Туган җирне саклау — ир–егет эше

Туган җирне саклау — ир–егет эше
Ватанны саклаучылар көнендә Арча үзәгендәге Бөек Ватан сугышында һәлак булганнар истәлегенә төзелгән мемориал янына офицерлар, прапорщиклар җыелды. Мемориалга, Әфганстанда хезмәт иткән ир–егетләр истәлегенә куелган һәйкәлгә, Бөек Ватан сугышы геройлары һәйкәлләренә чәчәкләр салынды. Тантанада район башкарма комитеты җитәкчесе Илшат Нуриев катнашты.
— Ватанны саклаучылар көне ир–атларга гына түгел, хатын–кызларга да кагыла, — дип сөйләде Илшат Нуриев. — Туган җир әти–әнидән, гаиләдән, туган нигездән башлана… Туган җирне саклау — ир–егетләрнең изге бурычы.
Ватандашларын искә алырга килгән офицерлар, прапорщиклар белән туган илне саклау, армия турында сөйләшәбез. Шушмабаштан килгән өлкән прапорщик Нуретдин Җәләев:
— Егетләргә армиядә хезмәт итүдән курыкмаска кирәк, — дип сөйләде. — Үзем Үгез–Елгадан. Владивостокта диңгез флотында армия хезмәтен үттем. Ике ел хезмәт иткәннән соң, үзем теләп, тагын ике елга калдым. Авылга кайттым. Тракторга утырдым. Әмма мин, хәрби хезмәттән башка яши алмавымны аңлап, Казанга чыгып киттем. Мәскәүдә прапорщиклыкка укып кайтып, Казанда кече авиация белгечләрен әзерләүче мәктәптә эшләдем. Хезмәтемне яратып башкардым. Iнче һәм IIнче дәрәҗәдәге “Аерата хәрби хезмәт күрсәткән өчен” медале белән бүләкләндем. Бу минем бүләкләрнең иң зурысы. Әле мин мәктәптә дә балаларны ватанпәрвәрлек рухында тәрбияләргә ярдәм итәм.
— Архангельск, Воркута, Печорада хезмәт иттем, — дип сөйли Яңа Иябаштан отставкадагы майор Хатиф Әхмәров. — 23 февраль, 9 май безнең өчен зур бәйрәм. Хәрби киемнәрдән без бу бәйрәмнәрне билгеләп үтмичә калган юк.
Хатиф Тәлгатовичның туганы Арчада яшәүче майор Илгиз Таһиров Казахстанда, Украинада, Чехословакиядә хезмәт иткән офицер. Алар икесе дә, егетләр өчен 1 ел армия хезмәте аз, дип саный.
— Төзүчеләр институтын тәмамладым. Свердловск өлкәсендә төзелеш частендә хезмәт иттем, — дип сөйли Олы Мәңгәрдән подполковник Айдар Шәйхетдинов (хәзер Арчада яши). — Армиядә, үз теләкләре белән барып, заманча техника белән идарә итә алырлык профессионаллар хезмәт итәргә тиеш.
Субаш Атыдан подполковник Булат Нуриәхмәтов:
— Минем әти белән әни Утар Атыда укыткан укытучылар Дания белән Мәгъсүм Нуриәхмәтовлар, — дип сөйли. — Ленинградта укыганнан соң, Байконурда ракеталарны җибәреп торучы часть командиры урынбасары булып хезмәт иттем. Бүген Коркачык кирпеч заводында ремонт хезмәте җитәкчесе булып эшлим. Хәзер армиядә солдатлар хуҗалык эшләреннән азат ителде, шунлыктан алар бер ел эчендә күп нәрсәгә өйрәнергә мөмкин. Элек армиягә алмый торсалар, егетләр хәрби комиссариат ишегалдын таптап, абый мине алыгыз инде диеп, елый–елый китәләр иде.
… Бүгенге солдатлар арасында да үзләре теләп армиягә китүчеләр, хәрби хезмәтне намус белән үтүчеләр күп. Алар: Арчадан Хәмзә Фазылов, Артур Шалканов, Иске Масрадан Раил Әсхәтов, Азат Зарипов, Симетбаштан Айваз Әхмәдуллин, Казаклардан Салават Галиәхмәтов, Шушмабаштан Камил Клецов, Төбәк–Чокырчадан Виктор Урматский, Яңа Кенәрдән Фәнил Шакирҗанов, Түбән Орыдан Рамил Яруллин һ.б.
Румия НАДРШИНА