Сызганып эшкә бирелсәң

Сызганып эшкә бирелсәң
Район Мәдәният йортында сәләтле балаларны хөрмәтләделәр. Тантанада район башкарма комитеты җитәкчесе Илшат Нуриев катнашты.
70ләп балага Мактау грамоталары, Рәхмәт хатлары, акчалата бүләкләр тапшырылды. Уку алдынгыларына район башлыгы стипендиясе бирелде.
Тантана татар, рус, инглиз телендә алып барылды.
Илшат Нуриев чыгышын Г. Тукайның тормыш девизына әйләнгән “Эшкә өндәү” шигыре белән башлады:
Зур бәхетләр сызганып эшкә бирелгәннән килә,
Аһ! оят, хурлык, түбәнлекләр иренгәннән килә.
Яшьләрне ул, тиешле һөнәр алганнан соң, районга эшкә кайтырга чакырды, ел әйләнәсе эшли торган белем, ял, сәламәтләндерү лагере булачак, дигән сөенечле хәбәр әйтте.
Район башлыгы стипендиясен менә кемнәр алды: Арчаның 1нче мәктәбеннән Салават Шакиров, Ашытбаш мәктәбеннән Илүзә Фәхретдинова, Лесхоз мәктәбеннән Ландыш Хәлиуллина, югары уку йортларында укучы студентлар Таһир Исмәгыйлев, Салават Әхмәтгалиев, Айсылу Сабирова.
Һәр бала күңеленә кояш салынган – аны яктырта гына белергә кирәк. Тантанада без күңелләрендә кояш балкыган балаларны күрдек, тәрбиячеләр, укытучылар хезмәтенең бөекленә инандык. Ветеран укытучыларның да тантанада катнашуы нур өстенә нур булды.
Районда укудан тыш баланы үстерү өчен мөмкинлекләр бик күп. Әти-әниләргә баласын төрле түгәрәкләргә, секцияләргә йөртү өчен вакыт табарга, иренмәскә генә кирәк. 5 яшьлек һәм хәтта 3 яшьлек малайларны Боз сараена хоккей секциясенә йөртү моңарчы күрелмәгән вакыйга. Укучылар сараенда эшләүче хореограф Илһамия Гыйлаҗиева: “Балаларны биюгә 3 яшьтән алабыз”, – дип әйтә. Әти-әниләр җаен таба, йөртәләр. Районда бассейн булу балалар өчен үзе бер бәхет. Рәсем генә, дибез. Оста дизайнер, архитекторлыкка нигез сәнгать мәктәбенең рәсем түгәрәгендә (җитәкчесе Раилә Динуловна) салына да инде! Тантанада шулай ук җырлаган, биегән балаларның чыгышына сокланып утырдык.
Соңыннан бүләк алучылар белән сөйләштем. Тантананы инглиз телендә алып барган, 1нче мәктәп укучысы Аль физа Урманова:
– Инглиз һәм рус теле буенча мәктәп укучыларының Бөтенроссия олимпиадасында җиңдем, – дип сөйләде. – 2013 елда Халыкара Флекс программасын яулап, 1 ел Америкада яшәп кайттым.
Курса-Почмак мәктәбеннән 10 сыйныф укучысы Гөлүсә Мортазина:
– Укучылар сараена “Нур” телестудиясенә йөрим, – дип сөйләде. – Шигырьләр язам. Менә әле республиканың “Алиш эзләреннән” дигән конкурсында шигырьләрем белән катнашып, 1нче урынны алдым.
Кабат каләм минем
кулымда,
Уч кадәрле кәгазь
кисәгем.
Шул ак биткә
сыйдырмакчы булам,
Күңелемнән аккан
хисләрем.
Румия Надршина