Тукай җире көч бирә

Тукай җире көч бирә
Яңа Кырлай урта мәктәбе дүртенче ел рәттән республика мәктәпләрендә белем алучы яшь буынны үз кочагына Габдулла Тукай укуларына җыя.
Белем туплап кына түгел, Тукай эзләренә басып, шагыйрьнең музей комплексындагы тарихи ядкарьләр белән танышып, күңелләренә әйтеп бетергесез хисләр алып китә алар биредән.
Укуларда катнашырга теләк белдерүчеләрнең саны елдан–ел арта бара. Быел да һава торышының начарлыгына карамаганнар (иртәдән яңгырлы–кар, боз килде дә яуды ул көнне), республиканың Баш- кортстан белән чиктәш районнарыннан кадәр килгәннәр. Тукай җире әнә шулай үзенә тарта.
Тукай җире үзенә тартып китереп кенә калмый, җиңүләргә көч тә өсти ул. Укуларда катнашучылар да әйтә моны. Яңа хисләр, кичерешләр яңа дәрт тә өсти сыман. Укучылар биш номинациядә хезмәтләрен яклады һәм шул фәнни хезмәтләре белән Бөек Тукаебызның тормыш юлын, әдәби мирасын тирәнтен белүләрен, аны ихластан яратуларын расладылар. “Фәнни хезмәтләрне бәяләгәндә замана таләпләренә туры килүе, шул тема өстендә эшләүче галимнәрнең фикеренә таяну, эшләрнең җирле материалларга нигезләнгән булуы исәпкә алынды. Жюрига хәтта сайлап алырга кыен булды, чөнки һәр эш югары дәрәҗәгә лаек иде. Үзебезнең район укучыларының тырышлыгына, белемгә омтылуларына горурлану хисе кичереп утырдым”, — ди оештыручыларның берсе — район мәгариф идарәсенең милли мәсьәләләр буенча методисты Энҗе Мостафина.
Горурланырлык шул, 59 укучы арасыннан безнең районнан 18 укучының хезмәте сайлап алынган бит. Биредәге укуларда аларның 14е призлы урын яулауга иреште! Менә алар: “Габдулла Тукай төзегән җыентыкларның әдәбиятыбыз үсешендәге әһәмияте” юнәлешендә Яңа Кырлай мәктәбеннән Рузилә Рәхимова, “Габдулла Тукай иҗатында тәрбия” юнәлешендә Наласа мәктәбеннән Камилә Насыйбуллина, Ашытбаш мәктәбеннән Чулпан Мөхәммәтдинова, Яңа Кырлай мәктәбеннән Илүсә Корбангалиева, “Габдулла Тукай фотографияләрдә” юнәлешендә Яңа Кишет мәктәбеннән Рәсим Йосыпов, Арчаның 5нче гимназиясеннән Гөлназ Локманова, Яңа Кырлай мәктәбеннән Зөһрә Шиһапова, Иске Ашыт мәктәбеннән Рузилә Әхмәдуллина, “Г.Тукайның тормышын һәм иҗатын өйрәнүче галимнәр эшчәнлеге” юнәлешендә Иске Чүриле мәктәбеннән Рәсим Һидиятуллин, Арчаның 2нче урта мәктәбеннән Зөлфия Шакирова, Арчаның 5нче гимназиясеннән Эльвина Гыйльметдинова, укучыларның мәктәп темасына үзләре иҗат иткән кыска хикәяләре конкурсында Арчаның 2нче урта мәктәбеннән Илгиз Сәлимҗанов, Яңа Кишет мәктәбеннән Кадрия Йосыпова, Ашытбаш мәктәбеннән Айсинә Әүхәдиева җиңү яуладылар.
Укуларга, республиканың иҗади, эзләнүчән яшьләре белән танышырга район башкарма комитеты җитәкчесе Илшат Нуриев та килгән иде. Телебезне алга җибәрү өчен тырышучы яшьләр булганда, әлбәттә, Тукай теле яшәячәк. “Тукай фонды” директоры Риман Гыйлемханов әйтмешли, дөньяда бер генә татар калса да, Тукай яшәячәк. “Бөек шагыйребез татар милләтен чит илләргә танытучы ул. Безне ел да очраштырганга Тукайга рәхмәт”, — ди жюри әгъзалары.
Укуларда ел саен укучылар гына түгел, жюри әгъзалары да шагыйрьнең үткәне турында яңалык ача. Быел да бүләкләү тантанасында Фәрхәт Зыятовның Тукайның Кушлавычта уздырган вакытлары турындагы истәлекләре кунаклар өчен яңалыкларның да кәттәсе булды.
Укуларда катнашучылар сәхнәдә яңгыраган җыр–биюләр аша Арча җирендә талантларның күп булуына да шаһит булып китте. Шулай булмыйча, алар — Тукай оныклары бит.
Розалия Зиннәтова