Бергәләп көрәшкәндә генә җиңәрбез

Бергәләп көрәшкәндә генә җиңәрбез
Белгечләр илебез икътисады үсешен тоткарлаучы төп сәбәпләрнең берсе буларак коррупция, ришвәтчелекне атый. Бүгенге шартларда аның белән көрәш аеруча зур яңгыраш ала. Шушы уңайдан без райондагы хәлгә ачыклык кертү өчен район башкарма комитеты җитәкчесе, районның коррупциягә каршы тору комиссиясе рәисе Илшат НУРИЕВКА мөрәҗәгать иттек.
— Илшат Габделфәртович, билгеле булганча, проблеманы хәл итү аны барлыкка китерүче сәбәпләрне юкка чыгарудан башланырга тиеш. Бу җәһәттән нинди чаралар күрелә?
— Дөрестән дә, коррупция, ришвәтчелек белән нәтиҗәле көрәшү өчен аларны тудырган шартларны ачыкларга, сәбәпләрен бетерергә кирәк. Шуны күздә тотып, 2011 елдан районда коррупциягә каршы тору комиссиясе эшләп килә. Комиссиянең эшен җанландырырга кирәк, дип саныйм. Район тормышына кагылган барлык муниципаль актлар да гражданнар игътибарына җиткерелергә тиеш. Муниципаль һәм дәүләт хакимияте органнарының вазифаи затлары үз карарлары өчен халык алдында җаваплылык тоярга бурычлы.
Шушы уңайдан агымдагы елда комиссия утырышларында мәдәният һәм мәгариф өлкәсендә, шул исәптән өстәмә һәм мәктәпкәчә белем бирү учреждениеләрендә күрсәтелүче хезмәтләрнең сыйфатын яхшырту, медицина хезмәте күрсәтү, торак–коммуналь хезмәтләрнең үзвакытында һәм сыйфатлы булуы мәсьәләләре каралачак.
Мәгариф, мәдәният һәм спорт өлкәсендә коррупциягә каршы нәтиҗәле чаралар күрү, шул исәптән муниципаль мәгариф учреждениеләрендә бюджет һәм башка чыгымнарның максатчан кулланылуын тикшерү өчен комиссиядә финанс–бюджет палатасы, контроль–хисап палатасы рәисләре, муниципаль учреждение җитәкчеләре, халыкка сыйфатлы адми- нистратив хезмәт күрсәтү белән бәйле башкарма комитетның вазифаи затлары чыгышларын тыңлау планлаштырыла.
Комиссия утырышлары көн тәртибенә “Арча Арена” Боз сарае һәм “Арча” спорткомплексында билетлар сатуны тикшерү, муниципаль һәм дәүләт ихтыяҗлары өчен товарлар сатып–алуда, хезмәт күрсәтүдә, эшләр башкаруда ачыклыкны тәэмин итү, балалар бакчаларына азык–төлек товарлары алу тәртибен, торак һәм сәүдә объектлары төзү өчен җир участоклары биргәндә җир турындагы законнарның үтәлүен тикшерү мәсьәләләрен кертүне планлаштырабыз.
Комиссия эшен тагын да яхшырту, эш барышын даими халыкка җиткереп бару өчен утырышларга Иҗтимагый совет, ветераннар һәм профсоюз оешмалары, массакүләм мәгълүмат чаралары вәкилләрен дә активрак җәлеп итәргә кирәк.
Кайвакыт районда тиешле шартлар тудырылмау халыкны килеп туган проблемаларны законнарны әйләнеп үтү юлы белән чишүгә этәрә. Мәсәлән, Арча үзәк хастаханәсендә судмедэксперт штаты булмау район халкы өчен төрле проблемалар тудыра. Болай да тормыш фаҗигасенә тап булган кешеләрнең, суд–медицина документлары артыннан зур чыгымнар түгеп, күрше районнарга йөрүен һич тә аклап булмый. Без бу проблеманы хәл итү юлларын эзлибез. Район хастаханәсе базасында 2015 елда махсус модульле бүлек булдыруны республика программасына кертү буенча ТР Сәламәтлек саклау министрлыгы белән эш башладык.
Муниципаль хезмәткәрләргә 2014 ел өчен керемнәр, чыгымнар, милек һәм милек характерындагы йөкләмәләр турында мәгълүмат тапшыру вакыты якынлаша. Узган елгы мәгълүматларны анализлаганнан соң райондагы кайбер җитәкчеләрнең мәгълү-матларны дөрес һәм тулы итеп тутырмавы ачыкланды. Мондый хокук бозуларны кисәтү максатында коррупциягә каршы тору комиссиясе утырышында мәгълүмат тапшыру вакыты җиткәнче салым органнары, банклар, Татарстан Республикасы буенча дәүләт теркәве, кадастр һәм картография Федераль хезмәте идарәсенең Арча бүлеге, район прокуратурасы вәкилләрен чакырып, укулар оештыру турында карар кабул ителде.
Районда хәл ителәсе мәсьәләләр әле бик күп. Шуңа күрә мин райондашларымның да активрак булуын сорар идем. Комиссиянең эшчәнлеген тагын да җанландыру өчен халыктан кергән мәгълүматны, шикаятьләрне кабул итүне дә җайга салырга кирәк. Хәзерге вакытта комиссиянең “кайнар” телефон номеры (3–13–23) район сайтында һәм район газетасында бирелеп барыла. Моннан тыш, район башкарма комитеты һәм җирле үзида-рә органнарында “ышаныч тартмалары” да куелган. Һәркем районда коррупция яки ришвәт алу фактлары турында безгә хәбәр итә ала. Җәмгыятебез үсешен тоткарлап килүче бу чирдән бергәләп көрәшкәндә генә котылып булуын һәрберебез аңласын иде.
Исрафил НАСЫЙБУЛЛИН