Дым барында чәчеп кал

Дым барында чәчеп кал
11–12 майда район башкарма комитеты җитәкчесе Илшат Нуриев хуҗалыкларда язгы кыр эшләренең барышы белән танышуны дәвам итте.
“Ак барс” агрокомплексы” ширкәтендә уҗымнар матур гына күтәрелеп килә. “Гектарга 150 килограмм исәбеннән аммиак селит- расы белән тукландырдык”, — ди хуҗалык җитәкчесе Шәйдулла Сәләхов.
Баш агроном Рөстәм Мөхәммәдиев арыш уҗымының тармакларын санап күрсәтте.
— Төп саен 3–4 тармак бар, — диде ул. — Яңгырлар бик кирәк, нәкъ менә хәзерге дым белән башакның зурлыгы формалаша.
— Уҗымнарның хәзерге торышыннан чыгып, гектардан уңыш күпме булыр дип фаразлыйсыз? — дип кызыксынды район җитәкчесе.
— Биологик уңыш 40 центнердан да ким булмас, — диде баш белгеч.
Хуҗалык быел 300 гектарда сугарып бәрәңге игәргә җыена. Буа төзеп, хәзер бу мәйданга 5 төрле үлән орлыклары чәчәләр. Терлек таптауга бирешми торган үләннәр, диделәр.
Район җитәкчесе “Ватан” һәм “Северный” хуҗалык- ларында да кыр эшләренең оештырылуыннан канәгать калды. Технология таләпләрен үтәүгә зур игътибар бирәләр, югары җитештерүчәнлеккә ирешәләр. Ике хуҗалыкта да иртә культуралар чәчү бер–ике көннән төгәлләнә.
“Курса МТСы”, “Татарстан”, “Игенче”, “Кырлай” ширкәтләрендә дә язгы кыр эшләре темпы әйбәт.
Район буенча 12 майга 32500 гектардагы бөртекле һәм бөртекле–кузаклы сабан культураларының 20 мең гектарга якыны чәчелде.
“Кырлай”, “Игенче” хуҗалыклары бәрәңге утырта башладылар.
Ильяс СӘХӘПОВ