Берсеннән–берсе оста

Берсеннән–берсе оста
Үткән җомгада район Мәдәният йортында Арчаның 2нче мәктәбе һәм Арчаның 7нче мәктәбе коллективлары иҗат концерты белән чыгыш ясады. Зал халык белән шыгрым тулы иде.
Иң башта Арчаның 2нче мәктәбе сәхнәгә чыкты. Яңа костюмнардан 45ләп кешенең сугыш темасына багышланган төрле җырлар башкаруы бик отышлы иде. “Синий платочек”, “Алеша”, “Соловьи”, “Озатып вокзаллар каршында”...
Соңыннан тамашачылардан кем белән генә сөйләшсәм дә:
— “Бухенвальд” әдәби–музыкаль композиция бик шәп чыкты, еламыйча карый алмадык, — дигән җавап ишетәсең.
Бу дулкынландыргыч композицияне башкаручыларны һич тә атап үтмичә булмый. Арчаның иң әйбәт җырчысы 6 сыйныф укучысы Зәринә Никитина күңелләр-не тетрәндерерлек итеп “Бухенвальд” җырын башкарды. Рус теле һәм әдәбияты укытучысы Рәисә Хәбриеваның “Өч баламны очар кош итеп мин очырдым иркен далага...” дип сөйләвен тыныч кына тыңлап булмый иде. Илдус Әскәров, Алла Малафеевская, Салават Җамалиев — һәркайсы үз рольләрен оста башкарды.
Коллективның элекке күренекле композитор һәм шагыйрьләрнең әсәрләрен файдаланулары мактауга лаек. “Әдрән диңгез” көенә (Таҗи Гыйззәт сүзләре, Салих Сәйдәшев көе) хатын–кызларның татар халык биюен башкарулары бик матур килеп чыкты.
5 укытучы һәм 5 укучы яшүсмернең танго биюе белән мәктәптәге проблемаларны уйнап күрсәтүләре кызыклы булды. Монда дәрескә соңга калу, дәрескә килмәү, сагыз чәйнәү, мәктәп костюмнары — бар да бар иде.
Хезмәт дәресе укытучысы Гөлназ Ибраһимованың кул эшен тамашачы яратып һәм сокланып карады.
Арчаның 7нче мәктәбе үзенең Рәдифләре, Альмиралары белән билгеле коллектив. Татар теле һәм әдәбияты укытучысы Рәдиф Исмәгыйлев концертның сценариен язган. Программаны дүрт укытучы Альбина Зыятдинова, Фидәрис Зиннәтуллин, Ләйсән Фәхретдинова, Рәдиф Исмәгыйлев алып барды. Сугыш, тынычлык темасына багышланган композиция сугыш ветераны Габдуллаҗан Шәйхиев һәм Төбәк–Чокырча басуына төшеп шартлаган самолетта һәлак булган очучылар турында булды. Хезмәт дәресе укытучысы Альбина Зыятдинованың теккән күлмәкләрен карау үзе бер гүзәл манзара иде. Мәктәп директоры Альмира Гатауллина белән Рәдиф Исмәгыйлевның күңелле сәхнә күренешен уйнавын тамашачы сөйләп бетерә алмый. И–и, рәхәтләндек көлеп, диләр. 2050 елны тасвирлый алар. Альмира “карчык”ка 91 яшь, Рәдиф “бабай”га 79 яшь. Рәхәтләнеп таныш–белешләре турында сөйләштеләр. Фәлән Фәләновнаны күргәнең юкмы, нишләп йөри икән... 90 яшьлек юбилеена кемнәрне чакырды икән? Әй, халык тәгәри көлеп.
Иҗат концертлары коллективны төп эшеннән вакытлыча аерып торса да, иҗат аларны берләштерә, тормышны күңеллеләтеп җибәрә һәм тамашачыга менә дигән ял бүләк итә.
Румия НАДРШИНА