Күңелендә аның Масра басуы

Күңелендә аның Масра басуы
Моннан 15 еллар тирәсе элек бер җыр популярлашып китте:
Ниләр булды сиңа гөлем,
Нигә дип саргаясың.
Сулар сибәргә әнкәм юк,
Әллә аны юксынасың.
Радиодан да яңгырый, телевизорда да шул, сорап җырлатучылар әллә ничаклы. Иң кызыгы — җырны башкаручының да, сүз һәм көй авторларының да фамилиясе бер үк — Минһаҗевлар: Зөлфия, Наил, Мөхтәр. Аларны туганнар ахры, дип фикер йөртүчеләр булмый калмагандыр. Кем уйлаган бит шул чакта сүз авторы безнең якташыбыз — Югары Масраның хәтфә чирәмнәрендә тәгәрәп үскән Наил абый икәнлеген һәм әнисе вафатыннан соң тәүге тапкыр язылган шушы сагыш хисләре тулы шигырьнең җыр булып дөньяга чыгасын, иҗат дөньясына Наил Минһаҗев атлы егетне чыгарасын?!
Әнә шул Наил абый узган атнада “Казан арты” тарих–этнография музеена якташлары белән очрашуга — иҗат кичәсенә кайтты. И, рәхәтләнде кичәгә килүчеләр Арча педагогика көллияте студентлары башкаруында һәм Курса–Почмак мәктәбе укучылары әзерләгән сәхнә күренеше аша Наил абый сүзләренә язылган моңлы җырлар һәм шигырьләрне тыңлап!
Мәхәббәт тулы җыр текст-ларына караганда яшь кешедер дип уйлаучылар ялгыша, узган ел ноябрьдә Наил Минһаҗев 60 яшен тутырган. Әнә шул гомер бәйрәменә ул 100дән артык җырга салынган шигырьләре (алар бүгенге көндә һәммәсе профессио-наль җырчылар тарафыннан сәхнәләрдә башкарыла), 2 китабы, 1 җырлар тулы дискы белән аяк басты. Болар — иҗат җимешләре. Ә гаилә хәленә килгәндә, Наил абый пар канаты Әлки районы кызы Мәдинә апа белән, 39 ел гомер кичереп, балалары Динара белән Динарны тәрбияләп, олы тормышка очырганнар, хәзер оныкларын үстерешергә булышып яшиләр.
Туган авылы белән элемтәсе беркайчан өзелмәгән-леге, сагынып кайтып керер җире, шатланып көтеп торучы якыннары – абыйсы Нәкыйп һәм җиңгәсе Наилә апа булуы белән бәхетле Наил абый. “Туган якны сагынып яшим. Авылга ике айлап кайтмый торсам, төшемә яшьти Габделнур керә”, — дип шаярта. Өстәвенә, бик еш яшьлек еллары да искә төшеп йөдәтә. Яшь чакта кич клубка чыгар өчен атна саен шәһәрдән авылга ашыгалар иде бит. Хәтта Мәскәүгә китеп эшләгәндә, анда фатир алып урнашып кала алу мөмкинлеге булса да, авылга якынрак булу, гел кайтып йөри алыр өчен Казанга кайтып төпләнә. Әнә шул туган җиренә мәхәббәте гомеренең бишенче дистәсен төгәлләү ягына авышканда кулына каләм тоттырып, сагыну, ярату хисләрен кәгазь битләренә төшерергә мәҗбүр итә.
Мәхәббәт турындагы шигырьләре күңелнең төрле халәтен чагылдыра. Тәүге китабы чыккач, Мәдинә апа: “Кемнәргә багышлап яздың?” — дип үпкәләп тә алган. “Алар үз башымнан кичкән вакыйгалар түгел. Каяндыр берәр фраза яки кемнеңдер язмышының бер өлешен ишетү җитә миңа, уйлап йөри торгач, шигырь булып кәгазь битләренә күчә”, — ди гомерен автослесарь хезмәтенә багышлаган Наил абый. Бүгенге кичәдә ул якташлары — Масра ягыннан искән җилдән сәлам алып килүчеләр белән күрешүгә дә иреште. Наил абыйның шатлыгын уртаклашырга Сеҗе авыл җирлеге башлыгы Гөлфия Гыйбадуллина, Курса–Почмак мәктәбе директоры Нурзилә Сабирҗанова һәм Гөберчәк музее директоры Халидә Габидуллина килгән.
Сиңа һаман тартыламын
Туган ягым туфрагы,
дип сагыну хисләрен җиткерүче Наил абыйның күңеле инде җәйне, җиләк җыяр чакларны, печән чапкан вакытларны, туганнары белән оештырылачак Сабантуйны һәм бүгенге кичәдән алып киткән ил-һам йогынтысында язылган шигырьләрне яңгыратыр мизгелләрне көтә.
Розалия ЗИННӘТОВА