Батырлыкка мәдхия

Батырлыкка мәдхия
Апаз мәдәният йортында шушы авыл җирлеге территориясендә яшәүче сугыш һәм тыл ветераннарына “1941–1945 елларда Бөек Ватан сугышында Җиңүгә 70 ел” юбилей медальләре тапшыру тантанасы узды. Олы дәүләт бүләген ветераннар якташлары, район җитәкчесе Илшат Нуриев кулыннан алды.
— Мин ант иттем
җанны кызганмаска,
Саклар өчен халкым,
илемне.
Йөзәү булса гомрең,
син барсын да
Шушы юлга
бирмәс идеңме?
Каһарман шагыйрь Муса Җәлилнең бу сүзләре бүген залда утырган барлык ветераннарга да атап язылган кебек. Сез фронтта һәм тылда тиңдәшсез батырлыгыгыз белән Ватанны саклап калдыгыз. Сезнең алда баш иеп, олы рәхмәтебезне белдерәбез. Сау–сәламәт, балаларыгыз һәм оныкларыгызның игелеген күреп, бәхетле гомер кичерүегезне телибез, — диде ул. Һәр ветеранга бүләк тапшырганда Илшат Габделфәртович ихластан матур теләкләр теләде, һәрберсе турында җылы сүзләр әйтеп күңелен күтәрде.
Апаз авыл җирлеге башлыгы Ренат Садыйков һәм “Ватан” хуҗалыгы җитәкчесе Мансур Әхмәтов та, ветераннарны бәйрәм белән котлап, матур теләкләрен җиткерделәр.
Бу көнне сәхнәдән агылган җыр–моңнар да өлкәннәрне ялкынлы яшьлекләренә алып кайткандай булды. Ә Пөшәңгәр мәктәбе колллективы иҗат иткән “Язмышларда әрем ачысы” исемле театральләштерелгән күренеш дәһшәтле сугыш елларын бөтен ачы хакыйкате белән күз алдына китерде. Аны залда утырган олысы да, кечесе дә күз яшьләре белән карады. Бу сугышның халкыбыз өчен нинди фаҗига булганын яшьләр күңеленә тирән уелып калырлык итеп күрсәтә алды үзешчән артистлар.
Соңыннан ветераннар истәлеккә фотога төштеләр, “Ватан” хуҗалыгы әзерләгән табын артын- да хатирәләре белән уртаклаштылар, сый–хөрмәт күрсәтүләре өчен рәхмәтләрен җиткерделәр.
Исрафил
НАСЫЙБУЛЛИН