Диплом тотып — олы юлга

Диплом тотып — олы юлга
Арча агросәнәгать һөнәри көллиятендә чыгарылыш төркем студентларына диплом тапшыру тантанасы булды.
Быел көллиятне, Балтач һәм Усадтагы филиалларында белем алучылар белән санаганда, 181 студент тәмамлады. Алар авыл хуҗалыгында җитештерү остасы, автомеханик, төзелеш эшләре остасы, пешекче–кондитер белгечлекләренә ия булды. Кичәне оештыруда һөнәргә өйрәтү остасы Альбина Әскәрова җитәкчелегендәге чыгарылыш төркеме пешекчеләренең һәм укытучы Илүс Әскәровның тырышлыгы зур булды.
Бәйрәм кичәсендә көллият директоры Алмаз Ибраһимов һәм район мәгариф идарәсе җитәкчесе Зөлфәт Дәүләтбаев дипломга ия булган белгечләргә уңышлар, ак юл теләп, тормыш юлына фатыйхаларын бирделәр.
Чыгарылыш төркем студентлары биредә узган кадерле еллары, биргән белемнәре өчен көллият коллективына, укытучыларына рәхмәтле. Әнә шул рәхмәт хисләрен алар җыр–моңга, дәртле бию ритмына кушып остазларына җиткерде.
Әлбәттә, мондый тантаналы кичәләрдән әти–әниләр дә читтә калмый. Балаларының шатлыгы — аларның да шатлыгы. Шул шатлык хисләрен уртаклашырга килгән әти–әниләр көллият коллективына ихлас рәхмәт сүзләрен, изге теләкләрен җиткерде.
Дипломлы белгечләрне исә, төрле тармакта хезмәт урыннары көтә. Кайберләре инде практика узганда ук эшли башлаган. Кайда гына эшләп, нинди һөнәр ияләре булса да, алар тәүге һөнәр серләренә төшендергән, олы тормыш юлына канат чыгарырга ярдәм иткән Арча агросәнәгать һөнәри көллиятен онытмаслар. Киләчәктә көллият коллективына үзләре белем биргән элеккеге студентларының уңышлары турында ишетеп, “Ул безнең укучы бит!” — дип куанып яшәргә язсын.