Көчтән килгәнчә игелек кылырбыз

Көчтән килгәнчә игелек кылырбыз
25 мартта Казандагы “Корстон” мәдәни–күңел ачу комплексында “2014 ел хәйриячесе” республика бәйгесе җиңүчеләрен бүләкләү тантанасы булды.
Җиңүчеләргә бүләкләрне Татарстан Республикасы Президенты вазыйфаларын вакытлыча башкаручы, Хәйрия эшчәнлеге мәсьәләләре буенча Республика советы рәисе Рөстәм Миңнеханов тапшырды. Хәйрия эшчәнлеге Татарстанда дәүләт сәясәтенең бер өлеше. Мондый бәйге республикада ел саен үткәрелә. Бүләкләнүчеләр арасында безнең районнан Лилия Гарәфиева да бар иде.
— Арча Боз сараенда Фәнил Гарәфиев истәлегенә үткәрелгән ветераннар хоккей турнирында быел 6 район командасы, барлыгы 100дән артык кеше катнашты. Турнирга шуның кадәр кеше килүенә, Фәнилне шулай хөрмәт итүләренә мин бик тә рәхмәтле, — ди шәхси эшмәкәр Лилия Гарәфиева.
Фәнил Гарәфиевны районда кешелеклелеге, изге күңеллелеге, ярдәмчеллеге өчен ихтирам итәләр һәм яраталар иде. Фаҗигале төстә вафат булуына шактый вакыт үтүгә карамастан, үзен әле дә сагынып искә алалар. Ә аның изге гамәлләрен хатыны Лилия Гарәфиева дәвам итә.
— Янымда булмаса да, Фәнил минем йөрәктә. 21 ел бергә гомер иттек, ике бала үстердек. Аны онытмыйлар. Кайчак бер белмәгән җирдә дә сез Фәнилнең хатынымы әллә, дип яныма килеп җитәләр. Мин аны шулай якын итүләре белән горурланам. Исән кебек булып истә калсын, дип аның эшен дәвам итәргә тырышам. Фәнил безгә яхшы, мул тормыш калдырды. Аның тырышлыгы белән бүген бернинди авырлык кичермибез. Рәхмәт. Мөмкинчелегебез булганда нигә мохтаҗларга ярдәм итмәскә? Кешеләр рәхмәтен алу үзе зур бәхет бит, — ди Лилия ханым.
Лилия үзе Олы Әтнә кызы. Әтисе укытучы, әнисе фармацевт. Гаиләдә ике кыз. Лилия — олысы. Олы Әтнә урта мәктәбен тәмамлаган кыз Казан медицина училищесына укырга керә. Шул елларда Олы Әтнә совхоз–техникумында белем алучы Югары Әзәк егете Фәнил белән очраша. Армиядән дә көтеп ала үзен.
Кайткач, өйләнешәләр. Менделеевскига эшкә китәләр. Аннан гаилә Арчага күчеп кайта, Фәнил үз эшен башлап җибәрә. Бераздан металл базасын булдыра.
— Хәзерге вакытта Фәнилнең эшен туганыбыз Инсаф Габделгазизов, финанс–экономика институтын тәмамлаган кызым Алсу белән берлектә дәвам итәбез. Казан федераль университетында белем алучы улым Фәнис тә буш вакытында ярдәмгә килә, хәтта зур проблемаларны да хәл итә, — ди Лилия ханым.
Турнирлар оештыруда менә шушы яшьләр башлап йөри дә инде. Бүләкләрне дә яхшы әзерлиләр, спортчыларны тукландыруны да оештыралар. Һәр ел Фәнил Гарәфиев истәлегенә хоккей турниры да, чаңгы ярышлары да шундый югарылыкта үтә.
Моннан тыш, Лилия Гарәфиева Өлкәннәр көнендә бүләк әзерләүгә дә үзеннән зур өлеш кертә (ел да 50 – 55 пакет), ветераннар, сугыш чоры балалары турында да онытмый, ярдәм сорап килгән авыручылар, янгыннан зыян күрүчеләрне дә кире борып чыгармый, көченнән килгәнчә акчалата ярдәм күрсәтә. Утар Атыда ялгызы яшәүче һәм йортын төзекләндерүгә мохтаҗ сугыш ветераны кызы Нурия Абдуллинага да ул материаллар белән булыша. “Өмет чыганагы” балаларны тернәкләндерү үзәге белән тыгыз элемтәдә тора. Фәнил укыган Иске Кырлай мәктәбен, аның туган ягын да онытмый. Авылда Сабантуй үткәрүгә үз өлешен кертсә, мәктәпкә чаралар үткәргәндә ярдәме тия.
Ә изгелек ул җирдә ятмый, аны кылган кешенең үзенә бише, уны белән әйләнеп кайта. Бу изгелекләрегез, мохтаҗларны, өлкәннәрне, балаларны сөендерүләрегез үзегезгә игелек булып кайтсын, һәрчак хезмәтегез уң булсын.
Гөлсинә ЗӘКИЕВА