Тукай һәм сәнгать гел бергә

Тукай һәм сәнгать гел бергә
Арча сәнгать мәктәбе бу көнне гөр килеп торды. Габдулла Тукайның 129 еллыгына багышланган “Арча ягы — данлы Тукай ягы” дигән X Республика балалар иҗаты бәйгесенә Татарстанның 19 районыннан килгән музыка һәм сәнгать мәктәпләрендә белем алучы 300дән артык талантлы укучы, бар осталыкларын эшкә җигеп, бөек Тукай җирендә көч сынашты.
Конкурсның ел саен безнең районда узуының сере бар: аңа нигез салучы дисәң дә ялгыш булмас, төгәлрәге, тәүге тапкыр оештыруда башлап йөрүче — Арча сәнгать мәктәбенең элеккеге директоры Альберт Гайнетдинов. Бүгенге көндә бу кон- курска күпләр рәхмәтледер — катнашучы балаларның күңелләренә илһам биреп, яңа үрләргә этәргеч кенә ясап калмыйча, күпләрнең тормыш юнәлешен сайларга, музыка белән бәйләргә дә ярдәм иткән ул.
Арча сәнгать мәктәбе укучыларының талантлы булуы инде күптән рес- публика дәрәҗәсендә билгеле, аларның уңышлары районыбыз өчен горурлык. Быелгы бәйгедә дә һәр номинациядә безнекеләр алдынгы. Менә ул сәләтле яшьләр: баян, аккордеон, гармунда (соло) оста уйнаучылар булуын Фирзәр Камалиев һәм Рәсим Дәүләтбаев танытты (икесе дә 1 урында), алардан аз гына калышып Рүзәл Нигъмәтҗанов (3 урын) һәм Рәсим Хәбиб- рахманов, Ранил Хисамиев, Илназ Баязитов (дипломантлар) үзләренең осталыгын күрсәтте. Думбра, балалайка, гитарада да оста уйный безнекеләр. Вадим Кузнецов, Илдус Гайнетдиновның (икесе дә 3 урын) һәм Сусанна Фәйзрахманованың (дипломант), әлеге уен коралларында уйнап, республика дәрәҗәсенә күтәрелүе үзе нинди бәхет! Ә курай моңнарын җиткерүдә Данил Закиров белән Айбулат Харисовка тиңнәр булмады. Рената Хәсәнова (2 урын), Булат Садыйков (3 урын), Рабига Закирова (3 урын), Ранис Сабиров һәм Инсаф Галиәхмәтовның (дипломантлар) да кечкенәдән әлеге уен коралын үз итүе бүгенге конкурста җиңү яулау бәхетен бүләк итте. Фортепиано күп тырышлык таләп итсә дә, аңарда уйнау теләге моңлы күңелле балаларда бөреләнми калмый. Авырлыкларны җиңеп, тырышып өйрәнгәннәрне, әлбәттә, уңыш читләтеп узмый. Мәсәлән, бүген бәйгедә катнашкан Ләйлә Камалова (2 урын), Рузилә Нигъмәтҗанова (3 урын), Камилә Закирова һәм Иллария Шириеваны (дипломантлар). Күңел кылларына кагылып моң дәрьясында ураучы скрипканың телен аңлау сирәкләргә генә елмая. Әйтик, Зилә Гайнуллина кебекләргә. Бәйгедә Зилә 3 урынга лаек булды.
Безнекеләр сыната торганнардан түгел. Зур шәһәрләрдәге уку йортларының да “борыннарына чирттеләр” — ансамбльләр белән көч сынашуда ку- райчылар триосы 1 урын яуласа, гармунчылар дуэты 2нче, гитарачылар триосы 3 урынга лаек, ә курайчылар ансамбле дипломант булды.
Җиңүчеләр диплом һәм бүләкләрдән тыш рух күтәренкелеге, киләчәккә яңа хыяллар белән дә таралышты. Арча сәнгать мәктәбе директоры Гөлнара Сабирова конкурсның географиясе киңәюгә, популярлык казана баруына куануын яшерми.
— Быел катнашучылар күбрәк булды. Соңгы елларда балалар конкурсларда теләп катнаша. Үзебезнең мәктәпкә килгәндә, без җиңәргә яратабыз. Сәләтле укучыларыбыз, тырыш, булдык- лы укытучыларыбызның күмәк уңышлары ул. Быел конкурсның 10 еллыгы булды, киләсе елга Тукайның тууына 130 ел тула. Әлеге юбилей уңаеннан киләсе елга конкурсны үзенчәлеклерәк төсмерләр белән баетырга ниятлибез, — ди ул.
Розалия Зиннәтова