8 март яз сулышы алып килә

8 март яз сулышы алып килә
Арча сәнгать мәктәбендә 8 март уңаеннан хатын–кызларга багышланган бәйрәм булды. Очрашуда район башкарма комитеты җитәкчесе Илшат Нуриев катнашты. Илшат Габделфәртович хатын–кызларны бәйрәм белән котлады, сәламәтлек, тигезлек, гаилә һәм балалар бәхете теләде.
Сәхнәгә бер–бер артлы күп балалы гаиләләр чыкты. Илшат Нуриев Казанбаштан Фәрия Алмиева, Арчадан Венера Гапдерәхимова, Югары Пошалымнан Фәния Зиатдинова, Шурабаштан Галина Уразаевага “Ана даны” медале тапшырды. Әлеге гаиләләрнең һәрберсендә 5әр бала. Балалар бәхете белән яшәргә насыйп булсын аларга.
Күптән түгел Лаеш районында үткән “Ел хатын–кызы. Ел ир–аты: хатын–кыз карашыннан” дигән республиканың зона конкурсында җиңгән Арча педагогика көллиятенең музыка укытучысы Флера Шакирова, Арча 1нче мәктәбенең рус теле һәм әдәбияты укытучысы Диләрә Гапделбәрова сәхнәгә рәхим итте. Илшат Нуриев аларга Рәхмәт хаты тапшырды. Флера Мәсхутовна һәм Диләрә Мәгъсумовна залда утырган хатын–кызларыбыз алдында бик матур итеп чыгыш ясадылар. Флера ханымның әнисе Рая апа Фәтхуллина сугышта һәлак булган әтиләрен сагынып гомер кичергән ятимнәр исеменнән мөнәҗәт укыды: “Язлар ераклашкан саен сагынулар арта...” Үзенең дә әтисе сугыш корбаны булган аның. Өч кыз туганның (Флера, Гөлүсә, Альфира) җырлавы менә дигән бүләк булды! Улы Салават кына катнаша алмады. Ул Мәскәүдә тарих буенча олимпиадада икән.
Диләрә Гапделбәрованың иптәше Рөстәм (көрәшче), улы Инсаф (шулай ук көрәшче) һәм кечкенә улы Ранель белән акробат номерларын күрсәтүен тамашачы кайнар алкышларга күмде.
Республика Хәрби комиссариатының Арча һәм Әтнә районнары буенча бүлек җитәкчесе Алмаз Борһанов хатын–кызларны бәйрәм белән котлады, хәрби частьтан килгән Рәхмәт хатларын Шурадан Фәрдия Абдуллина (улы Айдар) һәм Гөлсинә Саттаровага (улы Илшат) тапшырды.
“Арча хәбәрләре” газетасы баш мөхәррире Исрафил Насыйбуллин, “ТАТМЕДИА” акционерлык җәмгыятенең газета–журналларына күпләп язылган әбүнәчеләр Кышкардан Гөлфия Фазылҗанова, Арчадан Ләйсән Вәлиева, Мөндештән Илмира Гыйбадуллина, Түбән Атыдан Зөлфия Хәмидуллина, Яңа Кенәрдән Гөлнур Сәфәргалиева, Субаш Атыдан Гөлгенә Вафина, Яңа Кырлайдан Миләүшә Зариповага рәхмәт әйтеп, бәйрәм белән котлап, бүләкләр (канцтоварлар һәм китаплар) тапшырды.
— 2015 елның беренче яртыеллыгы өчен “ТАТМЕДИА” акционерлык җәмгыяте “iPad за подписку” конкурсына йомгак ясады, — дип сөйләде Исрафил Рәхмәтуллович. — Төп призны (iPad) Актаныш районы Иске Байсар авылыннан Ринат Ямиев алды. Ул 5449,58 сумлык “ТАТМЕДИА” акционерлык җәмгыятенең газета–журналларына язылган. Өч әбүнәче кыйммәтле фотоаппаратлар белән бүләкләнде. “ТАТМЕДИА” акционерлык җәмгыятенә квитанция-ләрен җибәргән 50 актив әбүнәчегә кызыксындыру призлары тапшырылды.
“ТАТМЕДИА” акционерлык җәмгыятенең газета–журналларына язылу буенча бәйгеләр киләчәктә дә узачак. Барыгызны да актив катнашырга чакырабыз (тулырак www.tatmedia.ru сайтында).
— Барысы 2500 сумлык газета–журналга язылдык, — дип сөйли Субаш Атыдан Гөлгенә Вафина. — “Арча хәбәрләре”, “Сабантуй” һ.б. Яңалыкларның өйгә килеп торуы үзе бер могҗиза бит ул!
— “ТАТМЕДИА” призын икенче тапкыр алам инде мин, — ди Кышкардан Гөлфия Фазылҗанова. — Быел да киләсе яртыеллыкка ташламалы шартларда матбугатка язылып куйдык. Без аларны район, республика яңалыкларын белеп тору өчен алабыз. Укытучы буларак мин аларны эшемдә дә кулланам.
Бәйрәмдә гүзәл затларыбызны котлаулар, җыр, бию-ләр күп булды. Сәхнәдә районда һәрдаим иганәчелек ярдәме күрсәтүче “Металл” ширкәте җитәкчесе Лилия Гарәфиева да хөрмәтләп үтелде.
Район хатын–кызлар советын җитәкләгән Фрадия Шәймуллина һәрвакыттагыча эчтәлекле чыгыш ясады. Ул үзенең әлеге җаваплы вазыйфасын Арчаның 7нче мәктәп директоры Альмира Гатауллинага тапшырды.
Румия НАДРШИНА