Игелек кыл, савап җый

Игелек кыл, савап җый
Аларның хезмәте дәрәҗәләр, мактаулы исемнәр, уңышлар белән исәпләнми. Иң зур бәя – эшләгән изгелегеңә рәхмәт сүзләре ишетү.
Алар мохтаҗларга, өлкәннәргә йорт эшләрендә генә булышып калмый, иганәчеләр табып инвалид балаларга бәйрәмнәр оештыра, өйләренә барып хәлләрен белешә, аң-белем дәрәҗәсен үстерүгә бәйле шөгыльләр оештыра, табигатьне саклау акцияләрендә үрнәк күрсәтә, чишмәләрне чистарту, тирә-якны яшелләндерү һ.б. кебек күмәк эшләрдә башлап йөри. Волонтерларның башкарган эшен санап бетерерлек түгел. Бөтен хезмәтләрен бары бер адым берләштерә – игелек кылу, изгелек эшләү.
Волонтерлар үзәге моннан өч ел элек Арча педагогика көллияте базасында оешты. Шул чакта студентлар аның координаторы итеп 2нче курс студенты Рамилә Диярованы сайлаган иде. Һәм ялгышмаганнар. Рамилә, әлеге игелекле хезмәткә баш-аягы белән чумып, тәм табып эшли башлады. Оешкан чакта Алабугадан килеп өйрәткәннәрен, район Мәрхәмәтлек үзәге хезмәткәрләре белән бергәләп өйрәнгәннәрен яхшы хәтерли алар. Төн йокысыз тырышулар да бушка китмәгән. Никадәрле рәхмәт ишетеп җаннарына рәхәтлек иңде, савап җыйды бит алар. “Күз яшьләре аша рәхмәт әйтүчеләр күп. Кешедән ишеткән рәхмәт безгә канатлар куя”, – ди Рамилә. Быел ул диплом алачак. Ләкин игелек кылуын ташларга җыенмый. “Укып бетергәч, Арчада калам. Волонтерлык эшен тагын да киңәйтергә ниятлибез. Мәктәпләрдә отрядлар булдырып, бәлки, волонтерлар агентлыгы да оештырырбыз”, – ди.
Үзәккә үзе теләп ихластан игелек кылырга теләүчеләр гел килеп тора, укып бетерүчеләр китә, алмашка яшьләр килә. Бүгенге кичәдә яшьләрне тантаналы шартларда үзәккә кабул итеп алдылар. Волонтерларны башкалардан киемнәре ярдәмендә аерып була – “волонтер” тамгасы салынган ак футболка һәм зәңгәр галстук. Яшь волонтерлар алда үзләрен ни көткәнен белә микән соң? “Әлбәттә, беләм, – ди Алисә Насыйбуллина. — Үзәккә рәсми кабул ителгәнче үк игелек кылу эшләреннән читтә түгел идем”. Алисә Арча педагогика көллияте каршындагы 8нче гимназия сыйныфында укый. Иптәш кызы чакыруы буенча бирегә укырга килгән Казан кызының игелек кылырга вакыты күп булачак, димәк. Бары теләк кенә булсын.
Волонтерларның шатлыгын уртаклашып, үзәкне туган көне белән котларга килүчеләр күп булды. ТР волонтерлар союзы рәисе, район мәдәният идарәсе җитәкчесе, “Бердәм Россия” партиясе, Мәрхәмәтлек үзәге, “Яшь гвардияче” штабы вәкилләре... Бу оешмалар да һәммәсе волонтерлар хәрәкәтендә катнашып яши. Үзәкнең туган көн бәйрәмен педагогика көллияте укучылары җыр-биюле чыгышлары белән бүләкләде.
Игелек кылу – күләме бизмәннәргә салып үлчәнми торган саваплы гамәл. Ә инде хезмәтеңне күреп тә калсалар... Аннан да зур бәһа юк. Бәйрәм кичәсендә Рамилә Диярова 18нче “Мактаулы волонтер” санына лаек булды. Мондый саннарны Татарстанда һәм Россия күләмендә игелек кылу хәрәкәтен үстерүдә зур өлеш кертүчеләр йөртә.
Бу Рамилә өчен игелек кылу хезмәтенең башлангычы гына, киләчәктә аның ярдәмен тоеп яшәүчеләрнең саны бихисап булыр әле.
Розалия Зиннәтова