Икесе дә тырышып әзерләнгән

Икесе дә тырышып әзерләнгән
Район Мәдәният йортында Арча һәм Әтнә районнары буенча Пенсия фонды идарәсе һәм Үрнәктәге агросәнәгать көллияте коллективлары иҗат концерты белән чыгыш ясады. Район үзешчәннәре концерт куйганны халык ярата. Бу аңлашыла да, күргән–белгәннәрнең нинди сәләткә ия икәнлекләренә карап сокланасың.
Әле кайчан Пенсия фонды идарәсе җитәкчесе Рузия Нурмөхәммәтованы сәхнә костюмыннан күрер идек?! Рузия Илсуровна газ операторы Рамазан Хәкимҗанов белән программаны алып барды. Аның урынбасары Гөлназ Ибәтуллина сугыш темасына багышланган “Ташламам, җанкисәгем” әдәби–музыкаль композициядә тәмам ана роленә кереп бетте. Ана 4 улын, ирен сугышка озата, берсе дә әйләнеп кайтмый. Төпчек улының гармунын сорап киләләр, ана бирми. Бирсә, гармун белән аның соңгы өмете өзеләчәк...
Соңыннан Гөлназ Ибәтуллина хор турында:
— Мондый хорны ишеткән юк иде әле, диючеләр булды, — дип сөйли. — Безне педагогика көллиятендә музыкадан укыткан Флера Мәсхүдовна әзерләде шул!
Пенсия фонды белгече Гөлгенә Гатауллинаның кызы Алинә белән җырлавын яратып тыңладык. “Гөлгенә атказанган артистлар кебек җырлый”, — дигән бәяне бирүчеләр күп булды. Гөлгенә ханым Ләйлә Җәләева, Зөһрә Гыйльманова белән трио да башкарды.
“Пенсионерлар хыялы” дигән музыкаль мәзәкне Марат Рәхмәтуллин белән Ленар Шәймуллин карчык- лар булып уйнап күрсәтте. Пенсионерлар хыялы, билгеле инде, капчыклап пенсия алу!
“Һөнәрле үлмәс, һөнәрсез көн күрмәс” номинациясендә баш белгеч Гүзәл Маликова чигеп ясаган картиналарын, бәйләгән әйберләрен сокланып карадык.
Финал җыры “Пенсия фонды идарәсе гимны” сүзләрен үзләре язганнар.
Безнең бурыч
кеше белән
Эшләү уртак тел табып.
1 шатлык түгел,
1000 шатлык,
Канәгать булса халык.
Арча агросәнәгать көллияте иҗат концертында укучыларны да сәхнәгә чыгарды. Матур җырлаучы егет Раил Бакиев шушында укый. Ул хорның солисты булды, триода өчәүләп Алмаз Әхмәтов, Рузил Ильин белән “Без авыл егетләре”н башкардылар. Тамашачы бик яратып тыңлады.
Габделхаковлар гаилә ансамблен, Лилия Хәбибрахманованың кул эшен, 40 еллап шушында эшләгән Илсур Заһидуллинның гармунда татар халык көйләрен башкаруын җылы кабул иттеләр.
Нинди концерт инде ул көлкеле сәхнә күренешеннән башка?! Кызларны машинага йөртергә өйрәтү бик кызык килеп чыкты. Рольләрне Рамил Гарифуллин, Гүзәл Низамова, Рәзилә Шәйхетдинова башкарды.
Жюри әгъзасы Гөлнара Сабирова фикерләре белән дә кызыксындык.
— Ике коллектив та бик тырышып әзерләнгән. Биюләре бик шәп булды, — дигән бәяне бирде ул. — Башкорт биюен һәркайсы үзенчә матур биеде.
Румия НАДРШИНА