Урамнарда – тарих

Урамнарда – тарих
14 апрель көнне яшьләрнең әләмнәр тотып Арча урамнары буйлап йөгереп узганын күпләр гаҗәпләнеп күзәткәндер, мөгаен. Арча педагогика көллияте ишегалдыннан старт алган йөгереш Бөек Җиңүнең 70 еллыгына багышланган “Геройлар урамнары” акциясе кысаларында узды.
Көллият студентларына Арчаның гуманитар техникум, КСЮИ, Арчаның 1, 2 мәктәпләре һәм 5нче гимназиясе укучылары кушылды. Алар Советлар Союзы Геройлары исемнәрен йөрткән урамнарда тукталып, волонтерлардан әлеге Геройлар турында мәгълүмат алды. Соңгы тукталыш шәһәр үзәгендәге һәйкәл янында иде. Биредә яшьләрне район яшьләр эшләре, спорт һәм туризм бүлеге җитәкчесе Зиннур Сәгыйтов һәм “Бердәм Россия” партиясенең җирле бүлекчәсе башкарма комитеты җитәкчесе урынбасары Валентина Гаранина каршы алды.
Валентина Гаранина барлык яшьләрне, яшь гвардиячеләрне 25 апрельдә район күләмендә узачак өмәгә чакырды. “Бу көнне район җирлегендәге (Арча районында алар 78) барлык һәйкәлләр, аларның тирә–юне чистартылачак. Бу хезмәт десантыннан яшь буын читтә калмасын иде”, — диде ул.
“Бүгенге “Геройлар урамнары” акциясендә 200дән артык яшь кеше катнашты. Һәркем үзе теләп алынды, — ди Арча Укучылар сараенда эшләп килүче “XXI гасыр яшьләре” клубы җитәкчесе Руслан Галәветдинов. — Районыбызда спорт сөюче халык яшәгәнгә, сәламәт яшәү рәвешенә нык басым ясала. Мондый рухтагы йөгерешләрне киләчәктә ел саен апрель аенда Бөтендөнья сәламәтлек көне уңаеннан уздыруны гадәткә кертәчәкбез”.
Яшь буынга үткәннәрне аңлату зарур. Тарих — үткәнебез, киләчәккә — сабак, гыйбрәт. Бүгенге акциядә катнашучыларның күбесе үзләре өчен яңалык алмый калмагандыр, мөгаен. Мәсәлән, педагогика көллиятенең 1 курсында укучы Адилә Сәмигуллина кебек. “Спорт миңа бик якын, чөнки физкультура төркемендә укыйм. Ә Геройлар исемнәре бирелгән урамнарның тарихын тирәнтен белми идем”, — ди ул.
Акциядә катнашкан яшьләрнең күңелендә, һичшиксез, Арчаның Геройларга бай шәһәр булуына горурлану хисләре уянмый калмагандыр.
Розалия Зиннәтова