Куллана белсәң

Куллана белсәң
Бөтен җирдә ягулык бәяләре арта, дип уфтаналар, ә менә “Кырлай” ширкәтендә ул кими. Кеше ышанмаслык хәлне чын булса да сөйләмә, диләр, әмма бу очракта сөйләми булмас.
“Агросервис” ширкәтенә караган “Кырлай” һәм “Игенче” хуҗалыкларында рапсны күпләп игәләр. Әлеге культура керә башлаган елларда барлык колхозлар да чәчә һәм ярыйсы гына уңыш та алалар иде. Орлыгы да кыйммәт, яшел азык буларак та бик файдалы. Ә менә “Кырлай” ширкәтендә аның маен да ала башладылар. Хәзерге вакытта 100 тонналап җыелган май бар. Быел менә шуны ягулык итеп файдалана башлаганнар. Көннәр салкын вакытта 30 литр дизель ягулыгына 10 литр исәбеннән кушып, ике тракторда сынап караганнар. Тимер атларның куәте арткан кебек тә булган әле, фильтрлар да тыгылмаган.
Бераздан башка тракторчылар да: “Аларга ярый, ник безгә ярамый?” — дия башлаганнар. Менә бер айлап инде барлык тракторлар да шундый ягулыкка күчкән. Көннәр җылынгач, майны күбрәк кушачаклар.
Әлеге хуҗалыкта һәр нәрсәгә сакчыл карарга омтылалар. Барлык фермаларда да мичләргә утын ягалар. Ә утын бездә аяк астында аунап ята.
Иске Иябаш фермасында терлекләр кардада. Маллар март кояшы җылысында рәхәтләнә.
— Барлык фермаларда да суны җылытып эчерәбез, — ди ширкәт җитәкчесе Илшат Шакирҗанов. — Кардаларда да электр җылыткычлары куелган.
— Белгечләр суны җылытып бирү сөтне бер литрга арттыра дип әйтә, — диде район авыл хуҗалыгы һәм азык–төлек идарәсе җитәкчесе Айдар Габбасов. — Салкын су эчерткәндә организм аны җылыту өчен күпме энергия сарыф итәргә тиеш бит.
Бу хуҗалыкта бар да әнә шулай уйланылган, көйләнгән. Үзләрендә катнаш азык ясау цехы бар. Рапс мае ясаганда калган түп тә азыкка кушыла.
Иске Кырлай фермасы савымчылары Мөнирә Хурамшина, Гөлсинә Зарипова, Гөлүсә Сафиуллина, Зөбәрҗәт Әхмәтҗанова, Чулпания Әхмәдиева, Яңа Кырлай фермасыннан Гөлнара Вафина, Алия Сабирова, Фирая Гатиятуллина, Иске Кырлай фермасында бозау караучылар Гөлфия Галимова, Радилә Гарифуллина, Ризәлә Әхмәтшина, лаборант Суфия Хәбибуллина тырыш хезмәтләре өчен макталалар.
Бәйрәм алдыннан һәр ферма коллективы белән чәй өстәле артында хөрмәтләү оештырылган.
“Арча” ширкәтенең яңа җитәкчелеге дә кешеләргә игътибарлыгы белән аерылып тора, терлекче хатын–кызларны бәйрәм белән җылы итеп котладылар. “Агросинтез” ширкәте җитәкчесе Рашат Сәгъдуллин авылның үз кешеләре белән эшләргә омтылабыз, ди. Ул “алтын фондыбыз” дип атаган сыер савучылар Раилә Сибгатуллина, Нурзилә Әхмәтҗанова, Резеда Әхмәтҗанова, Илмира Габдрахманова, лаборант Равилә Гайнетдинова, бозаулату бүлегендә эшләүче Алия Галим-җанова авырлыкларга бирешмичә, артык зарланмыйча эшли бирәләр.
Ильяс ФӘТТАХОВ