Айсылуның айлы кичләре

Айсылуның айлы кичләре
27 март — Халыкара театр көнен “Җидегән чишмә” Арча халык театры сәхнәдә каршы алды. Бу көнне ул тамашачыларга яңа спектакль премьерасын — башкорт драматургы Ибраһим Абдуллинның “Айсылуның айлы кичләре” дигән романтик драмасын тәкъдим итте.
Әлеге спектакль сугыш чорын үз эченә ала, Украина урманнарында качып яткан дошманнарга каршы көрәшкән совет солдатлары язмышы турында сөйли. Баласын, ахыр чиктә соңгы сөенече булган оныгын да югалткан Арина әби (Резеда Гарифуллина), кыенлыклар алдында баш имәгән, тормыш тәмен, яшәү ямен югалтмаган, иң авыр вакытларында шаяртып, көлеп үз–үзенә юаныч тапкан Марфа (Гөлсинә Зәкиева), беренче мәхәббәт хисен тулысынча татырга да өлгермәгән, дошман пулясы тарафыннан киләчәккә өмете өзелгән Олеся — Ай кызы (Лилия Баһавиева), төрле милләт вәкилләренең – грузин Сандро (Харис Сафин), башкорт егете, капитан Айбулатов (Раил Шәвәлиев), рус егете (Рафис Сәләхетдинов), татар егете, иптәш ефрейтор (Илдус Хәбибуллин), зенитчы кызлар (Гүзәл Нигъмәтҗанова, Альбина Зәйнетдинова, Зилә Зиннәтова) бергә дошманга каршы сугышуы — бар да сүрәтләнгән пьесада. Шатлык та, очрашу, кавышу да, мәхәббәт тә, үлем дә бар биредә. Әмма авторның төп фикере — халыкны һәрьяклап сынаган сугыш авырлыкларының кешеләрдәге аклыкны, сафлыкны юкка чыгара алмавы.
— Без бу спектаклебезне Бөек Җиңүнең 70 еллыгына багышладык, сугыш, тыл авырлыкларын үз башларыннан кичергән ветераннарыбыз хөрмәтенә сәхнәләштердек, — ди театрның режиссеры Рафис Сәләхетдинов. — Хезмәтебез безгә, бездән соң киләсе буынга тыныч тормыш, аяз күк йөзе бүләк иткән апа–абыйларыбыз, әби–бабаларыбызга мәдхия булып барып ирешсен иде.
“Айсылуның айлы кичләре”н Арча тамашачысы яратып карады. Ә артистларның уйнауларына бәяне көчле кул чабулар аша җиткерде.
Алкышлар артист халкын күккә чөя ала. Тамашачы басып кул чапса, анысы инде аңа бәхеткә тиң. 30 мартта “Җидегән чишмә” Арча халык театры “Айсылуның айлы кичләре”н Кәрим Тинчурин исемендәге татар дәүләт драма һәм комедия театрында куйды. Казан тамашачысы халык театры артистларын басып алкышлады, залдан репликалар аша аларга мактау сүзләрен җиткерде.
13 апрельдә бу спектакльне “Җидегән чишмә”леләр район Мәдәният йорты сәхнәсендә кабат күрсәтәчәк.


Сәхифәне Гөлсинә Зәкиева әзерләде