Имин юллар сезгә

Имин юллар сезгә
Юл хәрәкәте куркынычсызлыгын тәэмин итү һәм районда җинаятьләрне кисәтү максатыннан рейдлар үткәрелә.
14 марттагы рейд нәтиҗәләре буенча 66 юл хәрәкәте кагыйдәләрен бозу очраклары теркәлде. Исерек хәлдә транспорт чарасы белән идарә итүче 2 кеше административ җаваплылыкка тартылды. Тиешсез урында алдагы машинаны узарга чыгу (2 очрак), балалар өчен махсус җайланмасыз йөртү (2), куркынычсызлык каешы такмау (18), иминият полиссыз (3), укылмый торган дәүләт теркәү номерлары белән (20) идарә итү очраклары теркәлде.
ЮХИДИнең Арча бүлекчәсеннән алган мәгълүматлар буенча соңгы 2 айда район территориясендә 3 юл–транспорт һәлакәте булган, аларда 3 кеше тән җәрәхәте алган. Узган ел шушы чорда аларның саны 6га җиткән, 2 кеше һәлак булып, 6 кеше яраланган. 134 авариядә транспорт чараларына зыян килгән.
2 айда 1196 юл–транспорт кагыйдәләрен бозу очраклары теркәлгән. Рөхсәт ителмәгән урында каршы як полосага чыгып, алдагы машинаны узу очрагы — 58, транспорт белән идарә итү хокукын биргән документсыз юлга чыгу — 10, тизлекне арттыру — 236, җәяүлеләр тарафыннан юл хәрәкәте кагыйдәләрен бозу — 61, куркынычсызлык каешын такмыйча идарә итү — 169, укылмый торган дәүләт теркәү номерлары — 254, җәяүлеләргә юл бирмәү 60 очрак. Вакытында административ штрафларны түләмәү очрак- лары да 40ка җиткән. Шулардан 2 кеше кулга алынган, 38енә штрафны икеләтә күләмдә түләргә туры киләчәк.
— Язгы каникуллар килеп җитте, — ди ЮХИДИнең Арча бүлекчәсе җитәкчесе Илдар Нотфуллин. — 19–31 мартта “Бала — төп пассажир” дигән профилактик акция үткәрелә. Бу чорда транспорт белән идарә итүчеләрнең тизлек режимнарын саклау, куркынычсызлык каешларын тагып йөрү, пассажир балалар өчен махсус җайланма куллануга игътибар аеруча зур булачак.
Гөлсинә ЗӘКИЕВА