Мәктәпләр яңа төс ала

Мәктәпләр яңа төс ала
Арчаның өченче мәктәбе урынында төзелеш эшләре башлангач, күпләрне анда ни буласы кызыксындырды.
Берәүләр урта мәктәп, икенчеләр балалар бакчасы, диде. Проект буенча башлангыч мәктәпкә өстәлеп төзелгән янкорма 40 урынга исәпләнгән балалар бакчасы, ә спорт, актлар заллары, ашханә уртак булырга тиеш. “Арча КСМы” ширкәте төзүчеләре көче белән бинаның өченче каты күтәрелгән инде.
Татарстан Республикасы Президенты Рөстәм Миңнеханов таләбе буенча 2015 елда да рес- публикада мәктәпләрне ныклап төзекләндерү, яңа мәктәпкәчә балалар учреждениеләре төзү дәвам итә. Бу юнәлештә безнең районда да зур эш алып барыла. Алда телгә алынган объектны август аена төгәлләргә дә планлаштыралар.
Шулай ук Мөндештә һәм Үрнәктә дә барлык уңайлыклары булган 50 урынга исәпләнгән балалар бакчалары төзелә. Үрнәктә бүгенге көндә аның беренче каты күтәрелсә, Мөндештә “Арча МСО”сы ширкәте төзүчеләре бинаның түбәсен ябу белән мәшгуль.
Ә менә Күпер урамы, 36нчы йортта (элеккеге теркәү палатасы, БТИ урнашкан бина) ныклап төзекләндерү бара. Биредә дә 80 урынлы балалар бакчасы булачак. Стеналар штукатурланган, электр чыбыклары алышынган, пластик тәрәзәләр куелган, идән, түшәм яңартылган инде. Шулай да искегә тимә, исең китәр, диләр бит. Башкарасы эшләр дә бик күп әле.
Мәктәпләргә килгәндә, аларның берничәсе бүген ныклап төзекләндерелә. Өчиле мәктәбе күзгә күренеп үзгәргән, таудан төшкәндә үк күзгә бәрелеп, ялт итеп тора. Тышкы ягы сайдинг белән әйләндереп алына, бинаның эчке ягы да тулысынча төзекләндерелә. Ашханә заман таләпләренә туры китереп эшләнә, канализация үткәрелә, ут чыбыклары алыштырыла, идәннәр, түшәмнәр, стеналар яңа төс ала, спортзал янында чишенү бүлмәләре ясала һәм башкалар.
– Биредә коллектив яхшы, бик булыша, – ди “Арча КСМы” ширкәте җитәкчесе урынбасары Азат Җәләлетдинов.
Яңа Кишет, Утар Аты, Казанбаш мәктәпләрендә дә әлеге оешма ныклап төзекләндерү алып бара. Шул бинада ук урнашкан балалар бакчасы да читтә калмый.
– Әле биредә эш күп, территорияне дә тәртипкә китерергә кирәк, – диде район башкарма комитеты җитәкчесенең беренче урынбасары Илшат Галимуллин.
Ә менә Казанбаш мәктәбендә исә аның чиге юк.
– Бу мәктәпне соңрак төзекләндерергә тотындык. Яңа Кишетне 25 майга төгәлләсәк, Утар Атыны Сабантуйларга тапшырырбыз, дип уйлыйбыз. Ә Казанбаш июльгә кала. Чөнки анда дүрт стенадан тыш бөтен җирне җимереп бетереп, өр-яңадан ясарга туры килә. Шушында ук балалар бакчасы да булачак, – ди Азат Җәләлетдинов.
– Безнең мәктәптә эш кыш буе диярлек барды инде, – ди Апаз авыл җирлеге башлыгы Ринат Садыйков. – Түбәне үзебезнең егетләр Фаил Сафин, Рәдиф Әхмәтшин, Дамир Ибраһимов һәм ике Балтач егете япты.
Төзекләндерүчеләр башта икенче катны ясасалар, хәзерге вакытта беренче катта эш бара.
– Бинаның тышкы ягын сайдинг белән тышларга, керү юлын да үзгәртеп корырга кирәк, – дип киңәш итте Илшат Галимуллин.
Яңа Кенәр интернат-мәктәбе дә читтә калмаган. Уку бинасы ныклап төзекләндерелсә, икенче бина тышкы яктан җылытыла. Биредә дә кызу урак өсте дисәң дә була.
Гөлсинә Зәкиева