Мәдәнияттә дә беренче урында — сыйфат

Мәдәнияттә дә беренче урында — сыйфат
2014 ел Мәдәният елы буларак игълан ителгән иде. Бу чорда районда мәдәният өлкәсендә нәрсәләр эшләнде? 4 февральдә үткән хисап җыелышында сүз шул хакта барды.
Район мәдәният идарәсе җитәкчесе Рамил Мөхетдинов мәдәният учреждениеләре, китапханәләр системасы, музейлар, сәнгать мәктәбе тарафыннан башкарылган эшләргә, матди–техник базасына, кадрлар мәсьәләсенә, халыкны мәдәни чаралар белән тәэмин итүгә, түләүле хезмәтләр күрсәтүнең торышына тукталды.
— 2014 елда Арча районы мәдәният учреждениеләре тарафыннан күп төрле түләүле хезмәтләр күрсәтелде. Түләүле мәдәни хезмәт күрсәтүдән алынган керем матди–техник базаны ныгыту, хезмәткәрләрнең эш хакларына өстәмәләр һәм башкалар өчен тотыла. Агымдагы елда бу юнәлештә эшне тагын да көчәйтү максаты куелды, — диде Рамил Мөхетдинов. — Бүгенге көндә район мәдәният тармагына 137 учреждение — 78 мәдәният йорты һәм клуб, 57 китапханә, 3 филиалы булган музей керә. “Авыл клубларын төзү” республика программасы кысаларында Пөшәңгәрдә күпфункцияле үзәк сафка басты. 2015 елда Иске Иябашта шундый ук бина файдалануга тапшырылачак. Авыл җирлеге ярдәме белән Апаз мәдәният йорты ныклап төзекләндерелде. 2015 ел ныклап төзекләндерү программасына Наласа һәм Иске Чүриле мәдәният йортлары керде. Барлык биналарда агымдагы төзекләндерү эшләре башкарылды.
Мәдәният идарәсе җитәкчесе уңышлы эшләп килгән һәм төрле төбәкара, республика бәйгеләрендә, конференция, семинарларда актив катнашкан мәдәният хезмәткәрләрен аерым билгеләп үтте. Күпләрне кызыксындырган хезмәт хакы темасына да кагылды.
— Мәдәният хезмәткәрләренең хезмәт хаклары артты, ул бүген уртача 14512 сум. Әмма бу уртача хезмәт хакы. Аз алганнар да бар. Чөнки ул хезмәткәрнең белеменә һәм стажына карап билгеләнә. Аннан яхшы эшләгәннәргә кызыксындыру премияләре дә бирелә, — диде идарә җитәкчесе.
Кайбер урыннарда мәдәният учреждениеләре гөрләп тора, ә менә авыл яшьләре шикаятьләренә колак салсаң, кайбер-ләре юньләп ачылмый да. Авыл халкына мәдәни чара булсын һәм шундыйларны уятып та җибәрсен өчен быел һәр авыл мәдәният йорты һәм клубына спектакльләр, концертлар куярга кушылды. Берничәсе Арча Мәдәният йортында да чыгыш ясады инде. Тик район тамашачысына тәкъдим итү өчен яхшы әзерлек кирәк. Тамгалау өчен генә куелган әйберләрне ул кабул итми. Димәк, мәдәният хезмәткәрләренә бөтен белемнәрен һәм тырышлыкларын эшкә җигәргә туры киләчәк. Сикертән мәдәният йорты каршындагы үзешчән драма коллективы, Туфан Миңнуллинның “Гөргери кияүләре”н сәхнәләштереп, Казанда абруйлы жюри әгъзалары алдында чыгыш ясады һәм “Халык коллективы” исеменә лаек булды. Димәк, башкаларга да уйланыр урын бар.
Хисап җыелышында шулай ук 2015 елга бурычлар куелды.
— Мөмкинлекләр җитәрлек, — диде Рамил Мөхетдинов. — Тырышып эшләргә генә кирәк. Хезмәтеңне чын күңелдән яратып башкарсаң, аңа акча алу урыны дип кенә карамасаң, төрледән-төрле кызыклы идеяләр белән янып яшәсәң һәм аларны тормышка ашырсаң, халыкта сәхнәгә карата мәхәббәт тәрбияләп була.
Соңыннан мактаулы хез-мәткәрләргә һәм алдынгы коллективларга бүләкләр тапшырылды.
Гөлсинә ЗӘКИЕВА