Өстәлә каберләр, өзелә бәгырьләр

Өстәлә каберләр, өзелә бәгырьләр
Районда 22 марттан 23 март төнендә коточкыч фаҗига булды. Курса разъездында бер йорт тулысы белән янып бетте. Тагы да тетрәндергәне — йорт белән бергә дүрт кеше — хуҗабикә Тәнзилә Гарифуллина, каникулда ял итәргә кайткан ике оныгы һәм аның белән бергә яшәгән Мансур Бикбов янып үлде.
Шул ук көнне иртән Казаннан Россия Гадәттән тыш хәлләр министрлыгының Татарстан Республикасы буенча Баш идарәсе җитәкчесе урынбасары Рафаил Мотыйгуллин җитәкчелегендәге комиссия кайтты. Көндезге сәгать 2дә авыл җирлекләре башлыклары, юлчылар, янгынчылар районның гадәттән тыш хәлләр һәм янгын куркынычсызлыгы буенча комиссия утырышына җыелды. Район башкарма комитеты җитәкчесе Илшат Нуриев янгында һәлак булганнарны бер минутлык тынлык белән искә алуны игълан итте.
Иң башта Арча һәм Әтнә районнары буенча янгын күзәтчелеге бүлеге җитәкчесе Рөстәм Сафин Курса разъездында янгын белән бәйле булган хәлне аңлатты.
— Янгын частена хәбәр 1 сәгать тә 47 минутта керде, — дип сөйләде ул. — 1 сәгать тә 55 минутта якындагы “Ак барс” агрокомплексы”ның янгын сүндерүчеләре килеп җитә.
Алар артыннан Сеҗе янгынга каршы хезмәт посты, Яңа Чүриле психоневрология диспансерының янгын сүндерүчеләре ярдәмгә килә. Озак та үтми Арча янгынчылары килеп җитә. Агач йорт бик тиз янып бетә.
— Хәбәр соң керде, — ди Рөстәм Сафин.
Янгын килеп чыгуның сәбәбе нидә? Йортта газ миче дә, утын ягып җылыта торган мич тә булган. Утын миченнән янгын чыккан дигән фараз бар. Электр чыбыгыннан да ут кабуы ихтимал. Әлегә анык кына берни дә әйтеп булмый, тикшерү бара.
— Мәрхүмнәрнең якыннарының тирән кайгысын ихлас күңелдән уртаклашам, — диде Рафаил Мотыйгуллин. — Бу кеше башына төшкән бик зур кайгы. Быелның өч аенда гына да республикада нинди зур фаҗигаләр булды. Актанышта бер йортта 6 кеше янып үлде, шуның 3се балигъ булмаган балалар. Инде менә Арча районында янгында 4 кеше һәлак булды, шуның 2се балалар. Казанда “Адмирал” базарында күпме кешенең гомере өзелде. Базар эченә бишенче тапкыр товарга кергән вакытта эчтә калып әрәм булдылар. Уйланырга, нәтиҗә ясарга җирлек бар.
— Кеше тормышыннан да кыйммәтрәк берни юк, — диде Илшат Нуриев. — Моны һәрвакыт истә тотсак иде.
Өйдә ут чыбыкларына игътибарлы булырга, тузса, алмаштырырга, газ мичләре төзеклеген, төтен юллыкларын даими карап торырга кирәк. Кеше күп йөри торган сәүдә объектлары хуҗалары куркынычсызлыкны тәэмин итәргә тиеш. Ут балалар шаяруыннан да килеп чыгарга мөмкин. Алар белән дә мәктәпләрдә эш алып бару сорала. Социаль әһәмияткә ия булган биналарда янгын куркынычсызлыгы буенча өйрәнүләр алып бару да нәтиҗәле чаралар булып тора. Эчкече гаиләләр, авыр хәллеләр игътибар үзәгеннән төшмәскә тиеш. Янгын сүндерү машиналарына су алу җайланмаларының төзек, эшкә яраклы булуы шарт. Янгын күп чыккан авыл җирлекләре башлыкларына комиссия алдында хисап тотарга туры киләчәк.
…Моңаеп капка басып калган. Бу капкадан инде бервакытта да елмаеп Тәнзилә белән Мансур чыкмас. Чыркылдашып Дилә белән Инзирә дә йөгереп үтмәс. Эчтә нигезенә кадәр янып беткән кап–кара йорт урыны. Каршыда, урамның теге ягында, ятим булып буш йорт тора. Мансур йорты. Хатыны мәрхүм булгач, Тәнзиләнең дә ире бакый дөньяга күчкәч, алар кушылырга карар итә. Бергә–бергә тормыш итәргә җиңелрәк булыр, диләр. Бер–бер артлы өч мәетне (хатынының әтисен, сеңлесен, аннан хатынын) җирләгән Мансур 3 яшьтән әнисез калган улы Дамир белән Тәнзилә йортына күчә. Дамир инде 8 сыйныфта укый. Алдагы көнне генә Мансурның апасы Наилә Дамирны үзләренә дәшеп алган була. Минем барасы җир бар, бабаңны карап торырсың, дип. Дамир, мин өйдә кунган булсам, аларны коткарып кала идем, дип елый...
Хөрмәтле райондашлар, дөм ятим калган Дамир язмышына, янгында һәлак булганнарның якыннары хәсрәтенә битараф калмыйк, аларга булдыра алганча ярдәм кулы сузыйк.
Ярдәм итәргә теләүчеләргә акча күчерү өчен реквизитлар:
Арский районный общественный благотворительный фонд “От сердца к сердцу”
№ счета: 40703810207020000119
БИК: 049205805
К/счет: 30101810000000000805
ИНН 1609011794, КПП 160901001
Арский филиал “Ак Барс” банка
Адрес фонда: г. Арск, Советская пл., д. 12.
Назначение платежа: добровольное пожертвование на уставную деятельность (для родственников погибших на пожаре в разъезд Корса), НДС нет.
Р.S. Шушы ук төнне Штерәдә тагын бер йорт янды. Бәхеткә, хуҗалары исән калды.
Мондый фаҗигаләрне башка күрергә язмасын.
Румия НАДРШИНА