Яңа Кырлайда Нәүрүз, Май чабу көтә!

Яңа Кырлайда Нәүрүз, Май чабу көтә!
Яңа Кырлайда Габдулла Тукай дәүләт әдәби–мемориал музей комплексы белән “Сервис–Агро” оешмасы 21 марттан 29 мартка кадәр Нәүрүз, Май чабу бәйрәмнәрен үткәрә. Теләгән һәркем кышны озату йолаларында күңел ача ала.
Программасы кызыклы. Арча станциясендәге мәдәни–спорт үзәге сәнгать җитәкчесе Эльмира Фазылҗанова проект–сценариен эшләгән. Кыш бабай, Яз кызы да монда. Карлы–буранлы, салкын кыштан соң кошевкалы атларда чәчәкле Яз кызының килүе үзе бер күңелле манзара. Мәйданда бөек язучыбыз Габдулла Тукай әсәрләре геройлары Сарык белән Кәҗә, Су анасы, Күбәләк белән бала, Шүрәле белән батыр егет... Күрче балаларны, Шүрәле белән кети–кети уйныйсылары, Су анасының алтын тарагын урлап качасылары килә...
“Яшь гвардияче”ләр (җитәкчесе Валентина Гаранина), җырлап, биеп, рус халык йолаларына туры китереп, “Май чабу” бәйрәменә дәшәләр. Ул төрле кызыклы уеннар белән үрелеп бара. Әтәч сугышлары, себеркене кем ераграк ыргыта, ике команда белән парлап чаңгы шуу, аркан белән тартышу, тагын әллә нинди кызыклар — рәхәтләнәсең уйнап. Аннан китә дәртле биюләр, җитәкләнешеп әйлән–бәйлән йөрүләр... Кызык!
Көтмәгәндә үз биләмәсеннән Кыш бабай килеп чыга. Китә тагын кызыклар, кыш белән яз тарткалаша — кыш буе идарә итеп арыган Кыш бабайның үз урынын Яз кызына бирми хәле калмый. Тирә–юньдә яз тантана итә! Бәйрәмдә катнашучыларның да күңелендә яз, алар бергәләшеп музейга Кыш бабайның биләмәсен карарга китәләр. Кыш бабай үз биләмәсен Яз кызына бирә. Анда үзе бер серле дөнья. Бер уңайдан музей белән дә танышып чыгасың.
Аннан... дәррәү осталык классына юл тотасың. Бергәләп мунчаладан карачкы курчагы ясарга өйрәнәсең. Урамда сине төрле әшәкелекләрне үзенә җыйган зур карачкы көтә. Аны яндыргач, ничектер, күңелләр чистарып калгандай була.
Зур казанда карга боткасы пешә. Карга боткасының тәмлелеге... телеңне йотасың.
Менә шулай, милли йолаларыбызны онытмыйча, аларны яңартып, үзебезнең дә күңелне ачып яши дә белергә кирәк шул!
Румия НАДРШИНА