Зур планнар белән яшиләр

Зур планнар белән яшиләр
Безнең районда фермерлык хәрәкәтен башлап җибәрүчеләрнең иң беренчесе Көтек авылында яшәүче Дамир Шакирҗанов булды.
Ул, башта ук хуҗалыгында күп итеп терлек асрап, аннан соң элекке колхозның бушап калган терлек каралтыларын алып уңышлы эшли башлады. Аларны төзекләндерде, яңасын төзеде.
Соңрак Түбән Мәтәскәдә берничә кеше гаилә фермалары төзүгә алынды. Шулар арасында Айдар Сабировның фермер хуҗалыгы аерылып тора.
31 мартта “Татарстанныкын сатып ал” акциясе кысаларында Түбән Мәтәскәгә Казаннан бер төркем журналистлар килеп төште. Алар Сабировлар фермер хуҗалыгының эшчәнлеге белән таныштылар. Айдар Фәрит улына, аның хатыны Гөлназга шактый сорауларга җавап бирергә туры килде.
— Гөлназ әлегә балалар янында (өч балалары бар), шулай да кирәк булганда булышырга вакыт таба, — диде Айдар Сабиров.
Республикада гаилә фермалары төзү буенча программа кабул ителгәч, алар гаиләсе шуның нигезендә сөтчелек фермасы төзүгә алынды. Фермада барлык эш механикалаштырылган. Бозаулату, төрле зурлыктагы бо- заулар өчен бүлекләр бар. Торакларда коры, якты, саф һава.
Буш урында күтәрелгән әлеге тораклар республика һәм район җитәкчелегенең ярдәме белән төзелде. Төзү–монтаж эшләре чыгымнарының бер өлешен кайтару максатында республика һәм район бюджетларыннан берәр миллион сум акча бирелде. “Лизинг–грант” программасында катнашып, трактор, 60ка 40 программасы буенча туфрак эшкәртү һәм азык әзерләү техникасы алдылар. Фермага кадәрге 600 метр юлга бетон җәелде.
Фермада 140 баштан артык мөгезле эре терлек бар, күбесе сыерлар. Сөтне Казанда ярминкәләрдә, агросәнәгать паркында саталар, Арчада өйгә китереп бирәләр.
Фермер хуҗалыгында азык әзерләүгә зур игътибар бирелә. Төрелгән сенаж — иң яхшы ысул. Маллар алдындагы хуш исле сенажны чәйгә салып эчәрлек.
Алга таба планнары зурдан, Казанбашта 400 башлык сыер торагы торгызырга исәплиләр. Башка планнары да бар, алары ничек тормышка ашыр — монысын киләчәк күрсәтер.
Ильяс Фәттахов