Батырлыкка тиң гомер

Батырлыкка тиң гомер
Күкчә Бирәзәдә гади авыл кешеләре гаиләсендә 1925 елда дөньяга килгән Вәсфикамалга бер сыйныф та тәмамлау насыйп булмый.
Ярты ел укыганнан соң сәламәтлеге буенча мәктәпне калдырырга туры килә. Ул чорда авыл кешесе хастаханәнең нәрсә икәнен дә белми. Әнисе аны колхоз эшенә ияртеп йөри, барын да кул белән башкарган вакытлар бит, кыз булдыра алган кадәр булыша.
Авыр сугыш елларында башкалар белән янәшә басып хезмәт итә Вәсфикамал. “1941–1945 еллардагы Бөек Ватан сугышы елларындагы фидакарь хезмәте өчен” медале — шул хезмәткә лаеклы бәя.
Тора–бара кыз Иске Чүриледәге заготскотка эшкә күчә. 1953 елда Илдус Миңһаҗев дигән егеткә кияүгә чыга. Алты бала үстерәләр, һәркайсы белем ала. Тик бәла аяк астында, диләр бит. Янгын чыгып өйләре яна, бәхет эзләп Питомникка күченеп киләләр. Лаеклы ялга чыкканчы шунда совхозда эшли. 1977 елда ире үлеп китә. Үзеңә генә авыр, өч балаңны интернатка тапшыр, дип киңәш итүчеләр була. Әмма ана мондый юлга бармый, аларны үзе тәрбияли. Хәзер һәркайсының үз гаиләсе, 90 яшен тутырган көндә иң бай кеше Вәсфикамал апа — 12 оныгы, 7 оныкчыгы бар. Тузган торак программасы буенча бирелгән бөтен уңайлыклары булган фатирда яши.
— Ил алдындагы бурычыгызны намус белән үтәгән кеше сез, — диде район башкарма комитеты җитәкчесе Илшат Нуриев, Вәсфикамал апаны юбилее белән котлап. Ул аңа Россия Президенты Владимир Путинның Рәхмәт хатын, бүләк тапшырды.
Яңа Кенәр авылында яшәүче Халидә апа Әхмәтханова Вәсфикамал апа белән яшьтәш, алар бер үк көнне туган. Тик язмышлары гына төрле. Халидә апа Лаеш районының Атабай авылында туа. Сугышка кадәр тәмамланмаган югары белем алырга өлгерә. 1942 елдан 1946 елга кадәр Казанда Ленинград шәһәреннән күчерелгән хәрби заводта эшли.
— Шартлар бик кырыс иде анда, — дип искә ала ул. — Иртәнге җидедән кичке җидегә кадәр эштә. Соңга калырга ярамый — хөкем итәләр. Инде эш тәмамланды дигәндә генә янга мастер килеп баса: “Менә сиңа талон, ашап кил дә — төнге сменага!” — ди. Алмашка кеше килмәгән икән. Ә иртән үз сменаң башлана.
Сугыштан соң Казан педучилищесын, аннан соң Укытучы институтын тәмамлый. Юллама белән Яңа Кенәр авылына җибәрәләр, 1953 елдан 1980 елга кадәр урта мәктәптә рус теле укыта. Сугышта катнашкан Зөфәр Әхмәтханов белән гаилә корып, өч кыз үстерәләр, оныклары, оныкчыклары бар.
Халидә апага да Россия Президентының Рәхмәт хаты, бүләк тапшырылды.
Әнә шундый искитмәле гомер кичкән алар безнең кадерле ветераннарыбыз.
Ильяс ФӘТТАХОВ