СПОРТ АЛАРНЫҢ ЮЛДАШЫ

Район яшьләре һәр өлкәдә актив, уңышлары да күп. Алар горурлыгыбыз гына түгел, киләчәгебез дә. Узган атнада “Арча” спорт комплексында Татарстан Республикасы беренчелекләрендә призлы урыннар яулаган егетләр һәм кызларны бүләкләү тантанасы узды.
Район башкарма комитеты җитәкчесе Илшат Нуриев, узган елның ноябреннән башлап быелның мартына кадәр үткән Татарстан беренчелегендә баскетбол, бокс, гер спорты, тхэквондо, татарча көрәш, йөзү буенча алдынгы урыннар алучыларны бүләкләп, аларга бетмәс–төкәнмәс көч, яңа уңышлар теләде. “Сезнең уңыш — районыбызның, илебезнең уңышы”, — дип бәяләде ул яшьләрнең тырышлыгын.
Татарча көрәш буенча бүләкләнүчеләр арасында Арчаның 2нче мәктәбеннән Динар Гайнетдинов та бар иде. Биектауда 42 команда арасында арчалыларның 4нче урын яулавында Динарның да өлеше зур. 10 сыйныфта укучы егет көрәш белән 12 яшьтән шөгыльләнә. Түгәрәккә дә кемнеңдер тәкъдиме белән түгел, үз теләге белән килгән булган. Аның тырышлыгы — тренеры Фәнис Зариповның уңышы. Ә Динарның тырышлыгы узган ел “Сабантуй” газетасы призына үткәрелгән Татарстан беренчелегендә 3нче урын алып кайтуында күренә. Болар әле уңышларның башы гына. Киләчәген юридик белем алып хокук саклау органнары белән бәйләргә теләгән егетнең спортта яулаган уңышларын ишетеп горурланырга язсын. Хокук сакчысына спорт беренче урында тора.
Гомумән, спортны үз итү тормышта һәрьяклап файдалы. Спорт — сәламәтлек дип юкка әйтмиләр. Ә сәламәт булсаң, күңел эшкә алгысып тора. Балаларны кече яшьтән спортка тарту иң элек, әлбәттә, гаиләдән башлана. Мәктәпкә кергәч, физкультура укытучысының кызыксындыра белүе мөһим. Ашытбаш мәктәбенең 29 ел стажлы физкультура укытучысы Наил Сабирҗанов белән шул хакта сөйләшәбез. “Балалар элек бик актив иде, тик хәзер аларны компьютер, телевизордан аерып алу өчен спортка кызыксындыру уятырга кирәк. Үзем, мәсәлән, чаңгыны сәламәтлек өчен иң яхшы спорт төре дип саныйм. Җәен — йөгерү. Укучыларыбызның спортта уңышлары шактый. Аларны спортка җәлеп итү өчен ел әйләнәсе “Елның иң яхшы спортчысы” дигән конкурс оештырабыз. Баллар белән бәяләнгән нәтиҗәләр мәктәпнең һәркемгә күренә торган почмагындагы экранда чирек саен чагылып бара. Укучы мәктәп күләмендә беренче урын алса, 10 балл, район күләмендәге беренче урынга — 20, республика дәрәҗәсендәгегә 30 балл өстәлә. Җиңүчеләр авыл Сабантуенда бүләкләнә. Әлеге система укучыларда кызыксыну уята, активлаштыра. Ике ел мәктәптә көрәш түгәрәге эшли (тренер Сөләйман Галиуллин). Яше кечкенә булса да, укучыларның көрәш буенча да уңышлары бар. Шулай ук шашка, шахмат түгәрәкләренә кызыксынып йөриләр. Республиканың сайлап алу ярышларына район буенча шашка ярышлары безнең мәктәптә узды. Бу төрләр баланың зиһенен камилләштерү өчен дә мөһим. Кызлар яңа кергән спорт төрләреннән бадминтонны үз итә”, — ди ул.
Бәйрәм тантанасы “Арча” спорт мәктәбендә шөгыльләнүчеләрнең спартакиадасы белән дәвам итте. Район җирлегендәге мәктәп укучыларыннан торган командалар 8 төрле ярышта көч сынашты. Бөек Җиңүнең 70 еллыгына багышланган спарта- киада башланыр алдыннан яу кырында башын салган райондашларыбызның якты истәлегенә бер минут тынлык игълан ителде.
Розалия ЗИННӘТОВА