Язучы килде

Язучы килде
Арчаның китап сөючеләре шушы көннәрдә тере язучы – татар хатын-кызлары арасында тәүге роман язучы буларак танылган, күп кенә повесть-роман, хикәяләр авторы Мәдинә Маликова белән очрашты.
Очрашу кичәсе башланганчы Мәдинә ханым Арчаның үзәк китапханәсендә китап киштәләрен күзәтеп йөрде. Китапханәнең бай, укучылар өчен шартлар тудырылган булуы язучыны бер сокландырса, киштәдә үзенең таушалып беткән китапларын күргәч, шатлык хисе йөзенә чыкты. Язучы өчен иң кадерлесе – үз китапларын кулдан-кулга йөртеп таушалып беткәнче укыганнарын күрү.
Ә Мәдинә ханымның китапларын арчалылар ярата. Китапханәдә “Иң күп укыла торган китаплар” исемлегендә хатын-кызлар арасында Мәдинә Маликова ничә ел инде беренчелекне бирми.
Үзәк китапханәнең уку залы әдәбият сөючеләр белән шыгрым тулы. Мондый кичәләр әдәбият сөючеләр, китап укучылар өчен тансык, язучы белән күзгә карап сөйләшү, сорауларыңа җавап алу мөмкинлеге, уртак фикерләр, аралашыр өчен уртак тема бар. Бүген нәкъ шулай булды да. Мәдинә Маликованың әсәрләре буенча фикер алышу вакытында укучылар бер–берсен бүлдерә–бүлдерә фикерләрен белдерде. Укучыларының яратып баккан карашларын күрү, әсәренең эчтәлеге буенча куерган җылы рухтагы бәхәсләр әдипләр күңеленә “сары май” булып ята. Мәдинә ханым да бу турыда куанычын яшермәде. “Арчада минем иҗатымны белүче, китапларымны яратып укучылар яши икән. Иҗатым белән тирәнтен таныш булган укучыларым белән аралаштырган өчен рәхмәт”, – дип китапханәчеләргә ихлас рәхмәтен белдерде ул. Гомумән, арчалыларга рәхмәтле әдибә. Бөтентатар Кызыл Ай җәмгыятенең президенты буларак та. Ике дистә еллар элек авыр тормышта яшәүчеләргә, мохтаҗларга ярдәм күрсәтүдә Арча районының ярдәме турында һәрвакыт рәхмәт хисләре белән сөйли ул.
Очрашуда авыл китапханәчеләре һәм Факия Шәрәфетдинова башкаруында яңгыраган җырлары ямь өстәде. Факия апа Мәдинә ханымның тормыш иптәше, шагыйрь Әхмәт Рәшит сүзләренә язылган “Беренче мәхәббәт” җырын башкарды.
“Ике тәкә башы бер казанга сыймый”, дигән әйтем Мәдинә Маликова белән Әхмәт Рәшит гаиләсенә кагылмый сыман. “Бер казанда кайнаганга безнең уртак фикерләр күп, киресенчә, бер-беребезгә тәнкыйть-киңәшләр белән ярдәмләшеп яшибез”, – ди ул.
Быел август аенда Мәдинә Маликова гомеренең 80 яшенә аяк басачак. Зифа буйлы, чибәр йөзле, камил зиһенле, яшьләргә хас табигатьле язучының яшь булып калуының сере (беренче карашка аңа 60ларны гына биреп була), мөгаен, ак күңелле булуындадыр. Кеше яратып укырлык әсәрләрне ак күңел ияләре генә тудыра аладыр.
Мәдинә ханым Арчага тагын килми калмас әле. Чөнки аны биредә яраткан укучылары көтә, чакырып калдылар. Әле ничаклы укучысы аның белән очрашмый да калды. Һичшиксез, кайтыр ул. Аллаһы Тәгалә гомерен генә бирсен.
Розалия Зиннәтова