Тыныч таңнар атсын

Тыныч таңнар атсын
Бер гасыр гомер үткән Бибикаюмә Мортазина безне иң кадерле әниләргә генә хас булганча түр башында йомшак кәнәфидә каршы алды.
— Минем турында нәрсә язасыз инде. Аллага шөкер, тәрбиядә булдым. Тегендә–монда тилмереп йөрмәдем. Хәзер дә кадер–хөрмәттә яшим. Хөкүмәткә дә, балаларыма да зур рәхмәт, — диде ул елмаеп.
Бибикаюмә апаны, чыннан да, балалары да, оныклары да кадерләп кенә тора, китап теле белән әйткәндә, өрмәгән җиргә дә утыртмыйлар.
— Ә шулай тиеш тә, — дип әбиләре турында сөйләп китте оныклары. — Әби безнең бик хәрәкәтчән, ару–талуны белмәс, җитез иде. Безне ул тәрбияләп үстерде. Һәрвакыт ачык ишеккә, пешкән ризыкка кайттык. Биш вакыт намазын калдырмады. Әле дә кулыннан дини китаплар төшми. Исән – сау булып, әле тагын күп еллар безне догаларыннан калдырмасын, саклап, яклап торсын иде.
Бибикаюмә апа Кышкарда туып–үсә. Әтисе Фәйзрахман абый кибетче була. Тырыш гаилә сугыш елларында да ачлык кичерми, сыерларын да бетерми. Буй җиткән кыз әтисе янында кибеттә эшли башлый. Шунда таныша да инде ул Мәңгәргә барып колхоз төзеп йөргән Ашытбаш егете Мостафа Шәймәрданов белән. Өйләнешеп гаилә коралар.
— Аннан әтине Әтнә райкомына эшкә алалар. Гаилә Әтнәгә килеп урнаша. Мин 1939 елны шунда тудым, — ди Риф абый. — 1942 елны әти сугышка киткәч, әни ике баласын (1941 елгы бала да бар иде, ул авырып вафат булды) алып, туган нигезенә күчә. Безнең бәхеткә, әти сугыштан исән–сау кайтты. Сельпода эшләде. Тик гомере озын булмады, 1958 елны әнине биш бала белән тол калдырып, якты дөньядан китеп барды. Кыска вакытлы курсларда укыган ханым гомере буе ясле, балалар бакчасында тәрбияче булып эшли. Бик тырыш, пөхтә, барына да өлгер хатын була ул. Аш–суга осталыгы белән аерылып тора, заманында авылда бик күп кешегә туй табыннары әзерли.
— Балалары, оныклары да үзе кебек искиткеч тырышлар. Әби аларны кечкенәдән эшкә өйрәткән. Өйдә бер бөртек тузан да тотмыйлар. Сокланырлык, — ди Мәскәүдән кайткан Риф абый кияве Шамил. — Безнең балалар монда үсте. Кайчак утызар кеше җыела идек.
Улы Рифның хатыны — килене белән 50 елдан артык тату гомер итә Бибикаюмә апа. Тик узган ел декабрь аенда Галия апа кызы Миләүшә белән юл һәлакәтендә вафат була. Риф абый ул чакта әнисе бәхетенә генә исән калгандыр да.
— Әбигә 100 яшь тулган көнне айлап түгел, көнләп санап көтте әни. Тик бу көнне күрү генә насыйп булмады үзенә. — ди Розалия. — Әнине бик сагынабыз. Әби дә төннәрен уянганда безгә әни исеме белән дәшә.
Бибикаюмә апа Мортазинаны олы юбилее белән котларга район башкарма комитеты җитәкчесе Илшат Нуриев, халыкны социаль яклау бүлеге җитәкчесе Илдус Әһлиев, Ташкичү авыл җирлеге башлыгы Фәһим Фәйзуллин килгән иде.
— Кара, ул да мине белә икән, — диде Бибикаюмә апа, Россия Президенты Владимир Путинның Котлау хатын тапшыргач. — Дөньялар имин булсын, сугыш афәте килмәсен, тыныч таңнар гына атсын иде.
Гөлсинә Зәкиева