Басуларда тузганак үстермик

Басуларда тузганак үстермик
Район фермерлар ассоциациясе җитәкчесе Марсель Хәлилов: “Менә хәзер җыелыр өчен бүлмәбез бар, – диде фермерларга. – Монда аерым белгеч тә утырачак”.
Бүлмә Арчаның күп функцияле үзәгенең икенче катына урнашкан. Фермерларны туплап торучы бер үзәк булуы яхшы. Районда авыл хуҗалыгы белән шөгыльләнүче 60лап фермер бар.
Алар 2015 елда Россия һәм Татарстан Респуб- ликасы бюджетында каралган дәүләт ярдәме программалары һәм ничек итеп уңышлы эшләп булуы турында сөйләшергә җыелды.
Яңа техника алганда аның бәясенең 40 процентын дәүләт күтәрә торган программада катнашырга кирәклеге турында әйтелде. Районга каралган лимит (быел ул 46 млн. сум) әрәм булмасын өчен техника алмаган очракта фермерга бу турыда район авыл хуҗалыгы идарәсенә алдан хәбәр итәргә кирәк. Техника алмаучының өлешен районда икенче фермерга бирү мөмкинлеге бар. Техникага каралган акчаның районда калуы отышлы.
Терлекчелектә 1 литр сөт саткан өчен шулай ук дәүләт ярдәме каралган.
– 2015 ел өчен Татарстан безнең район фермерларына сатылган югары һәм 1нче сортлы сөткә 1 млн. 162 мең сум субсидия бирде, – дип сөйләде район авыл хуҗалыгы һәм азык-төлек идарәсе җитәкчесе урынбасары Рәшит Мифтахов. – Ә Россия 1 кварталга 547 мең сум субсидия бирде.
Быел фермерларга үсемлекчелеккә Россия бюджетыннан 1 млн. 651 мең сум акча бүлеп бирелде. Татарстан әлегә субсидияне ашламалата кайтара.
Район авыл хуҗалыгы һәм азык-төлек идарәсенең үсемлекчелек бүлеге җитәкчесе Миннәхмәт Сәгыйтьҗанов:
– Сезон вакытында ягулыкны айныкын-айга ташламалы бәядән (килограммы 31 сум) алып калыгыз, – дип киңәш итте. – Симәнәне яңартып торсагыз гына уңышка ирешә аласыз. Район орлык инспекциясе белән тыгыз элемтәдә эшләргә кирәк. Сорт белән начар эшлибез. Басуларга чүпле симәнә чәчәбез. Күпьеллык үләннәрнең ел саен 6 процентын яңартып барсагыз гына уңышка ирешә алырсыз. 5 ел саен җир сыйфатын тикшертеп торыгыз. Җир белән сак һәм акыллы итеп эшләргә кирәк. Басуларда тузганак үстермик, чын үлән үстерик.
Алга таба Миннәхмәт Рәисович һәр культураның уңай һәм көйсез якларын әйтеп үтте, табыш алу өчен кайсы культураның отышлы булуы турында сөйләде. Фермерларга үстерү өчен бөртеклеләрдән иң кулае – арпа. Бодайның ашламалар кертеп, яхшы туфракта гына уңыш бирә алуы, зур чыгымнар сорый торган культура икәнлеге искә алынды. Һавадагы азотны җиңел үзләштерүче борчакның, җир ашлаучы һәм азык чыганагы буларак, иң кирәкле үсемлек икәнлеге билгеләп үтелде. Аның солы белән бергә чәчелүе җирне ашлау һәм уңыш өчен дә отышлы булуы ассызыкланды.
Мин бу җыелуны фермерларның укуы дип әйтер идем. Һәм кирәкле уку.
Румия Надршина