Гомере буе халыкка хезмәттә

Гомере буе халыкка хезмәттә^
Сара апа яныннан болай да кеше өзелеп тормый, әмма бүген кунакларның аеруча күп килә торган көне — аңа 90 яшь тулды. Телефон да шалтырап ала, әмма берәүне дә игътибарсыз калдырмый Сара апа.
— Сезнең дә эшегез бик җаваплы инде, — дип безнең белән дә сөйләшеп алырга вакыт тапты ул. — Район газетасын укып барам. Сүзне нәрсәдән башлыйм икән соң? Без алты бала үстек. Әти укытты, дүртебез югары белем алдык.
1942 елда Балтач урта мәктәбен 5 кыз, 6 малай тәмамлый алар. “Безне РОНОга чакырып алдылар. “Малайлар фронтка китә, ә кызлар — мәктәпләргә укытырга!” — диләр. Авылдашым Сәгурә белән үзебезнең Хәсәншәех авылы мәктәбенә билгеләделәр. “Балалар безне санламас”, — дип әйтеп карадык. “Санларлар!” — дип кенә куйдылар”.
Унҗиде–унсигез яшьлек кызлар кырыгар укучылы сыйныфлар алдына барып баса. Әле бит ач–ялангач балаларга белем бирәсе генә түгел: агитатор да булырга, сугышчыларга җылы кием җыярга, үз хәле хәл булган авылдашларыннан танклар колоннасына, самолетлар эскадрильясына акча җыярга, авыр хәлдәге авылдашларына ярдәм итәргә дә кирәк була. Шул ук вакытта Казан педагогика техникумын читтән торып укып тәмамлый. Бөтен гомерен Хәсәншәех авылы балаларына белем һәм тәрбия бирүгә багышлый Сара Әхмәтова.
— Пенсиягә чыккач та эшкә гел чакырдылар, — ди. — Тик ул вакытта минем янга оныкларны кайтара башладылар, игътибарны аларга юнәлтергә туры килде. Мәктәп тә, авыл халкы да бик зурлый, мин укыткан укучыларның, аларның ата–аналарының рәхмәтен ишетүе күңелгә рәхәтлек бирә.
Сугыш Сара апалар гаиләсенә дә зур югалтулар китерә. Олы абыйсы Арча педучилищесын тәмамлап, Шекә авылында укыта, сугыштан кайта алмый. Кече абыйсы үзе теләп фронтка китә, ул да кайтмый. Олысы Украинада, кечесе Ленинград өлкәсендә ятып кала.
Сара апа ире Готыф ага Әхмәтовны олы хөрмәт белән искә ала.
— Гаять тырыш, таләпчән, әмма бик гадел кеше иде, — ди ул. — Балаларны да шулай тәр-бияләргә тырыштык.
Готыф ага Бөек Ватан сугышындагы батырлыклары өчен ике Кызыл Йолдыз ордены белән бүләкләнә. Аның тыныч тормыштагы хезмәте дә үрнәк булырлык. Укытучы, мөдир, директор, КПСС райкомында җаваплы эштә, колхоз рәисе, кабат мәктәп директоры, аннан соң лаеклы ялга чыкканчы партия оешмасы секретаре. Тырыш хезмәте өчен “Почет билгесе” ордены белән бүләкләнә.
Әлеге үрнәк гаиләдә өч ул һәм ике кыз тәрбияләп үстерәләр, барысы да югары белемле һәм үз эшләре буенча яхшы белгечләр. Марат Готыф улы Әхмәтов — Татарстан Республикасы Премьер–министры урынбасары, авыл хуҗалыгы һәм азык–төлек министры. Татарча да, русча да телнең тәмен тоеп сөйләүче җитәк-челәребезнең берсе ул.
Башка балалары да яхшы тәрбия алган, белемле, хөрмәт яулаган шәхесләр.
— Сезнең гаилә — күренекле гаилә, — диде район башкарма комитеты җитәкчесе Илшат Нуриев, Сара апаны юбилее белән котлап. — Без Сезне бик ихтирам итәбез, Сезнең белән горурланабыз, балаларыгыз, оныкларыгызның игелеген күреп шулай озак яшәргә язсын!
Илшат Габделфәртович Сара апага Россия Президенты Владимир Путинның Рәхмәт хатын, бүләк тапшырды.
— Мин Аллаһы Тәгаләдән ай һәм кояш нурларының шифалы булуын, шифалы яңгырлар яудыруын, шифалы җилләр истерүен сорап дога кылам, — диде Сара апа. — Җаннарыгыз, тәннәрегез сәламәт булсын. Балаларыгызның куанычын күреп, уңышларына куанып яшәргә язсын!
Ильяс ФӘТТАХОВ