Йолдызлар җыелган җирдә

Йолдызлар җыелган җирдә
“Созвездие–Йолдызлык” эстрада сәнгатенең ачык республика телевизион яшьләр фестивале быел үзенең 15нче язын каршылады һәм Бөек Җиңүнең 70 еллыгына багышланды. Узган шимбәдә фестивальнең район бәйгесендә җиңү яулаган яшь талантлар катнашында йомгаклау концерты булды.
— Бүгенге концертка иң яхшы номерлар сайлап алынды. Яшь талантларыбыз зона, республика ярышларында да районыбыз данын якларлар, — дип аларга ышанычын белдерде район башкарма комитеты җитәкчесе урынбасары Илнур Котдусов.
Һәр чыгыш ул көнне аяз күк йөзен яктыртып йолдыз атылганга тиң булды. Яшь талантларыбыз тамашачыларны матур чыгышлары белән сокландырды. Барысының да исемнәрен әйтеп китү мөмкин түгел, чөнки алар бик күп. Һәрберсе көчле алкышларга лаек. Җырчылар да искиткеч, биючеләре дә сокландыр- гыч, алып баручылары да мактап туя алмаслык иде. Мөнир Мәрдәнов солдат киеменнән чыгып, “Герман көе”н сузгач, кем генә битараф калды икән. Инсаф Гаптелбәровны күрегез. Үзе көрәшче, үзе менә дигән алып баручы, үзе җырчы. Сәхнәдә үзен чын артистларча тота.
— Әйе, спортта уңышларым бар. Бу — минем горурлыгым. Ә сәнгать миңа якынрак, чөнки кечкенәдән сәхнәдә мин. Узган ел “Конферанс” һәм “Вокал–соло” номинацияләрендә икенче урынны алдым. Җиңүем белән мин әнием Диләрә Мәгъсүмовна һәм укытучым Татьяна Юрьевнага рәхмәтле, — ди Инсаф.
Илһам Яруллин Арча күгендә балкып килүче яңа йолдыз. Урта Атыдан. Педагогика көллиятенең музыка бүлегендә беренче курста укый.
— Бу бәйгедә беренче катнашуым. Минем өчен җиңү түгел, ә яңа дуслар табу мөһим. Җырга сәләт миңа бабам Рафаэль Шәйхиевтан килгән, — ди Илһам.
Илзирә Сираҗиеваның сәхнәдән төшкәне дә юк, дисәм, ялгышмам. Бу юлы да үзен алкышлап тыңладылар. Орчык кадәрле генә булса да, оста чыгышы белән бөтен залны үзенә каратып торды ул көнне Данил Закиров та. “Энҗеләр” вокаль ансамбле, чыннан да, сәхнә энҗеләренә тиң. Биючеләргә килгәндә, “Глянец”, “Ар–и–Эль” бию төркемнәре шундый матур, төгәл һәм тигез чыгыш ясадылар, хәтта аларга “Афәрин” диясе килә. Бу Венер Хисамиев, Эльза Камалова, Зилә Мортазинаның иҗат җимешләре. Алып баручыларның да берсен алып, берсен куярлык түгел. Үз–үзләрен тотышлары, сөйләүләре, юмор — сокланырлык. Киемнәр дә искиткеч иде. Сәхнәдә кием зур роль уйный шул. Карап торырга ук рәхәт. Соңыннан район бәйгесе җиңүчеләренә дипломнар һәм бүләкләр — йомшак уенчыклар тапшырылды.
Иң соңыннан Арча тамашачысын сюрприз көтә иде. Сәхнәгә узган елгы “Йолдызлык–Созвездие” фестивале Гран–при иясе, “Голос–дети” тапшыруында катнашып, беренче турдан үткән Сәйдә Мөхәммәтҗанова чыккач, бөтен зал гөрләтеп кул чапты, 13 яшьлек кыз башкаруындагы “Су буйлап” һәм “Сахраларда” (а’капелла) җырларын тын калып тыңлады, яшь талантка гөрләтеп кул чапты. “Бөтен дөньяга татар моңын таратканың өчен рәхмәт сиңа”, — диде аңа, чәчәк бәйләме тапшырып Әлфия Рәхимова. “Минем апамның оныгы ул. Аның әбисе бик матур җырлый иде. Безнең нәселнең моңын дөньяга танытты Сәйдә”, — диде ул соңыннан безгә.
— Бәйге турында мин рекламадан белдем. Әтиемә әйттем. Ике җырны җибәрдек. Беренче каналдан шалтыратып, 10 мең кешедән 500 җыр-чы арасына керүем турында әйттеләр. Бардык. Тагын 2 җыр башкардым. Сайлап алынган 150 җыр-чы арасында мин дә бар идем. Татарча гына җырлыйм, дидем. Сине беркем аңламаячак, диделәр. Риза булмадым. Монысы узган ел булды. Ә быел татарча җырны да ошаттылар. Пелагея белән Билан җырлый башлауга борылдылар, — диде Сәйдә.
Кыз әнисе Зилә һәм әтисе Айрат белән килгән иде. “Мин үзем Сеҗенеке, шунда — 8, Арчаның икенче мәктәбендә 10нчы сыйныфны тәмамладым. Сәйдә безнеке, дип әйтә аласыз”, — диде әтисе саубуллашканда.
Безнең яшь талантларыбызга да республика эстрадасы күген яктыр- туларын, татар моңын бөтен дөньяга таратуларын телибез.
Гөлсинә ЗӘКИЕВА