Балалар — аларның дөньясы

Балалар — аларның дөньясы
Узган атнада Арчаның 2нче мәктәбе базасында район балалар бакчаларының 7 тәрбиячесе, “Ел тәрбиячесе — 2015” бәйгесенең район этабында үзләренең эш алымнарына, тәҗрибәләренә нигезләнеп, көч сынашты.
Чыгыш ясаган һәр тәрбияче 1 урынга лаек булырлык иде һәм алар һәммәсе төрле номинациядә җиңүче. Призчылар — Арчаның 2нче балалар бакчасы тәрбиячесе Гүзәлия Медникова һәм 10нчы балалар бакчасы тәрбиячесе Фәния Гыйззәтуллина. Алар хакында аерым тукталасым килде. Хезмәттәшебез Румия Надршинаның балалары Фәния Данил кызы төркеменә йөргәнлектән, без аның үз эшенә ихластан бирелгән тәрбияче булуын еш ишетәбез. “Балаларымның аңарда тәрбияләнүенә сөенеп бетә алмыйм, — ди ул. — Балалар белән өйдә шөгыльләнгәнем юк, алар бакчадан бар нәрсәгә өйрәнеп, аң–белемле булып үсә. Бик хөрмәт итәм Фәния Данил кызын. Балаларга таләпчән дә, кирәк чакта усал да, әмма балаларны санлата белә. Аның активлыгы! Спортта да, сәхнәдә дә ул, бар җиргә өлгерә”. Хезмәттәшләре дә Фәния Гыйззәтуллинаның тырышлыгын, булганлыгын мактап туя алмый.
Гүзәлия Медникова белән тәүге тапкыр бакчадагы бер бәйрәм чарасында очрашкан идем. Аның дөньясы балалар арасында икәнлегенә инандым шул чакта. Нәниләрнең күңелен аңлап, алар белән бергә шатланып, сабыйларның борчулы халәтендә алар белән бергә кайгырып, күңелен аңлап эшли ул. Җитди итеп сөйләшә башлаган тәрбияче күпмедер вакыттан үзен шулар яшендә кебек хис итеп, тавышына сабыйлар төсмере чыгарып, аларча фикерләп сөйләшә башлый. Хәтта аермаслык та: ул тавышның кайсысы баланыкы да, кайсысы Гүзәлиянеке? Ә аның бәйрәмнәрне яратуы! Һәр бәйрәмне көтеп алып, балаларны да алдан күңелләре белән шул бәйрәм хисенә тутырып, канатланып йөри башлый. Тыңлаусыз балалар да “ә” дигәнче шигырен өйрәнә, чыгыш ясыйсы көннәрен зарыгып көтә башлый.
“Мин Гүзәлия Зиннәтулловнаны яратам. Аның белән безгә бик кызык. Ул әйбәт күңелле, мәрхәмәтле, гел яңа уеннар уйната, без бик күп белмәгән әйберләрне өйрәнәбез”, — ди һәр көнне Зур Бирәзәдән үк бакчага ашкынып баручы Рузинә Гыйльметдинова.
Алинә Ясәвиеваның кызы Чулпанның тәрбиячесе дә Гүзәлия ханым. “Ул балалар өчен нишләргә белми һәм, әлбәттә, балалар да үзен бик ярата. Гел яңалык эзләнүдә булганлыктан, уздырган бәйрәмнәре дә беркайчан бер–берсен кабатламый. Моңарчы минем аның кебек тәрбиячене күргәнем юк иде әле (олы кызым да бакчага йөрде). Балалар бакчага шулкадәр ашкынып бара. Гүзәлия Медникова тәртип, төгәллек ярата, аңа бөтен нәрсә идеаль булырга тиеш һәм балалардан гына түгел, әти–әниләрдән дә шуны таләп итә”, — ди Алинә.
Балалар белән сабыйларны ихластан яратучы, алар өчен бар җылысын бирә алучылар гына эшли аладыр. Төркемдәге өч дистәгә якын баланы күзәтеп кенә түгел, аларны тигез дәрәҗәдә аң–белемгә тарту, бәйрәмнәрдә чыгышлар әзерләү өчен тәрбияче никадәрле көчен, сабырлыгын, күңел яктылыгын сарыф итә икән?! Әле әти–әниләргә дә, җитәкчелеккә дә ихтирамлы булып, гаиләңне дә кайгыртып яшәргә кирәк бит.
Җиңү яулаган тәрбиячеләргә Аллаһы Тәгалә тумыштан балалар күңелен тирәнтен аңлау сәләтен, балаларны чиксез ярату хисләрен мулдан бирә, күрәсең. Тәрбиячеләрнең барысы да бик тырышып, бар күңелләрен салып, зур җаваплылык тоеп башкарса да, алар сыман фанатларча эшләүчеләр санаулы гынадыр.
18 мартта җиңүчеләр Балтачка зона бәйгесенә барачак. Анда да гүзәл затларыбыз үзләренең булганлыкларын күрсәтер, алдынгы урыннарны читләргә җибәрмәсләр дип ышана күңел.
Розалия ЗИННӘТОВА