Кеше турында кайгырт

Кеше турында кайгырт
Арчада рәсми рәвештә теркәлмичә эшләү очракларын киметү һәм мәҗбүри пенсия иминиятләвенә взносларны кертүне арттыру турында зона киңәшмәсе булды. Анда район башкарма комитеты җитәкчесенең беренче урынбасары Илшат Галимуллин катнашты.
Киңәшмәне Татарстан Республикасы хезмәт, мәшгульлек һәм социаль яклау министрының беренче урынбасары Марат Гафаров алып барды.
– Хисап тотарга (1 июль) аз вакыт калып бара, – дип сөйләде ул. – Россия Федерациясе Идарәсе рәисе урынбасары О.Голодецның рәсми рәвештә теркәлмичә эшләү очракларын 30 процентка киметергә һәм мәҗбүри пенсия иминиятләвенә взнослар кертүне 10 процентка арттырырга дигән күрсәтмәсен үтәп өлгерергә кирәк.
Алда торган бу бурыч турында Илшат Галимуллин да әйтеп үтте.
– Районда “соры” базар проблемасы бар, – дип сөйләде ул. – Бу проблема белән тормыш дәрәҗәсен яхшырту һәм керемнәрне легальләштерү буенча территориаль комиссия шөгыльләнә. Кайнар элемтә эшли. Рәсми теркәлмичә эшкә алу очраклары булса, районның икътисад бүлегенә 3-06-44 һәм мәшгульлек үзәгенә 3-17-33 шалтыратырга була. Бүген 22 мөрәҗәгать керде һәм алар комиссия утырышында каралды.
Республикада балалар бакчаларына түләү буенча ата-аналарның бирәчәге артуы күзәтелә. Ул әти- әниләрнең кайда эшләве турындагы мәсьәләне өйрәнергә кирәк. Бәлки алар вакытында хезмәт хакы алмыйдыр, ә бәлки эш бирүче белән килешү төземичә, рәсми рәвештә теркәлмичә бик аз хезмәт хакына эшли торганнардыр һ.б. Сәбәпләр төрле булырга мөмкин.
РФ социаль иминиятләү фондының Татарстан буенча дәүләт идарәсе җитәкчесе урынбасары Фердинат Закиров хезмәт килешүе нигезендә, рәсми рәвештә теркәлеп эшләүнең әһәмияте турында сөйләде. Конверт белән “соры” хезмәт хакы алу ул эш кешесен социаль як- лаучысыз калдыру дигән сүз. Моның никадәр әһәмиятле икәнен эш бирүче дә, эшләүче дә аңларга тиеш. Гаилә башлыгы эш урынында һәлак булып, гаиләсе тиешле пособиедән мәхрүм калган очрак- ларның булуы кызганыч.
Республиканың Дәүләт хезмәт инспекциясе җитәкчесе урынбасары вазыйфаларын вакытлыча башкаручы Ирина Сергеева:
– Тиздән җәйге каникул. Балаларның эшкә урнашу чоры. Аллам сакласын, эш урынында балалар белән берәр төрле бәхетсезлек очрагы килеп чыкса?! Кешене хезмәткә алу һәм хезмәт шартлары тиешле тәртиптә булырга тиеш, – дип сөйләде.
Марат Гафаров Саба районында эш яшендәге кешеләр турында ничек итеп мәгълүмат туплаулары хакында уңай яктан әйтеп үтте. Саба районы икътисад бүлеге җитәкчесе Марат Ишниязов тәҗрибәләре белән уртаклашты:
– Без, төркемнәргә бүленеп, урыннарда, авыл җирлекләрендә эш яшендәге кешеләрнең ни белән мәшгуль булуларын ачык- ладык. Шулай итеп тулы мәгълүмат тупладык.
Сүзне йомгаклап шуны әйтәсе килә, эш бирүче кеше турында кайгыртсын, ә эшләүче үзе турында уйласын иде.
Румия Надршина