Батырлар истәлеге мәңге яшәр

Батырлар истәлеге мәңге яшәр
Үткәнен белмәгәннең киләчәге юк. Шуңа хәтерне яңартып тору кирәк. 8 майда Шекә авылында Бөек Ватан сугышында һәлак булганнар истәлегенә һәйкәл ачу тантанасында район башкарма комитеты җитәкчесе Илшат Нуриев мондый һәйкәлләрне һәр авылда куячакбыз, диде.
— Һәр авылның үз кешеләре ил азатлыгы өчен көрәшкән, яу кырында ятып калган. Алар берсе дә онытылырга тиеш түгел, — диде ул.
Әлеге һәйкәлне төзүгә шәхси эшмәкәр Әгъләм Локманов зур өлеш керткән, “Северный” ширкәте булышлык күрсәткән. Район җитәкчесе аларга зур рәхмәтен белдерде. Авылда бүгенге көндә исән булган бердәнбер сугыш ветераны Хәбир Кәримовның үз башыннан кичкәннәре турында сөйләгәнен һәркем зур игътибар белән тыңлады.
Шушмабаш урта мәктәбе укучылары, байраклар күтәреп, барабан кагып авыл урамнары буйлап үтте. Сугыш авырлыкларын үз җилкәләрендә кичергән әбиләр, бабайларның аларны күргәч, күзләре яшьләнде.
Мондый чаралар бу көнне барлык авыл җирлекләрендә үтте.
Илебезнең барлык кешеләрен берләштерә торган бәйрәм ул Җиңү көне!
9 майда Арча шәһәре урамнарында бәйрәм рухы хөкем сөрә иде. Белгәне дә, белмәгәне дә бәйрәм белән котлый, бүген һәркем бер–берсенә дус һәм туган.
Үзәк мәйданда “Бердәм Россия” партиясенең яшь гвардиячеләре тантанада катнашучыларны каршылый, Георгий тасмалары тага, газетабызның 1945 елның 10 маенда чыккан саны белән эшләнгән махсус бәйрәм листовкалары тарата. Тирә–якта сугыш чоры күренешләре — “Берлинга юл”, “Землянкада”, “Рейхстаг”, “Кыр кухнясы”, “Кичү” янында тукталып фотога төшәләр. Курса–Почмак, Урта Курса, Наласа, Арчаның 7нче, Яңа Кишет мәктәпләре, “Казан арты” музее экспонатларын кызыксынып карадылар.
Арча Мәдәният йорты үзешчәннәренең “Җиңү көне” дигән театральләштерелгән чыгышы игътибарны үзенә җәлеп итте.
Бөек Ватан сугышында Җиңүнең 70 еллыгына багышланган парад Җиңү Байрагының күчермәсен мәйданга алып керү белән башланды. Җиңү Байрагы 1945 елның 1 маенда Берлиндагы рейхстаг бинасына эленә. Ул совет халкының һәм аның Кораллы Көчләренең фашистлар Германиясен җиңүнең рәсми символы һәм Россия Федерациясенең дәүләт ядкәре булып исәпләнә.
Мәйданга Арча район хәрби комиссариаты коллективы һәм Россия Федерациясе Кораллы Көчләре ветераннары керә. Сугышның беренче көннәреннән хәрби комиссариат халыкны фронтка әзерләү буенча махсус режимда эшли башлый. Фронтка районнан 25 меңнән артык кеше китә. Арча педагогика көллияте студентлары һәм район мәктәпләре укучылары арасында “Мин хәтерлим, мин горурланам!” дигән акция уздырылган иде. Бүгенге бәйрәмдә 140 егет һәм кыз илебезне дошманнардан азат иткән якташларыбызның портретларын һәм орден–медальләрен күтәреп үттеләр.
Алар артыннан “Бөек Җиңүгә — 70 бишле!” акциясендә җиңүчеләр узды. Мәгариф хезмәткәрләре, Арчаның беренче һәм икенче мәктәпләре, 5нче гимназия коллективлары бик матур бизәлгән колонналар белән үтте.
Сугыш еллары Арча педагогика көллияте тарихында аерым урын тота. 1941 елның 23 июнендә училищеның чыгарылыш сыйныфы тулысы белән укытучы В.Шигарев җитәкчелегендә фронтка китә. Күбесе яу кырында ятып кала. Коллектив мәйданнан горур- лыклары булган шәхесләрнең фоторәсемнәрен күтәреп үтте. Парадта да көллият үзенчәлекле яклары белән аерылып торды — танк макетына кадәр ясап чыкканнар, чын диярсең!
“Арча АТПсы”, “Арча МСОсы”, “Жилкомбытсервис”, “Водоканал–Сервис”, ЗУЭС, “АСПК”, “Арча КСМы”, “Металл”, “Энергосервис” ширкәтләре, медицина, почта, социаль яклау идарәсе хезмәткәрләре, парадта катнашучы һәркем, күңел җылысы биреп, зур җаваплылык тоеп әзерләгән.
Быел ветераннар үзләре дә парадны эскәмияләрдә утырып рәхәтләнеп карады.
Җиңүнең 70 еллыгына багышланган митингны район җитәкчесе Илшат Нуриев ачты.
— Еллар узар, ләкин Бөек Җиңү һәм аны яулап алган батырлар истәлеге мәңге яшәр! — диде ул. — Җиребезне беркайчан да сугыш ялкыны көйдермәсен, күгебез аяз, тормышыбыз имин һәм мул булсын!
Россия Федерациясе Пенсия фондының Татарстан Республикасы буенча Идарәсе җитәкчесе Марсель Имамов Татарстан Республикасы Президенты Рөстәм Миңнехановның бәйрәм котлавын җиткерде.
Татарстан Республикасы хәрби комиссариатының Арча һәм Әтнә районнары буенча бүлеге җитәкчесе Алмаз Борһанов тәбрикләү сүзләре әйтте.
Митингтан соң бәйрәм концерты башланды.
Ильяс ФӘТТАХОВ