ди.
Райондашларыңа киләчәктә дә синең республика күләмендә бәяләнгән хезмәтләреңне ишетеп горурланып яшәргә язсын, Рифат!
Розалия САФИНА