Солдат Хәмзә

Солдат Хәмзә
Татарстан Республикасы хәрби комиссариатының Арча һәм Әтнә районнары буенча бүлек җитәкчесе Алмаз Борһанов:
— Армиядә солдат хезмәте үткән Хәмзә Фазылов турында язсагыз әйбәт булыр иде, — дип киңәш итте. — Мондый тырыш, намуслы егетне тәрбияләп үстергән әти–әнисе Лилия белән Ринат Фазыловларга бик зур рәхмәт. Мәктәпнең, районның да өлеше бар монда.

Хәмзә Фазылов Саратовта хезмәт итә. Арчаның 1нче мәктәбен тәмамлаган. Беренче укытучысы Валентина Осиповадан:
— Хәтерлисезме Хәмзә Фазыловны? — дип сорыйм.
— Ничек хәтерләмисең инде Хәмзәне! — дип күтәреп алды укытучысы. — Яхшы хәтерлим. Ул елны 1нче сыйныфка 6 яшьлекләр керде. Хәмзә иң арткы партада “Сайрый гармун...” дип җырлап утырыр иде. Ә ничек алдырып китте ул?! Рус телен шундый яхшы итеп өйрәнде, 4–5кә генә укыды.
Укучысының армиядә Мактау грамотасы алып, әйбәт хезмәт итүенә укытучысы да сөенде.
Арча үзәкләштерелгән китапханәләр системасы җитәкчесе Лилия Фазылова улы турында яратып, сагынып, горурланып сөйли.
— Балаларның өчесе дә малайлар безнең. Өченчесе Хәмзә үзенә бертөрле, кызыксынучан бала. Кечкенәдән бию түгәрәгенә йөрде. Күпмедер шөгыль-ләнгәннән соң, мин хәзер биергә өйрәндем инде, дип туктады. Сәнгать мәктә-бенә баянга язылды. Баянда уйнарга өйрәндем, дип анда да озак тоткарланмады. Агачны чукып төрле әйберләр ясый торган түгәрәккә дә йөреп алды — кул эшенә өйрәнде. Менә шундый күпкырлы егет булып чыкты ул безнең. Мәктәпне тәмамлагач, авыл хуҗалыгы институтына керерсең инде, дибез. Юк, мин пешекче–технолог булам диде һәм Казанга аш–су осталары әзер-ләүче көллияткә укырга керде. Дуслары күп. Дуслыкны, дөреслекне бәяли торган тәртипле, йомшак күңелле, гап–гади малай инде ул безнең.
Хәмзә район Мәдәният йортында үткәрелгән “Армиягә алынучылар көне” кичәсеннән бик тәэсирләнеп кайта. Егетләргә армия хезмәтен үтәргә кирәк, дигән фикердә була ул. Аның бу фикере тагы да ныгый төшә. Көллияттәге укуын өзеп, кайткач дәвам итәрмен дип, армиягә китеп бара. Ул анда автомобиль взводында машина йөртә. Декабрьдә Фазыловлар гаиләсенә хәрби часть командиры, полковник А. Чистяковтан Рәхмәт хаты килеп төшә. Анда мондый юллар бар: “Беренче көннән үк улыгыз үзен намуслы, тәртипле, хезмәт сөючән, тыйнак солдат итеп танытты. Хәмзә менә дигән иптәш.” 23 февраль алдыннан Хәмзә хәрби частьның Мактау грамотасы белән бүләкләнә. Армиядә хез-мәт итүче солдатларга туган ягыннан район башкарма комитеты җитәкчесе Илшат Нуриевтан котлау хатлары килүе дә егетләрнең, шул исәптән Хәмзәнең дә, күңелен күтәреп җибәрә. Фазыловлар гаиләсе дә башка солдатларның әти–әниләре кебек Илшат Нуриевтан котлау хаты ала.
Бүген Хәмзә иптәшләре белән Мәскәүдә 9 майда үтәсе парадка әзерләнә. Егеткә без армиядән исән–сау әйләнеп кайтуын һәм алдагы көнендә уңышлар телибез.
Румия САТТАРОВА