Геройлыкка тиң батырлык

Геройлыкка тиң батырлык
Бөек Ватан сугышында Арча районыннан дүрт кешегә Советлар Союзы Герое исеме бирелгән. Әлеге исемгә тәкъдим ителеп тә, ни сәбәпледер бирелми калган берничә якташыбыз бар.
Зиннәтуллин Әсгать Зиннәтулла улы, 1922 елда Носы авылында туган, 1942 елның май аеннан фронтта, укчы рота командиры, капитан. Яу кырында күрсәткән батырлыклары өчен Кызыл Йолдыз һәм II дәрәҗә Ватан сугышы орденнары белән бүләкләнә. 1945 елның 15 маенда аны Советлар Союзы Герое исеменә тәкъдим итәләр. Әмма фронт Хәрби Советы Александр Невский ордены бирергә дигән нәтиҗә ясый. Әлеге орден да зур бүләк, аның белән полководецларны гына бүләкләгәннәр, 65 нче Армия-дә аны 6 кеше генә алган.
Әсгать агага сугыштан исән кайту бәхете тия. Ул мәктәптә физик тәрбия һәм хәрби күнекмәләр укыта. Соңрак трактор, комбайнда эшли, партоешма секретаре була. Хатыны Фәрбизә белән өч ул, бер кыз үстерәләр.
18 февральдә Носы мәктәбендә каһарман якташлары истәлегенә багышлап бик матур кичә үткәрделәр. Әсгать Зиннәтуллинның дүрт баласы да килгән иде. Анда ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов, тыл һәм хәрби хезмәт ветераннары, авыл җирлеге башлыгы Вәзир Сәгыйтов, мәктәп директоры Вәсим Бәдретдинов катнашты. Укучылар башкаруында сугыш башланган көн, авыр югалтулар китергән сугыш чоры күз алдыннан үтте.
Сугыш чоры балалары Маһиәфтаф Усманова, Флера Сафиуллина үзләренең истәлекләрен сөйләделәр. Тылда да бик авыр булган ул елларда.
— Минем әти мал табибы иде, — диде Маһиәфтаф апа. — 1942 елда ул фронтка атлар белән китте. Әни 4 бала белән калды, шул елны бишенчебез туды. Әни иртән сәгать икедә эшкә чыгып китәр иде. Сугышның соңгы елларында аеруча кыен булды. Кычыткан, алабута, урман, сыер безне ачлыктан коткарды. Әти әнигә: “Сыерны бетермә, балалар ачтан үлмәсен”, — дип яза иде. Атлар, сыерлар хәлсезләнеп егыла, алар да ач иде. Бәхетебезгә әти исән кайтты, тора–бара без 12 бала булдык.
Авылдашлары жиңү көнен якынайту өчен үз–үзләрен аямый хезмәт иткәндә Носы егете Әсгать Зиннәтуллин дошманга каршы каһарманнарча сугыша. “Иптәш Зиннәтуллин Ә.З. 1945 елның 18 апреленнән 22 апреленә кадәрге чорда Одер елгасын кичү өчен барган сугышларда зур тәвәккәллек, фидакарьлек үрнәкләре күрсәтте.
Дошманның өермәдәй ут ачуына карамастан, капитан Зиннәтуллин үзенең шәхси кыюлыгы, батырлыгы белән сугышчыларны ярсулы һөҗүмгә рухландырды. Ул үзенең тормышы белән исәпләшеп тормыйча, сугышчыларны, матди өлешне көймәләрдә елга аша чыгарды, шул ук вакытта торак пункт урамнарында дошманга атака ясап, аны алды. Дошман бик нык каршылык күрсәтте, ярсулы контр-атакага ташланды.
Бу сугышларда иптәш Зиннәтуллин командалык иткән рота 110 немецны юк итте һәм 4 станоклы пулеметны, бер танкка каршы пушканы сафтан чыгарды.
Сугышларда күрсәткән батырлыгы һәм кыюлыгы өчен иптәш Зиннәтуллин Ә.З. Советлар Союзы Герое исеме бирелүгә лаек.
238нче укчы полк командиры, гвардияче подполковник Гусейнов.
15 май, 1945 ел.”
— Сезнең авыл өчен ул чын Герой! — диде үзенең чыгышында ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов. — Сез аның белән хаклы рәвештә горурлана аласыз. Патриотлык әти–әнине, сыйныфташларны, укытучыларны, туган якны яратудан башлана. Әсгать Зиннәтуллин нәкъ әнә шундый кеше булган, туган илен дошманнан саклау өчен үз–үзен аямыйча сугышкан, аннан соң да намус белән хезмәт иткән, балалар үстергән, лаеклы алмаш калдырган.
Каһарман якташыбызның балалары Алнур, Ильянур, Марат, Гөлнур шундый матур очрашу оештыручыларга зур рәхмәтләрен җиткерделәр.
Чыннан да, бик мәгънәле, күңел җылысы биреп әзерләнгән кичә булды ул.
Ильяс ФӘТТАХОВ