Әллә туктаргамы — бирешмә!

Әллә туктаргамы — бирешмә!
Район мәгариф учреждениеләре профсоюз оешмасы (җитәкчесе Вакыйф Харисов) чаңгы ярышында район мәгариф идарәсе җитәкчесе Зөлфәт Дәүләтбаев үзе дә катнашты. 40 яшьтән узган ир–атлар арасында ул финишка беренчеләрдән булып килде.
Әйе, спортны гомерлек юлдаш итеп алган педагоглар бар. 5нче гимназиянең педагог–оештыручысы Гүзәл Абдуллинаның җәйге айларда Арча станциясеннән велосипедта эшкә йөргәнен күпләр белә. Ярышта да ул чаңгыда матур йөрүе белән сокландырды.
— Кышын чаңгыда йөрим, бассейнда йөзәм, — ди ул. — Спорт миңа яхшы кәеф бирә.
Сөбханалла, 49 яшьлек Кече Төрнәле башлангыч мәктәбе укытучысы Дания Фәхриева, 35 яшьтән өлкәнрәкләр ярышында яшьләрне артта калдырып, финишка 2нче килде.
— Әле дә мин җай туры килгәндә үземнең балалар белән (өчәү), алар да спортны ярата, йөгереп кайтам, — ди Дания ханым.
Яңа Кишет мәктәбе директоры Фарсель Минҗанов кыш башланганнан бирле 6 сыйныфта укучы кызы Фирүзә белән чаңгыда шуа.
40 яшьтән узган ир–атлар арасында беренче унлыкта финиш биргән Вәсим Бәдертдинов (Носы мәктәбе директоры):
— Кичләрен иптәшем белән чаңгыда чыккалыйбыз, — ди. — Мәктәптә укучыларга җитәрлек чаңгы бар. Балалар дәрестә үз чаңгылары белән түгел, мәктәпнеке белән шуа.
— 1 километр араны узу кыен булмадымы? — дип сорыйм.
— Ярышта “әллә туктаргамы?” дигән чиккә җитәсең, әмма “бирешмә!” дигән үҗәтлек финишка алып килеп җиткерә. 50 яшьтән узганнарны аерым ярыштырырга кирәк, минемчә.
9нчы балалар бакчасында эшләүче Резедә Хәбибуллинаның чаңгыда бар дөньясын онытып, томырылып чабуына сокланып карап тордым. Ярышларны алып баручы Арчаның 7нче мәктәп физкультура укытучысы Булат Гәрәев:
— Чаңгычы ул безнең! — дип таныштырды.
Резедә 35 яшькә кадәрлеләр арасында 1нче урынны алса, 4 хатын–кыздан торган эстафета ярышында да команданы беренчелеккә чыгарды. Афәрин!
10нчы балалар бакчасы физик күнегүләр тәрбиячесе Ирина Газизова, үз дистанциясендә чаңгысына зыян килгәч, каушап, аптырап калмаган, чаңгыларын кулына тотып, кардан бата–чума йөгереп килеп, хезмәттәшенә эстафетаны тапшырды. Соңгы нәтиҗә — команда 3нче урынны алды!
Яңа Кенәр балалар бакчасыннан Гөлнар Гайнуллина, Наилә Зарипова, Резедә Хәмзина, Эльвира Абдрәшитова авылдашлары, ветеран укытучы Фидалия Шәяхмәтованың көн дә чаңгыда йөрүен сөйләделәр.
Үз дистанцияләрендә менә кемнәр җиңүче булды: 9нчы бакчадан Резедә Хәбибуллина, Курса–Почмак мәктәбеннән Чулпан Шиһапова, Яңа Кенәрдән Рәмис Хәйруллин, Сикертән мәктәбеннән Разил Нәбиуллин. Хатын–кызлар эстафетасында 9нчы бакча командасы — 1нче, 8нче бакча — 2нче, 10нчы бакча командасы 3нче урынны алды. Катнаш эстафетада Яңа Кенәр мәктәбе — 1нче, Иске Кырлай — 2нче, Лесхоз мәктәбе командасы 3нче урынга лаек булды. Гомумән алганда, Иске Кырлай мәктәбе башлангыч профсоюз оешмасы — 1нче, Яңа Кенәр мәктәбе — 2нче, Лесхоз мәктәбе 3нче урынны алды.
— Кояшлы матур көндә, ап–ак җемелдәвек кар өстеннән чаңгыларда йөрүе шундый рәхәт! — ди Укучылар сарае педагогы Дамир Таҗиев.
Быел бу рәхәтлекне татымаучыларга чаңгыларда йөрергә вакыт бар әле.
Румия НАДРШИНА