Яшь кулибинчы Мөндештә яши

Яшь кулибинчы Мөндештә яши
Түбән Мәтәскә урта мәктәбенең 9 сыйныф укучысы Илмир Хәбибуллин “Мәгариф” журналының Татарстан уйлап табучылар һәм рационализаторлар җәмгыяте белән берлектә оештырган “Яшь кулибинчылар” ның 46 укучы катнашкан бәйгесендә беренче урынны яулады.
Беркөн дәрес вакытында укытучысы кереп сыйныфташлары алдында сөенче ала Илмирдан: “Кулибинчылар бәйгесендә син 1 урынны алгансың”.
– Ышанмадым, беренче урын түгелдер, ялгыш әйтәдер дип уйладым. Аннан берничә көн үткәч, бу хакта “Арча хәбәрләре”ндә басылып чыкты, шуннан соң гына ышандым, — дип сөйли Илмир.
Бәйгенең катлаулы сорауларына җавап бирүдән тыш, Илмир техник сәләтеңне ачып бирү дигән өлешенә тычкан тәбесен тагын да уңайлырак каптыру җайланмасы итеп үзгәрткән. “Уртасына кызыктырырлык итеп нәкъ элеккечә ризык куярга кирәк. Ләкин тиеп кенә китсә дә, тычканны шундук эләктереп ала бу җайланма, берничек ычкына алмаячак”, — дип тәбене күрсәтеп аңлатып сөйли егет. Илмир Мөндештә яши. “Бик актив егет, укуы да әйбәт, җәмәгать эшләренә дә өлгерә, сәнгатьтә катнашырга да иң беренче ул, нәрсә кушсаң да, карусыз эшли. Үзе дә бик кызыксынучан”, — дип мактый укытучы Лилия Мәннанова. Конкурска да Илмир үзлегеннән әзерләнгән. Белмәгәннәрен генә укытучысы Гамир Фазылҗановтан сораган. Тәбене ясауда да аның киңәше ярдәм иткән. Гомумән, Гамир Фазылҗанов кебекләр балалар белән бар күңелен биреп эшли. Аның кебек хыялый, эзләнүчән, юкны да бар итеп, һәр нәрсәнең файдалы ягын күрүче сәләтле укытучылар үзе артыннан әнә шундый сәләтлеләрне ияртә ала торгандыр.
Узган атнада Түбән Мәтәскә мәктәбендә бәйгене оештыручыларның республика күләмендәге конференциясендә Илмирга һәм аның укытучысы Гамир Фазылҗановка Диплом һәм истәлекле бүләкләр, укытучыга күкрәк билгесе тапшырылды. Яшь уйлап табучыларны котларга мәктәпкә район башкарма комитеты җитәкчесе Илшат Нуриев, район мәгариф идарәсе җитәкчесе Зөлфәт Дәүләтбаев, фән галимнәре, эзтабарлар килгән. Бәйгедә катнашкан Балтач, Кукмара, Мамадыш, Әтнә, Менделеев районы һәм безнең район укучылары яңа белемнәр туплавын әйтә.
Яшь кулибинчылар өченче ел рәттән — безнекеләр. Ике ел рәттән 1 урынны Яңа Кенәр укучылары алган иде. Мәтәскәлеләр дә төшеп калганнардан түгел, әлбәттә, узган ел Илназ Фәсхетдинов 3 урынга лаек, Айнур Сабиров лауреат була. Бүгенге конференциягә мәктәпнең 2010 елгы чыгарылыш укучысы — Илмирның туганнан–туган абыйсы — Казан архитектура–төзелеш университетында белем алучы Фәнил Хәбибуллин да килгән. Илмир абыйсы белән горурланам, дип юкка әйтми икән — Фәнилнең кулында юлларга бәйле җайланмаларны уңайлаштыру буенча уйлап табучы дигән документ бар. Ул укучыларга әлеге өлкәдәге тәҗрибәсе турында сөйләде.
Бүген уйлап табуга сәләтлеләр “Яшь уйлап табучылар” (җитәкчесе жюри рәисе, Татарстанның атказанган уйлап табучысы Ринат Нуруллин), “Яшь тарихчылар” (җитәкчесе тарих фәннәре докторы, археолог Фаяз Хуҗин), “Яшь эзтабарлар” (эзтабар язучы Шаһинур Мостафин), “Укытучылар остаханәсе” (җитәкчесе “Мәгариф” журналының мөхәррире Таһир Сабирҗанов) дип аталучы осталык классларында әңгәмә кору аларга белемнәрен ныграк аңларга ярдәм итте.
Гамир Фазылҗанов идеяләре белән булышып, мәктәп коллективы бар мөмкинлеген биреп ярдәм итеп торганда мәктәптә кулибинчылар киләчәктә дә үзләрен күрсәтер әле. Ә мондый бәйгеләрнең кирәклеген районыбызның бәйгедә катнашкан һәр мәктәп укытучысы әйтә. Яңа Кырлай мәктәбенең физика укытучысы Шамил Хәбриев әйткәнчә, киләчәктә илнең инженер–техник потенциалын арттыруга гына түгел, балаларның идеяләрен тормышка ашыру, төрле яктан сәләтле, тырыш, эзләнүчән буын тәрбияләү өчен дә мөһим мондый бәйгеләр.
Розалия Зиннәтова