МОҢАРЧЫ НӘРСӘ КАРАГАННАР?

Казандагы “Адмирал” базары януы, андагы фаҗига барыбызны да тетрәндерде. Үз башына төшкәннәр моны аерата авыр кичерде. Ерак барасы юк, моннан 8–9 ел элек безнең Арчада да азык–төлек һәм кием–салым базарлары янды.
— Гомер онытасым юк, — дип сөйли азык–төлек базарында элек эшләгән Диләрә ханым. — 2007 елның 7 марты иде ул. Кичтән азык–төлекне алып кайтып тутырган гына идек. Ул вакытта базарның гөрләп эшләгән вакыты. Кеше күп йөри. Бикләп кайтып кына киттек, базар яна дип хәбәр иттеләр. Суыткыч белән туңдыргычны алып, кредитны түләп бетереп җиңел сулап куйган гына вакыт иде. Бар да әрәм булды. “Адмирал” яна дигәч, планшеттан карап еладым...
— Шул янгыннан соң кайберәүләр эшмәкәрлек эшенә бөтенләй кул селтәде, — дип сөйли азык–төлек базарында эшләүче Наилә ханым. — Ул кич йөрәктән әле дә китми...
Озак еллар базарда киемнәр сатучы Гүзәл ханым:
— Искә төшерәсе дә килми ул вакытларны, — ди.
Ярый әле үлемнәр булмады. Ул вакытта янгыннарның ни сәбәпле килеп чыгуы турында төрле сүзләр йөрде.
“Адмирал” базары янганнан соң, республиканың сәүдә объектларында планнан тыш тикшерүләр башланып китте. Янгыннан соң ук Татарстан Президенты Рөстәм Миңнеханов кеше күп йөри торган урыннарда һәм сәүдә үзәкләрендә куркынычсызлык ка- гыйдәләре буенча махсус тикшерүләр уздырырга боерды. Безнең районда да прокуратура күзәтчелек органнары белән берлектә сәүдә объектларында тикшерүләр алып бара.
— Кибет тоталар, ә кеше иминлеге турында уйлау юк, — ди Арча һәм Әтнә районнары буенча дәүләт янгын күзәтчелеге бүлеге җитәкчесе Рөстәм Сафин.
Күптән түгел эшмәкәрләрнең бер җыелышында МЧСның дәүләт янгын күзәтчелеге бүлеге җитәкчесе урынбасары Раил Галимуллин: “Быел планлы тикшерүләр булмаячак”, — дип эшкуарларны сөендергән иде. Эшмәкәрләр өчен “күзәтчелек каникулы”н планнан тыш тикшерүләр бозды.
Тикшерү үткән кайбер объектларны (30 март) махсус карап чыктым. Нәтиҗәсен беләсе килде.
Иң башта элеккеге урам базары янындагы сәүдә йортындагы “Шаром–Даром” кибетенә бардым. 3нче катка күтәрелү юлына аркылы бау сузып, “Бездә ремонт” дигән язу элеп куйганнар.
Элек янган базар урынындагы икенче каттагы кием–салым базарында да тулы көчкә янгын куркынычсызлыгын тәэмин итү эшләре бара. Беренче каттагы баскыч астын бушатканнар, китаплар кибетен алганнар. Баскыч кырыйларын тимер сайдинглар белән эшләгәннәр. Сигнал җиһазларын яңага алмаштыралар. Эвакуация ишекләрен кием–салымнан арындырганнар. Ишекләрне киңәйткәннәр һ.б.
Кибетләр рәтендәге икенче каттагы тагын бер кием–салым базарында да (элеккеге “Галантерея” кибете каршысы) эш бара. Идәндәге линолеумга кадәр алганнар. Павильоннардагы плас-тик диварларны металл сайдингларга алмаштырганнар. Утларны караганнар. Эвакуация юлларын чистартканнар һ.б.
Азык–төлек базарының ишекләренә “30 мартта санитар көн” дип язып элгәннәр. Эчтә шулай ук янгын куркынычсызлыгы буенча махсус эш бара. Павильоннардагы плас-тик диварларны металл сайдингларга алмаштыралар. Чистарталар, җыештыралар. Кибетләрдә, базарларда кеше йөри торган урыннарны товар белән тутырырга рөхсәт ителми. Азык–төлек базарында бу хәл күзәтелә. Товар куяр өчен урын булмавы сәбәпчеме моңа, әллә барлык булган азык–төлекне сатып алучылар күз алдына куярга тырышумы бу?
Типография бинасында да янгын куркынычсызлыгы буенча шактый эшләнгән. Икенче катка тагын бер эвакуация юлы ясалган. Котельный ишек-ләре утка чыдам тимер ишеккә алмаштырылган. Тиз янучан материаллар белән тышланган диварлар гипсокартон белән төрелгән һ.б.
Нәрсә булган кибет, базарларга диярсең. Куркынычсызлык кагыйдәләрен үтәү өчен фаҗига булу кирәк микәнни?!
Тикшерүләр дәвам итә.
Румия НАДРШИНА