Тапкан түгел, баккан ана

Тапкан түгел, баккан ана
Телетапшыруларда чит ил гаиләләрендә тәрбияләнгән яшьләрнең Россиядә үз әти-әниләре белән очрашуын еш күрсәтәләр.
Соңгысында дүрт балалы гаиләне гыйбрәтләнеп карадык. Ике баланы чит ил гаиләсе алып тәрбияләп үстергән. Алар җәмгыятькә файда китерерлек акыллы яшьләр булып өлгергән. Ә безнең илдә калган икесенең берсе төрмәдә, икенчесе психоневрология интернатында.
Баланың яхшы кулга эләгүе кирәк шул. Мин моңа Яңа Кишет авылында Рәисә белән Зиннур Мозаффаровлар гаиләсендә булганнан соң тагын бер кат инандым. Район опека һәм попечительлек секторы мөдире Рафия Яруллина: “Гаҗәеп гаилә бу”, – дип таныштырды безне.
Районда барысы 97 ятим һәм караучысыз калган бала исәпләнә. Шуның 55ен әби-бабасы, туган-тумачасы карый, 42се чит гаиләдә тәрбияләнә.

Рәисә ханымны күрүгә танып алдым. Балаларны тәрбиягә алган гаиләләрне район опека һәм попечительлек секторы электән җыеп тора. Бу мөлаем ханымның ике нарасыйны ике ягына сыендырып утырганын яхшы хәтерлим. Инде малайлар үскән, Данил 6 сыйныфта укый, Руслан – 4 сыйныфта. Икесе дә уеннан кайтып, компьютер каршына утырдылар. Ике катлы йортта барлык уңайлыклар да бар. Җылы бәдрәф, мунча, автомат кер юу машинасы эшләп тора.
– Урамнан юешләнеп, пычранып кайтсалар, киемне шушында, мунчага гына куялар, – ди Рәисә ханым.
– Безнең әни тәмле пешерә, – ди малайлар. – Пилмән, өчпочмак, мантыйны бик яратабыз.
Бүген дә әниләре пилмән, өчпочмак пешергән.
Мозаффаровларның үзләренең өч баласы (Илнур, Алсу, Раилә) инде үсеп җитеп, үз тормышларын булдырган.
– Шушы зур өйдә икебез генә нишләрбез, дип, ятимнәрне тәрбиягә алырга булдык, – дип сөйли гаилә башлыгы Зиннур. – 2007 елда ике бертуган малайны алып кайттык.
– Олысына – 5, кечесенә 3 кенә яшь иде, – дип сөйли Рәисә ханым. – Кечкенәсе юньләп утырып та тора алмый иде, ябык, бик зәгыйфь иде. Республиканың балалар клиникасында дәваланып чыктык. Хәзер ярый инде.
Руслан әнисен кочаклап алды. Бу сыенуда шулкадәр якын итү, ярату иде – гаиләнең көче менә шушында инде! Бу тойгыларны исерек әти белән әни дә, балалар йорты да бирә алмый. Рәисә ханымның үзенең дә күңеле тулып китте. Балага әти-әни кирәк шул, юньлесе кирәк.
– Шушы балаларны үстереп кеше итү өчен Аллаһы Тәгалә гомер бирсә иде, дип телим, – ди 53 яшьлек Рәисә ханым. – Аллага шөкер, иптәшем Зиннур бик әйбәт кеше. Бер сүгенү сүзе юк. Балаларга кычкыруны белми.
Рәисә ханым балалар бакчасында мөдир булып эшләп, хәзер сәламәтлеге буенча өйдә. Үз әнисе дә, тагын бер өлкән апалары да яннарында. Иптәше Зиннур ремонт эшләре белән мәшгуль.
Без үзебез дә изге теләктә. Аларга тигезлек белән шушы балаларны үстерергә насыйп итсен.
Румия Надршина