Кыенлыкларга карамастан

Кыенлыкларга карамастан
Республиканың Авыл хуҗалыгы һәм азык-төлек министрлыгы вәкиле Ренат Гатиятов район белгечләре белән хуҗалыкларда язгы-кыр эшләренә әзерлекне карады һәм конкурска йомгак ясадылар.
– Кыенлыклар булуга карамастан быел узган ел белән чагыштырганда әзерлек яхшырак, – диде алар.
“Арча” агрофирмасы” ширкәте үзәк машина-трактор паркында эшләүчеләр:
– Быел әзерлек былтыргыга караганда күпкә уңай, – дип сөйләделәр. – Бүлекчәләрдәге техниканы шушында рәтләдек.
“Арча” агрофирмасы” ширкәте “Төрнәле” бүлекчәсендә булганнан соң комиссия: “Төрнәле”дә алга китеш сизелә”, – дигән бәяне бирде.
“Ватан” агрофирмасы” ширкәте амбарларында район авыл хуҗалыгы һәм азык-төлек идарәсе бүлек җитәкчесе, агроном Миннәхмәт Сәгыйтьҗанов:
– Менә симәнә нинди булырга тиеш! Агрономның нинди икәнен беләсең килсә, симәнәсен кара, – диде.
Татарстанның атказанган агрономы Габдерәис Рамазанов 1981 елдан шушы хуҗалыкта эшли.
– Басу-кырлардан, тургай тавышыннан башка яши алмыйм, – ди баш агроном Габдерәис Рамазанов. – Эшкә тотыныр алдыннан китапны бер кат актарып чыгам. Бүген чәчүгә орлык әзер, биопрепаратлар җитәрлек. Чәчәр алдыннан симәнәне биопрепаратлар белән эшкәртәбез. Болай эшләгәндә үсемлек җир куенына күчкәндә стресс кичерми, үсеп киткәндә корылыкка бирешми, һавадагы азотны җиңел үзләштерә һ.б. Чәчүлекләрне авыртуларга бирешмәс өчен фунгицидлар белән эшкәртәбез.
“Татарстан” агрофирмасы” (җитәкчесе Рүзәл Мәрдәнов) ел саен язгы-кыр эшләренә тиешенчә әзерләнә. Казанга якын булуга карамастан, хуҗалыкта механизаторларның саклануы уңай күренеш.
“Северный” агрофирмасы” машина-трактор паркында:
– Монда әзерлек семинар үткәрерлек дәрәҗәдә, – дигән бәяне бирделәр.
– Яңа елга кадәр үк әзер идек инде без, – ди баш инженер Самат Йосыпов.
Язгы-кыр эшләрен башкаручы һәр техника тулы комплектта берсе артыннан берсе тезеп куелган. Алар бүген кузгалып китәргә әзер.
Шушы ук күренеш “Игенче” агрофирмасы”нда да (Наласа) күзәтелә.
“Мәрҗани” агрофирмасы” ширкәте бүлекчәләре тракторлары үзәккә – Ташкичүгә җыелган иде. Барлык техниканың бер рәткә тезелеп куелуы һәм механизаторларның бергә җыелуы агрофирманың куәтен күрсәтә.
“Ак барс” агрокомплексы”ның Курса-Почмак машина-трактор паркында баш инженер Айдар Исламов:
– Нигездә язгы-кыр эшләренә әзерлек бетте, – дип сөйли. – Ягулык-майлау материаллары, техника җитәрлек, тик менә запчасть бәясе генә артып китте.
Тимерче Илсур Галиәхмәтов, эретеп ябыштыручылар Васыйл Шиһапов белән Рифат Вәлиев уены-чыны белән:
– 70 төрле һөнәрнең 69ын эшлибез инде, – диләр.
Язгы-кыр эшләренә әзерлек буенча “Северный” хуҗалыгына (җитәкчесе Рөстәм Хәйруллин) – беренче, “Игенче” хуҗалыгына (директоры Заһит Шаһимуллин) икенче урын бирелде. Конкурста җиңүчеләргә яңа техника алган вакытта дәүләт ярдәме булачак. Симәнәне тиешле югарылыкта әзерләгәннәре өчен “Ватан”, “Ак Барс” агрокомплексы”, “Игенче” агрофирмасы” аерым билгеләп үтелде.
Румия Надршина