Сугыш турында җырлыйбыз

Сугыш турында җырлыйбыз
Сугыш чоры җырлары… Күпме алар, йөрәкләргә үтеп кереп, күңелләрдә ярсу да, шатлык та уятучы көйләр. Кайберләрендә җиңелү ачысы ярылып ята, икенчеләре җиңү шатлыгын бәйрәм итә, өченчеләре сагыну, туган якка, аналарга, сөйгән ярларына мәхәббәт хисләре белән сугарылган.
70 ел үтеп китүгә карамастан, алар онытылмый, кайберләрен хәтта хәзер дә күз яшьләрсез тыңлап булмый. Узган шимбәдә булган сугыш чоры җырлары бәйрәмендә яңгыраган көйләр тамашачы күңеленә шулай тәэсир итте.
Арча сәнгать мәктәбендә үткән “Бөек батырлык җырлары” исемле патриотик җырлар бәйге-фестивале Бөек Ватан сугышының 70 еллыгына багышланды. Аны яшьләр эшләре, спорт һәм туризм бүлеге, мәгариф, мәдәният идарәләре, “ТНВ” иҗтимагый хәрәкәте белән берлектә “Бердәм Россия” сәяси партиясе җирле бүлекчәсенең патриотик тәрбия буенча яклаучылар советы һәм “Бердәм Россиянең Яшь гвардия” штабы оештырды. Бәйгедә мәктәп укучылары һәм уку йортлары студентлары катнашты. Ул вокал-соло, вокаль ансамбль, дуэт, трио, сәхнәләштергән җыр номинацияләре буенча үтте. Жюри артистлык осталыгын да, башкару дәрәҗәсен дә, сайлап алынган репертуарның үзенчәлеген дә, героик-патриотик тематикага туры килүен дә, костюмнар, реквизитларны да исәпкә алды. Сугыш чоры җырлары концертын “Бердәм Россиянең Яшь гвардия” Арча җирле бүлекчәсе җитәкчесе Лия Ильина белән “ХХI гасыр яшьләре” клубы җитәкчесе Руслан Галәветдинов алып барды.
Соңыннан җиңүчеләре дә билгеле булды. Аерым җыр буенча беренче урыннар Арча сәнгать мәктәбеннән Мөнир Мәрдәнов (җитәкчесе Гүзәл Минхаерова), Арчаның беренче мәктәбеннән Инсаф Гаптелбәров (Татьяна Кинозерова), Арча педагогика көллиятеннән Анна Динисовага (Альбина Шакирова) бирелде. Икенче урыннарда балалар сәнгать мәктәбеннән Алинә Галимуллина, Арча агросәнәгать көллиятеннән Раил Бакыев, өченче урыннарда сәнгать мәктәбе укучысы Гүзәл Закирова белән педагогика көллиятеннән Маннур Вилданов. Көллияттән Альбина Шакирова җитәкчелегендәге “Мирэль” вокаль ансамбле “Ана турында баллада”ны искиткеч матур башкарды һәм вокаль ансамбльләр арасында лаеклы рәвештә беренче урынга чыкты. Арча сәнгать мәктәбенең “Гүзәлкәй”е – икенче, беренче мәктәпнең “Романтиклар”ы – өченче. Дуэтлар арасында да җиңүчеләр билгеле булды. Наласа мәктәбеннән Гөлгенә Кәлимуллина белән Камилә Нәҗметдинова дуэты (Миләүшә Төхвәтуллина) “Кайтып керегезче” җыры белән сокландырды һәм беренче булды, икенче урынны яулаган Хәсәншәех мәктәбе укучылары Зәринә һәм Лилия Хәйретдиновалар “Катюша”сы (Айрат Таҗиев) тамашачы алкышларына һәм призлы икенче урынга лаек булды.
Сәхнәләштерелгән җырлар да уңышлы чыкты. Педагогика көллиятенең “Патриот” клубына (Алинә Гыйлаҗева), сәнгать мәктәбенең “Энҗеләр”енә (Тайфә Гидиятуллина) – беренче, җиденче мәктәптән Илүзә Гатауллинага – икенче, Иске Ашыттан Рамазан Лотфуллинга өченче урын бирелде. Өчиледән Рәзинә Җамалиева, Сеҗедән Иллария Габдрәшитова, Язилә Тимершәехова белән Адилә Нигъмәтҗанова, педагогика көллиятеннән Данир Фатыйхов, Түбән Мәтәскәдән Ришат Фазылҗанов, Энҗе Шиһабиева, сәнгать мәктәбеннән Ралинә Һадиева, Яңа Кырлайдан Ания Галимҗанова, Иске Чүриледән Эльмира Хәсәнованы аерым номинацияләр буенча җиңүчеләр буларак билгеләп үттеләр.
Гөлсинә Зәкиева