Сабыр канатлары сынмаган

Сабыр канатлары сынмаган
Районда Бөек Ватан сугышы һәм тыл ветераннарына “1941–1945 елларда Бөек Ватан сугышында Җиңүгә 70 ел” юбилей медальләре тапшырыла башлады. Алар беренче булып шушы көннәрдә 90 яшьлек юбилейларын билгеләп үтүче Минсәвия Миннуллина белән Әминә Сәйфиева күкрәген бизәде. Минсәвия апа белән Әминә апа өчен бу икеләтә сөенеч булды. Чөнки Арча район башлыгы урынбасары Любовь Осина, аларның өйләренә барып, юбилейлары белән котлады, чәчәк бәйләмнәре, истәлек бүләкләре һәм иң кадерлесе — Россия Президенты Владимир Путинның котлау хатын да тапшырды.
— Үзе килә алмадымени? — диде балаларга гына хас беркатлылык белән Арча станциясендә улы Әнис, килене Миләүшә, оныгы Динә белән яшәүче Минсәвия Миннуллина. — Мин аның йөзенә карарга да оялам инде, күрсәм, (телевизордан) башымны читкә борам. Нәрсә әйтә алам инде мин аңа, ул татарча, мин русча белмим. Фотога чәчәкләр белән дә төшерегез инде, Путин да күрсен.
Орчык кадәрле генә, әмма искиткеч нәфис гәүдәле, җитез хәрәкәтле, әле дә яшьлек чаялыгын югалтмаган бу апаның чын күңелдән, сабыйларча самимилек белән әйткән сүзләре йөзләрдә елмаю уятты. Ни дисең инде күпне күргән, күпне кичергән бу апага! Сугыш чорында ачлы–туклы килеш ир–атлар белән беррәттән Пермь өлкәсендә урман кискән, окоп казыган, соңрак 8 ел Казанда төзелештә, аннан лаеклы ялга чыкканчы колхозда эшләгән ул.
— Аллага шөкер, хәзер мин җәннәттә яшим. Мондый рәхәт тормышны күрү дә насыйп булган икән, — ди ул рәхмәт тулы күзләрен улы Әнискә, аннан килене Миләүшәгә төбәп. — Аның өчен балаларыма рәхмәт.
Миләүшәнең кайнанасына карата булган җылы хисләре йөзенә, күзләренә үк чыккан. Авыру сәбәпле, коляскада утырырга мәҗбүр булган үз әнисен дә янына сыендырган ул. Ходай аңа нык сәламәтлек һәм түземлек бирсен.
Арчада кызы Гөлинә гаиләсендә яшәп ятучы Әминә Сәйфиевага да шушы көннәрдә 90 яшь. Аны котларга балалары, оныклары җыелган. Бар да әниләре, әбиләре турында яратып, хөрмәт итеп сөйли.
— Ул безнең заман әбие. Телевизор яныннан китми, хоккей карый, “Ак Барс” ның иң тугры җанатары, — диләр оныклары көлеп.
Аларга карап Әминә апа да шат елмая. Аның күңеле көр, бүгенге тормышы яхшы, Аллаһы Тәгаләгә шөкерана кылып яши. Ә эчендә ниләр барын үзе генә белә. Ай–һай күп күргән аның башкайлары. Әле дә тыныч кына, күз яшьләрсез искә төшерә алмый.
— 5 сыйныфны тәмамлаганнан соң, 14 яшемнән колхозда эшли башладым мин. Сугыш елларында кичергәннәрем... Эт тә күрмәгәндер андый газапларны. Башта безне Буага (ул тумышы белән Буа районының Яңа Суыксу авылыннан) аэродром ясарга җибәрделәр. Аннан окоп казыдык, Апас районында блиндажлар ясадык. Көрәкләр белән. Аларның сабын әле дә кулларымда тоям сыман, — ди шул чорларны искә төшереп Әминә апа. — Аннан алты кыз, ике хатынны тимер юл төзергә алып киттеләр. Казан ягына. Агач тачка, көрәк белән 12шәр сәгать эшли идек бит. Ашарга кәбестә шулпасы, ипи юк. Безнең белән бергә тимер юлны әсир немецлар да, төрмәдә утыручылар да салды. Әсирләр күпер төзеде.
Әнә шулай ачлы–туклы килеш Свияжск–Ульяновск тимер юлын төзүдә катнаша алар. Аннан Казанда кирпеч заводында эшли, Норлатка килеп үгез, ат җигеп, Албаба стан-циясенә агач ташый, Мари урманында 5 айга якын урман кисә.
— Анда, ичмасам, ипи бирделәр, — ди Әминә апа. — Кирпеч заводыннан ачлыкка түзә алмыйча качып кайттык. Куркытып кире җибәрделәр. Әле дә хәтерлим, окоп казыганда итегем тишелде. Авылга әтигә ямарга биреп җибәрдем. 60 градус салкында (1941 елны шундый салкын булды) бер кат оек белән, шәлдән портянка ясап кияргә мәҗбүр булдым.
Язмыш, диген. Яраткан бәндәсен шулай гел сыный микән бу? Шундый авырлыклар кичерә, әмма сынмый Әминә апа. Гаилә кора, биш бала үстерә. Ике улының үлемен дә кичерергә туры килә анага. Түзә. Сабыр канатлары аңа сынарга ирек бирми.
— Бик тырыш булды безнең әни. 80 яшькә кадәр сыерын да бетермәде ул. Хезмәттән тәм тапты. Шул аңа яшәргә көч бирде, — ди кызлары Гөлинә белән Буадан махсус әнисен котларга килгән Флера.
— Аллага шөкер, бүгенге көнем бик бәхетле, — ди Әминә Сәйфиева. — Бернинди алтын-көмешләр дә кирәкми. Илебез тыныч булсын, үзебезне Ходай сәламәтлектән аермасын.
Сәхифәне Гөлсинә ЗӘКИЕВА әзерләде