Партия лаеклыларны ачыклый

Партия лаеклыларны ачыклый
Быел 13 сентябрьдә, бердәм тавыш бирү көнендә, республикада Татарстан Республикасы Президентын һәм җирле үзидарәнең вәкиллекле органнарына депутатлар сайлаулары була.
25 июньдә “Бердәм Россия” партиясенең Арча бүлеге конференциясендә сайлауларда катнашачак кандидатлар күрсәтеләчәк. Кандидатларны билгеләү өчен партия эчендә алдан тавыш бирү узачак. Партия эчендә алдан тавыш бирүне “Бердәм Россия” партиясе генә куллана.
Партия эчендә алдан тавыш бирү беренче тапкыр Татарстан төбәк бүлегендә 2011 елда Россия Федерациясе Дәүләт Думасына сайлау кампаниясе вакытында кулланылды. 2014 елның апрелендә Татарстан Республикасы Дәүләт Советы депутатларын сайлаулар алдыннан да үткәрелде.
Җирле үзидарәнең вәкиллекле органнарына сайлауларга кандидатларны алдан сайлап алу быелгы кебек киң күләмдә беренче тапкыр уздырыла. Депутатлыкка кандидатлар сайлаучылар белән очрашуда катнаша, теләгәннәре үзләренең сайлана калганда нәрсә эшләргә җыенулары турында сөйли, сайлаучылар һәркайсына үз сорауларын бирә ала. Сайлаучылар яшерен тавыш бирү юлы белән үзләренә ошаган, депутат вазыйфаларын җиренә җиткереп башкара ала дип санаган кандидатураларны хуплап тавыш бирә. Тавыш бирү йомгак- лары буенча барлык кандидатларның рейтингы билгеләнә. Әлеге исемлек партиядән кандидатлар күрсәтү өчен нигез булып тора.
12 майда шундый очрашу җыелышы Апаз авыл җирлегендә узды. Аны оештыру комитеты әгъзасы, партиянең Арча җирле бүлеге башкарма комитеты җитәкчесе Тәлгать Җәләлетдинов алып барды.
— Апаз авыл җирлеге Советына депутатлык мандатына 15 кешедән торган исемлек төзелде, — диде ул. — Партия әгъзалары үз–үзен тәкъдим итте, партиясез кандидатураларны иҗтимагый оешмалар күрсәтте. Иң күп тавыш җыйган 10 кеше сайлауларга кандидатлар итеп тәкъдим ителәчәк.
Хисап комиссиясе рәисе Лариса Васильева тавыш бирү тәртибен аңлатты.
Кандидатлар “Ватан” ширкәте башкарма директоры Илнар Әхмәтов, Хәсәншәех мәктәбе директоры Шамил Сәлахов, Апаз авыл җирлеге башлыгы Ренат Садыйков сайлау алды программалары белән чыгыш ясадылар.
Соңыннан яшерен тавыш бирү үткәрелде.
Ильяс СӘХӘПОВ