Күңелләрендә “Аҗаган” балкышы

Күңелләрендә “Аҗаган” балкышы
Илүзә Зарипова белән без район күләмендә узган “Аҗаган” уеннары вакытында аралаштык. Сеҗе мәктәбенең 7 сыйныфында укучы кызның егетләр өчен мөһим булган уеннарда катнашуы берникадәр гаҗәпләндерү дә тудырды. Илүзә генә түгел, бөтен команда составында кызлар бар, хәтта капитаннары кызлар булганнары да.
Тренерлар әйтүенчә, алар бу уеннарга атлыгып тора икән. “Мондый уеннар күпкырлы, төрле, үзенчәлекле булуы белән кызык, —ди Илүзә. — Без укытучыбыз Фәрит Нәгыймов белән көн саен кич шөгыльләндек, барлык төр уеннарга да әзерләде ул”. Алар командасында 2 кыз, 6 егетне спорт ярышларында актив катнашуларына карап туплаганнар.
“Аҗаган”ның район күләмендәгесе Арчаның 7нче мәктәбе базасында узды. Аңа кадәр зоналарда уйналып, 32 команда арасыннан сайлап алынган иң булганнары — Арчаның 1нче, 7нче, Сеҗе, Шушмабаш, Яңа Кенәр һәм Яңа Кырлай мәктәпләре командалары, финалга чыгып, биредә ярышты.
“Мондый уеннар ярдәмендә сезгә үзегезне сынау мөмкинлеге бар. Белемле булу, армиягә ныклы әзерлек белән бару өчен хәрби әзерлек бик кирәк. Моннан тыш сезгә яхшы укырга, спортны яратырга, чит телләр дә өйрәнергә кирәк”, — дип уңышлар теләп, “Аҗаган” уеннарын район башкарма комитеты җитәкчесе Илшат Нуриев ачып җибәрде. Аннан укучыларны “Сугышчан туганлык” җәмәгать оешмасы җитәкчесе Сергей Баһаветдинов һәм район мәгариф идарәсе җитәкчесе Зөлфәт Дәүләтбаев, 7нче мәктәп директоры Альмира Гатауллина котлады.
Дистә еллар элек шаулап уза торган “Аҗаган”ның мәктәпләргә кабат кайтуы күңелле күренеш. Чөнки никадәр буын шуның белән тәрбияләнеп, патриотлык хисен һәрдаим тоеп, сугыш афәтләренең булмавын теләп үсте. Шактый еллар тукталып торган уеннарны кабат яңарту яшь буынга тарихны белү, хәрби уеннарның асылына төшенү өчен дә мөһим. Әнә, 7нче мәктәпнең хәрби әзерлек укытучысы Илшат Кәримуллин да: “Балаларда хәрби–патриотлык, җаваплылык хисе тәрбияләү, егетләргә чын ир–атта булырга тиешле сыйфатларны булдыру өчен бик кирәк мондый уеннар”, — ди бит.
Әле 7 сыйныфта гына укыса да, Шушмабаш мәктәбе укучысы Алимас Кәримов та шушы фикердә. “Аҗаган” безне физик яктан әзерлекле булырга, тормышның төрле хәлләрендә югалып калмаска өйрәтә”, — ди ул. Алимас мәктәптә спортның барлык төре белән шөгыльләнергә вакыт таба икән: көрәш, хоккей, футбол, баскетбол дисеңме... Хоккей белән республика дәрә-җәсендәге бәйгеләрдә катнашалар. “Аҗаган”ның зона ярышларында командалар күп булгангамы, уеннарны башкару авыррак булды, бүген монда күпкә яхшырак, бәлки көчле командалар җыелгангадыр. Барыбыз да җиңүгә омтыла бит”, — ди Алимас. Аңа мондый төр уеннар ят түгел, чөнки мәктәптә узган уеннарда 5 сыйныфтан башлап катнаша икән.
“Гранаталар” оча, чын мылтыктан төзәп аталар, каршылык полосаларын үткәндә шуышып та, сикереп тә барырга туры килә. Биремнәрне хаталарсыз башкара алсалар, йөзләрендә нур балкый. Ни генә булса да, чиксез шат үзләре. Мәктәп өчен тырышалар бит. Район дәрәҗәсендәге “Аҗаган”да катнашу ул уен түгел. Туган мәктәбеңнең данын яклап район ярышларында катнашу — патриотлыкның бер тармагы.
Розалия
ЗИННӘТОВА