АЛАРНЫҢ ҮЗ ПАРЛАМЕНТЫ БАР

Узган якшәмбедә Арча район Советы каршындагы яшьләр парламентының беренче утырышы булды.
Анда райондагы яшьләр оешмалары активистлары катнашты. Алар белән очрашып, район тормышындагы мөһим мәсьәләләр турында сөйләшү, фикер алышу өчен район башкарма комитеты җитәкчесе Илшат Нуриев һәм районның социаль өлкә тармагы җитәкчеләре килгән иде.
Яшьләр парламенты яшьләр инициативасын тормышка ашыруда, социаль проблемаларны хәл итүдә мөһим роль уйнарга, яшьләргә кагылышлы закон проектлары буенча фикер алышу мәйданчыгы булырга тиеш. Җитәкчеләр әнә шундый фикер белдерде.
— Һәр кешенең үз уе, идеясе, максаты булырга тиеш. Ул районыбыз файдасына булса, безнең өчен дә бик мөһим. Кайчак яшьләр районны үстерүгә күбрәк өлеш кертә. Булган мөмкинлекләрегезне кулланырга, үзегезне күрсәтергә, яраткан эшегез белән шөгыльләнергә кирәк. Курыкмагыз, бу сезнең киләчәгегез, — диде яшьләргә мөрәҗәгать итеп Илшат Нуриев.
Яшьләр парламенты рәисе Юлия Ибраһимова парламентның төп бурычлары белән таныштырды, райондагы яшьләр оешмалары җитәкчеләре, чыгыш ясап, башкарган эшләре турында хисап тотты. “Бердәм Россия” сәяси партиясе җирле бүлекчәсенең “Яшь гвардия” штабы җитәкчесе Лия Ильина, “Волонтер” иреклеләр үзәге җитәкчесе Рамилә Диярова, Арча педагогика көллиятенең студентлар советы җитәкчесе Лиана Калинина, балалар шәһәр думасы җитәкчесе Миләүшә Шакирова, “Татарстан—Яңа гасыр” яшьләр җәмәгать оешмасының “ХХIнче гасыр яшьләре” клубы җитәкчесе Руслан Галәветдинов чыгышыннан соң Илшат Нуриев:
— Бик күп эш башкаргансыз. Мин бу хакта беренче тапкыр ишетәм. Барысын да газета, радио, телевидение аша яктыртырга, аерым рубрика булдырырга кирәк. Республика хезмәтләреннән белгечләр чакыртып, активистлар өчен укулар, осталык класслары үткәрү дә зур роль уйнаячак. Төрле юнәлештә алдынгы карашлы яшьләр бар. Җыелсыннар, өйрәнсеннәр, аннан башкалар белән тәҗрибәләрен уртаклашсыннар, — диде.
Ул шулай ук дуслык учагын, Тукай туган көндә үткәрелә торган марафон кысаларын киңәйтү, башка районнарны да тарту, яшьләрнең ялын оештыру, шәһәрдә татар мәктәбе булдыру кебек һәм башка яшьләр тормышына кагылышлы һәм мөһим булган мәсьәләләргә тукталды, алар буенча яшьләрнең фикерләрен тыңлады.
Утырышта Арча муниципаль район Советының яшьләр парламенты советы, җитәкчесе урынбасары (Руслан Галәветдинов), секретаре (Рамилә Диярова) сайланды, эш планы төзелде. Хәзер ай саен утырыш үткәрелеп, анда яшьләр оешмалары җитәкчеләре башкарган эшләренә хисап тотачак.
Гөлсинә ЗӘКИЕВА