Фәнис шәфкатьле кешеләр ярдәменә мохтаҗ

Фәнис шәфкатьле кешеләр ярдәменә мохтаҗ
Кайчак ишеткән, күргәннәрне барлыйсаң да, кеше гомеренең кыл өстендә генә торуын аңлыйсың. Борчу–хәсрәтләр башкалар капкасын гына кага, мине читләтеп үтә, дип һич әйтерлек түгел. Алар синең кем һәм ничә яшьтә булуыңны да сорап тормый.
Үзем Арча станциясендә яшәүче Фәнис Сабирҗанов белән сөйләшеп утырам, үзем шул хакта уйлыйм. Ана буларак, хәсрәтеннән кая керергә урын таба алмыйча, телефон төбеннән китмәгән, әле бер, әле икенче җирдән ярдәм эзләгән Рәшидә апаның да хәлен аңлыйм. 42 яшендәге тап–таза, карап торырдай чибәр улың, оныкларыңның атасы тик торганда дөм сукыр калсын әле. Нинди генә ананың бу хәлгә үзәге өзелмәсен дә, йөрәге авыртмасын.
Беренче мәктәпне тәмамлаганнан соң Фәнис һөнәри училищеда белем ала, юл оешмасында, район мәгариф системасында (башта алтынчы мәктәптә хуҗалык эшләре буенча директор урынбасары, соңгы 3 елда икенче мәктәптә оператор) эшли.
— Узган ел 26 майда эшкә барганда юлда ике күзем дә күрми башлады. Өйгә кайтарып куйдылар, — ди Фәнис. — Шуннан бирле күзләрем сукыр, бөтен җир ап-ак. Яктылыкка гына бераз реакция бар. Кайларга гына бармадык, Мәскәүдә дә, Чабаксарда да булдык. Файдасыз. Күзнең челтәрле катлавы начарланган (пигментная дегенерация сетчатки), безнең медицина көчсез, диделәр. Нәрсәдән килеп чыкканын аңлата алмадылар. Интернет аша Германия, Австрия белән элемтәгә кердек, алар да бу юнәлештә эшләми икән. Кытайда дәвалап була, әмма ул 4 миллионга төшәчәк. Татар конгрессында эшләүче Закирә Зиннурова (аны әни эзләп тапты) Израиль белән элемтәгә керергә ярдәм итте. “Никадәр тизрәк килсәгез, шуның кадәр яхшырак булачак”, — диделәр. Ә анда бару өчен миллион ярым акча кирәк.
Бу беренче группа инвалид Фәнис Сабирҗанов өчен көч җитә алмаслык зур сумма.
— Гөрләтеп яшәр чагы бит әле улымның. Дәвалап булуын да белгәч, йөрәк бигрәк тә авырта. Нишләп болай бөтен нәрсә, хәтта кешенең тормышы да шул акчага килеп терәлә икән? — ди ачыргаланып Рәшидә апа. — Ил төкерсә, күл була, диләр. Кешеләр, ярдәм итик улыма.
Шәфкатьле затлар аз түгел безнең арада. Рузалия һәм Фидарис Мортазиннар, Арча Мәдәният йортында хәйрия концерты куеп, аннан килгән акчаны Фәнискә тапшырырга булганнар.
Гөлсинә ЗӘКИЕВА