Сез безгә бик кирәк

Сез безгә бик кирәк
Айванда сугыш һәм тыл ветераннарына “1941–1945 елгы Бөек Ватан сугышында Җиңүнең 70 еллыгы” медале тапшыру тантанасын Арчаның 7нче мәктәбе актлар залында чәй өстәле артында оештырдылар.
— Җирлектә 34 ветеран бар иде. Шуларның 32се тылныкы, берсе сугыш ветераны. Ә тагын берсе, Мәхмүт Ахунов, күптән түгел генә вафат булды, — ди мәктәп директоры Альмира Гатауллина. — Бәйрәмгә шуларның тугызы гына килә алды. Дөресрәге, автобус, машина белән алып килүне оештырдык. Чөнки аларның иң яшенә хәзер 84–85 яшь, ә иң өлкәне — Әсмабикә Гатауллинага 89 яшь.
Тантанага шәһәр башкарма комитеты җитәкчесе Рафил Исмәгыйлев та килгән иде. Ул ветераннарны бәйрәм белән котлады, аларга медальләр һәм бүләкләр тапшырды.
Укытучылар һәм югары сыйныф укучылары көче белән ветераннар өчен бик матур кичә булды. Ул “Сугыш шулай башланды” дигән әдәби–музыкаль композиция белән башланып китте. Мәктәптә чыгарылыш кичәсе, 22 июнь – егет белән кызның вәгъдәләшкән һәм … сугыш башланган көн … Өлкәннәр бу күренешләрдән үзләренең авыр сугыш чорына туры килгән кадерсез балачакларын, михнәтле яшьлекләрен искә төшереп, елап утырды. Татар теле һәм әдәбияты укытучысы Лилия Шәфигуллина башкаруындагы өч улын фронтка озатып, икесен яу кырында югалткан ана язмышы турындагы шигырен дә күз яшьләрсез тыңлап булмады. Әниләрнең тынычлык турында сөйләгән шигырьләре моңа бүгенге көннең кайтавазы булып яңгырады. “Ә биредә таңнар тын” кинофильмыннан җырлы күренеш тә әлеге чыгышларга аваздаш булды.
— 1944 елда һава шартлары начар булуы сәбәпле, ике самолетның егылып төшүе, 6 очучының 5се һәлак булуы турында арчалыларга мәгълүм. Без, шуның буенча эзләнү эшләре алып барып, мәгълүматлар туплый алдык. Хәзер аларның каберләрен карап торабыз, — ди Альмира Гатауллина. — Бу бәйрәмдә шәмнәр кабызып, аларны да искә алдык.
Тантанага килгән ветераннар бик канәгать калды. 86 яшьлек гомере буе шәфкать туташы булып эшләгән Александра Федотова үзе язган шигырен укыды. Әсмабикә апа өлкәннәргә шундый олы игътибар күрсәткәннәре өчен зур рәхмәтен белдерде. Аңа кушылып Тәвилә Кәримуллина да үз сүзләрен җиткерде.
— Татарстан, хәтта Россия Президентлары да безне белә, Рәхмәт хатлары җибәреп тора. Район җитәкчеләре ветераннарга зур хөрмәт белән карый. Рәхмәт аларга. Хәзер халык бай яши, берни дә кирәкми. Яшьлегебез авыр чорга туры килсә, картлыгыбыз бик рәхәт. Балалар да нинди бәхетле тормышта яши. Карагыз бу мәктәпкә, җәннәт бит. Тыныч тормышның кадерен белеп кенә яшәргә кирәк. Иң мөһиме — сугышлар булмасын, — диде ул.
Мәктәп коллективы апрель аенда да бу зур датага багышлап чаралар планлаштыра. Шуларның берсе “Сугыш урлаган балачак” дигән тема астында үтеп, сугыш чоры балаларына багышланачак.
Ул көнне мәктәпкә тантанага килә алмаганнар да читтә калмады. Рафил Исмәгыйлев авылда яшәгәннәренең өйләренә барып, бүләкләрен тап- шырды. Сугыш ветераны Габдуллаҗан Шәйхиев һәм хатыны, тыл ветераны Мөнирә апа белән дә ул аларның өйләрендә очрашты.
— Бөек Җиңүнең 75 еллыгын да бергә каршыларга насыйп булсын. Яшәгез генә. Сез безгә әле бик кирәк, — диде ул, ветераннарга мөрәҗәгать итеп.
Гөлсинә Зәкиева