Аларсыз — без нурсыз

Аларсыз — без нурсыз
Әйе, алар чыннан да күңелләргә нур таратучылар, сәнгать аша әдәп–әхлак бүләк итеп, зәвык, күңел байлыгы өләшеп кеше күңелен шәфкатьле, иманлы булырга ярдәм итүчеләр.
Мәдәният хезмәткәрләренең хезмәтләре бихисап. Безгә сәхнәдән матур булып күренгән чыгышлар өчен күпме хезмәт кергәнен үзе шул өлкәдә кайнаган кеше генә әйтә аладыр. Никадәр сабырлык сорала анда! Матурлык һәм сәнгать өлкәсенә гашыйк үз һөнәрләренең осталары булган мәдәният хезмәткәрләренең 25 март — һөнәри бәйрәм көне. Безгә һәрдаим бәйрәм ясап торучыларның үзләренә ял тәтегәне юк, гади халык бәйрәм иткәндә аларның “урак өсте”. Мәдәният хезмәткәрләренең кухнясында бераз казынып алу, аларның хезмәтенең нечкәлеген, башкарган эшләренең асылына төшенү максатыннан район Мәдәният йорты җитәкчесе Айрат Нурьязанов белән әңгәмә корырга булдык.
— Айрат Гомәрович, сезнең хезмәтнең һәр көне бәйрәм кебек.
— Дөрестән дә, Мәдәният йортында бәйрәмнәр уздырылмаган елның берничә көне генә кала торгандыр. Узган ел, мәсәлән, район Мәдәният йорты хезмәткәрләре тарафыннан сәхнәдә тамашачы өчен 250дән артык чара үткәрелде. Моннан тыш, районның хәрби комиссариаты, район эчке эшләр бүлеге, спорт, мәгариф идарәсе, педагогика көллияте, социаль яклау идарәсе, район ветераннар советы, ЗАГС һ.б. белән тыгыз элемтәдә торабыз. Аларга күп очракта бәйрәмнәрен оештыруда башлап йөрүдә булышу гына түгел, үзебез үткәрәбез дә.
— Республика күләмендәге чараларда да безнең район сәнгать осталарының көче шактый керә, белүебезчә, төрле бәйгеләрдә дә еш катнашасыз.
— Чыннан да, безнең республика күләмендәге чаралардан кайтып та кергән юк, дисәк тә була. “Җыен”, “Түгәрәк уен”, “Балкыш” ,“Каравон”, “Симык” республика фольклор фестивальләре, Фәйзулла Туишев исемендәге гармунчылар конкурсы ел да безнең район сәнгатькәрләре чыгышларыннан башка узмый. “Җырлыйк әле”, “Башваткыч” телевизион тапшыруларында да безнекеләр ел әйләнәсе катнаша. Чит өлкәләрдә Сабантуйлар үткәрүдә дә безнең коллективның тырышлыгы күп керә. Сабантуй дигәннән, районда Сабантуй, Яңа елны каршы алу, озату чаралары хезмәтебезнең иң күләмлеләре булып тора. Сабантуйга бүгеннән үк әзерлек бара инде. Әле вакыт бар, дип йөрсәң, өлгереп тә булмаска мөмкин. Халыкка күңел ачу өчен үзенчәлеклерәк яңалык кертү турында хәзердән үк планнар корабыз.
— Бөек Җиңүнең 70 еллыгын бәйрәм итәргә дә озак калмады. 9 майда райондашларыбыз- ны ниләр белән куандырырга җыенасыз?
— Аңа кадәр Габдулла Тукайның 129 еллыгын уздыру көтелә. Быел Тукай көннәре елдагыдан бераз үзгә булачак. Яңа Кырлайдагы музей ишегалдында интер- актив почмаклар булдырырга исәплибез. Бөек Җиңүнең 70 еллыгына килгәндә, үзәк мәйданны тулы бер Җиңү мәйданына әйләндерергә уйлыйбыз. Берничә сәхнә эшләячәк. Балалар сәхнәсе, сугыш чорындагы сыман машина әрҗәсеннән агитбригаданың һәм хор чыгышлары көтелә. “Арча” ТРК белән “Өзелгән җыр эзеннән” проектын башлап җибәрдек. Район Мәдәният йорты сәхнәсендә 6 май көнне җиңүчеләрнең гала-концерты тәкъдим ителәчәк.
— Авыл мәдәният учаклары да тулы куәтенә эшли. Алар арасында да конкурслар бара.
— Быел авыл мәдәният учреждениеләре ике өлкәдә үзләренең осталыгын күрсәтә. Авыл халкын җәлеп итеп, концерт һәм спектакльләр куеп ярыша алар. Спектакльләр арасында уңышлылары, район Мәдәният йортына чакырылып, район халкына чыгышларын кабат күрсәтә. 17 апрельдә авыл мәдәният учреждениеләренең гала-концерты булачак. Ә аңарчы тамашачыларны 10 апрельдә оешма һәм учреждениеләрнең гала-концертында көтеп калабыз.
Авыл мәдәният учакларына агитбригаданың да булышлыгы зур. Урып–җыю чорыннан башлап алар кечкенә авылларга мәдәният хезмәте күрсәтәләр. Быел тагын да игелеклерәк эшкә тотындык — хәйрия концертлары бирә башладык.
Игелек дигәннән, без берничә ел элек район ЗАГС идарәсе белән берлектә авылларда буйдак егетләр белән парсыз кызларны таныштыру кичәләре уздыра башлаган идек. 11 апрельдән әлеге чараны традицион “Арча кичләре” нә бәйләп үткәрергә җыенабыз (бу хакта республика ЗАГС идарәсеннән дә күрсәтмә килде). Әлеге чараны халык кызыксынгач, сораулар булгач, районда уздырырга уйладык. Планнар зурдан, бары сәламәтлек һәм эшкә дәрт кенә булсын.
Һөнәри бәйрәмебез уңаеннан район җирлегендәге мәдәният хезмәткәрләрен котлыйм. Хезмәткә көчегез ташып торсын, илһам чишмәләрегез саекмасын, гаиләләрегездә тынычлык, сәламәтлек һәм иҗади киңлек, рәхмәтле тамашачылар телим.

Сәхифәне Розалия ЗИННӘТОВА
әзерләде