Яңа йортлар калкып чыга

Яңа йортлар калкып чыга
Арчаны керүгә беренче булып күзгә ташланган тезелеп киткән күпкатлы йортларны күреп күңел сөенә. Тиздән аларның саны тагын да артачак. Быел биредә тагын алты күпкатлы, 12шәр фатирлы 46-56нчы йортлар күтәрелә.
Көнбатыш урамында төзелеп килүче әлеге йортларның беренче өчесен “Энергосервис”, калганнарын “Арча КСМ”ы ширкәтләре төзи. 46 һәм 48,52нче йортларда хәзерге вакытта эчке эшләр бара инде. Калганнары да күзгә күренеп үсә. Әлеге йортлар социаль ипотека программасы буенча төзелә.
Горький урамындагы 36 һәм 24 фатирлы йортлар да дәүләт торак фонды программасына нигезләнә.
– 34а йортта күп эш калмады. Дөрес, хәл итеп бетерәсе мәсьәләләр бар. Әмма чишә алмаслык түгел. Июньдә тапшырырга планлаштырабыз, – ди “Арча МСО”сы ширкәте баш инженеры Раушан Фатыйхов. – 38а йортның да беренче катын күтәрдек инде.
Кызыл Бистә урамында (элеккеге крахмал заводы территориясендә) тиздән тагын 60 фатирлы бер йорт калкып чыгачак. Ватан урамында да (элеккеге милли аяк киемнәре фабрикасы каршында) тулы көченә төзелеш эшләре бара.
– Бу 12 фатирлы бинага авария хәлендәге йортларда яшәүчеләр дә күчәчәк, – дип аңлатты шәһәр башкарма комитеты җитәкчесе Рафил Исмәгыйлев.
– Район җитәкчесе Илшат Нуриев һәр төзелешне шәхсән үзе контрольдә тота, – ди район башкарма комитеты җитәкчесенең беренче урынбасары Илшат Галимуллин. – Һәр атна урыннарга барып, планеркалар үткәрелә, проблемаларны ачык- лыйбыз, вакытында хәл итү мәсьәләсе карала.
Авария хәлендәге йортлардан күчү өчен тагын берничә беркатлы йорт сафка басып килә.
– Күпер урамы, 32нче йорт әзер инде, 63нче йортта эчтә эшләр бара. Су, канализация үткәрелгән, газ кергән. Территорияне тәртипкә китерәсе бар, – диде “Арча КСМ”ы ширкәте мастеры Равил Муллагалиев. – Икесен бергә май аенда тапшырырга уйлыйбыз.
Шушы программа буенча Һади Такташ урамында да биш фатирлы йорт күтәрелеп, түбәсе ябыла башлаган, Муса Җәлил урамы, 15нче йортка фундамент салынган. Ә Трудовая урамы, 2а йортта (элеккеге элеватор янындагы балалар бакчалары биналары) төзекләндерү эшләре бара. Киләчәктә биредә 6 фатирлы йорт булачак. Монда да “Арча МСО”сы ширкәте эшли, май ахырына тәмамларга уйлый. “Энергосервис” ширкәте төзүчеләре тарафыннан төзекләндерелгән икенче ике катлы бинадан чыгып фикер йөрткәндә, бик матур булырга ошый. Анысы әзер инде. Тыштан сайдинг белән әйләндереп алгач, бинага бөтенләй икенче төс керәчәк.
Төзекләндерү турында сүз барганда, район үзәк хастаханәсен телгә алып китмәү дөрес булмас. Ул соңгы елларда күзгә күренеп үзгәрде, Арча кебек матур шәһәр хастаханәсе төсен алды. Биредә бүген дә бу юнәлештә зур эш алып барыла, бер өлеше ныклап төзекләндерелә. Тышкы якта япма ясала. Эчендә авыруларны кабул итү бүлеге булачак. Авыруларны икенче катка менгерү өчен лифт та эшләнәчәк. Эчке якта плитә идәннәр, пластик тәрәзәләр, ишекләр – бар да заманча булачак. Тышкы яктан хастаханәнең бу өлеше дә керамогранит белән әйләндереп алыначак.
Районда барган тагын бер төзелешкә игътибар итми булмый. Иске Иябаш авылында җимерек хәлдәге иске клуб бинасы урынында яңа мәдәни-спорт үзәге төзелеп бетеп килә.
– Эчке эшләрне бетереп, тирә-юнен тәртипкә китерергә, алгы ягына брусчатка җәяргә, 10нчы майга төзеп бетерергә кирәк, – диде Илшат Галимуллин Раушан Фатыйховка. – Бу бинаны булдыруда инвестор, “Сервис-Агро” ширкәте генераль директоры Габделхәй Кәримов зур ярдәм күрсәтте, кайбер эшләрне тулысынча үз өстенә алды. Авылга (урамнарын да кертеп) юл салдыру планнары да бар.
Гөлсинә Зиннәтова